Wuhrẹ No Ẹme Ọghẹnẹ Ze

Oghẹrẹ Vẹ U Fo nọ Ma rẹ rọ Kareghẹhọ Uwhu Jesu?

Uzoẹme nana o kẹ iyo enọ jọ nọ o rẹ sae jọnọ whọ nọ no ẹdẹjọ, u te je dhesẹ oria nọ whọ rẹ sae jọ ruẹ iyo na evaọ Ebaibol ra. O te were Isẹri Jihova re a lele owhẹ ta ẹme kpahe iyo na.

1. Oghẹrẹ vẹ u fo nọ ma rẹ rọ kareghẹhọ uwhu Jesu?

Jesu ọ ta kẹ ilele riẹ nọ a rehọ ebrẹdi gbe udi ro ru ekareghẹhọ uwhu riẹ. Ebrẹdi na u dikihẹ kẹ ugboma Jesu, yọ udi na u dikihẹ kẹ azẹ riẹ.—Se Luk 22:19, 20.

Ebrẹdi nọ Jesu ọ re kugbe ikọ riẹ fiki uwhu riẹ na o kare ẹvi. Evaọ eria buobu Ebaibol na, ẹvi hayo oware nọ o rẹ lẹliẹ oware fu u dhesẹ uzioraha. Fikiere u kiehọ gaga inọ ebrẹdi na u dhesẹ ugboma ogbagba Jesu. Ọ rehọ ugboma riẹ ro dheidhe, onọ u si idhe nọ a jẹ hae rehọ erao dhe evaọ otọ Uzi Mosis na n’otọ. (Ahwo Hibru 10:5, 9, 10) Udi na u dikihẹ kẹ azẹ ọghaghae Jesu nọ o ro dheidhe fiki izieraha mai.—Se 1 Pita 1:19; 2:24; 3:18.

2. Oke vẹ u fo nọ ma rẹ rọ kareghẹhọ uwhu Jesu?

Jesu o whu evaọ etoke ehaa Ọnyavrẹ Nisan 14. Nọ ọre o te kiediwi no ahwo Ju a re ro muọ ẹdẹ rai họ ekele. Jesu ọ re emu Ọnyavrẹ na kugbe ikọ riẹ evaọ owọwọ taure o te ti whu, yọ owọwọ ovo yena, ọ re emu ọkpokpọ ọfa kugbe ae, onọ a se emu owọwọ Olori na, re a rọ kareghẹhọ uwhu riẹ.—Se Luk 22:14, 15.

Nẹnẹ, idibo Ọghẹnẹ a be kareghẹhọ oware nọ Ọghẹnẹ ọ rọ ẹkwoma Jesu ru re ọ sai si akpọ na kpobi no otọ uzioraha gbe uwhu. (Ọnyano 12:5-7, 13, 17) Wọhọ epanọ emọ Izrẹl a jẹ hai ru ehaa Ọnyavrẹ na ẹsiẹvo ẹgbukpe na, ere ọvona a re ru Ekareghẹhọ uwhu Jesu ẹsiẹvo ẹgbukpe, nọ ọre o te kiediwi no evaọ Nisan 14, yọ a re ru ei lele ekele ukeledẹ Ebaibol na.—Se Jọn 1:29.

  3. Amono u fo nọ a rẹ re ebrẹdi jẹ da udi na?

Okenọ Jesu ọ rehọ udi na kẹ ilele riẹ, ọ ta kẹ ae nọ: “Egho ọnana họ ọvọ ọkpokpọ” na. (1 Ahwo Kọrint 11:25) A rọ ọvọ ọkpokpọ na nwene ọvọ Uzi Mosis, onọ Ọghẹnẹ ọ jọ ya eyaa kẹ emọ Izrẹl inọ a te ru lele oware kpobi nọ ọ ta kẹ ae, a ti zihe ruọ ahwo riẹ. (Ọnyano 19:5, 6) Rekọ emọ Izrẹl a ghẹmeeyo. Onana o wha riẹ ze nọ Jihova o ro ru ọruẹrẹfihotọ ọvọ ọkpokpọ.—Se Jerimaya 31:31.

Ẹkwoma ọvọ ọkpokpọ na, Jihova ọ te rọ utu ahwo osese jọ wha eghale riẹ te ahwo buobu. Ahwo nọ Jihova ọ reọvọ ọkpokpọ na kugbe a bu hu, idu udhuhrẹ gbe ene (144,000) ọvo. Jihova ọ te rọ ẹkwoma rai kẹ ima ahwo buobu nọ i no erẹwho akpọ na kpobi ze uzuazọ ebẹdẹ bẹdẹ evaọ aparadase otọakpọ. Ahwo jọ nọ a rrọ ọvọ ọkpokpọ na a gbẹ rrọ otọakpọ be gọ Jihova nẹnẹ. Ae ọvo họ enọ u fo nọ a rẹ re ebrẹdi jẹ da udi na keme egho na u dikihẹ kẹ “ọvọ ọkpokpọ” na.—Se Luk 12:32; Eviavia 14:1, 3.

4. Irere vẹ ma re wo no Ekareghẹhọ na ze?

Ekareghẹhọ uwhu Jesu na nọ ma re ru ẹsiẹvo ẹgbukpe na o rẹ lẹliẹ ovuhumuo mai kẹ uyoyou ulogbo nọ Jihova o dhesẹ kẹ omai na diwi viere. O vi Ọmọ riẹ ze ti whu kẹ omai. Fikiere, nọ ma te kpohọ Ekareghẹhọ na, joma roro didi kpahe oware nọ uwhu Jesu u ru lọhọ kẹ omai. U fo re ma hai roro kpahe epanọ ma sai ro dhesẹ edẹro kẹ oware nọ Jihova avọ Jesu a ru kẹ omai na.—Se Jọn 3:16; 2 Ahwo Kọrint 5:14, 15.

Re whọ gbẹ riẹ kpahe ẹme nana, rri ẹwẹ-obe avọ 206-208 ọrọ obe nana, Eme Ebaibol na O Gine Wuhrẹ? onọ Isẹri Jihova a kere.