Si Kẹle Ọghẹnẹ

Ọnọ Ọ rẹ Hwosa kẹ Enọ E Be Gọe Kpobi

“WHẸ KOBIRUO.” Ono eva e rẹ were he nọ a te yere iei fiki iruo nọ ọ riẹ ru ziezi, hayo fiki ọghọ nọ o ru kẹ ohwo jọ? Mai kpobi ma rẹ gwọlọ nọ ahwo a dhesẹ edẹro kẹ eware nọ ma bi ru, maero nọ ahwo nọ ma you a te dhesẹ edẹro nana. Uzẹme riẹ họ, ma you Jihova Ọghẹnẹ mai, vi omọfa kpobi. Kọ omodawọ nọ ma be rọ gọe o be dae ẹro? Joma ta kpahe oghẹrẹ nọ Jihova o ro yerikugbe Ẹbẹdmẹlẹk, ọzae nọ o fi uzuazọ riẹ họ ọza re ọ ruẹsi siwi ọruẹaro Ọghẹnẹ jọ.—Se Jerimaya 38:7-13 gbe 39:16-18.

Ono họ Ẹbẹdmẹlẹk? O wọhọ nọ ọ jọ oletu evaọ uwou-ovie Juda nọ a re se Zẹdikaya. * Ẹbẹdmẹlẹk avọ Jerimaya a rria evaọ etoke ovona, yọ Jerimaya họ ọnọ Ọghẹnẹ o vi re ọ nyae vẹvẹ ahwo Juda unu kpahe ọraha nọ o bi ti te ai fiki eware iyoma nọ a je ru. Dede nọ Ẹbẹdmẹlẹk ọ jẹ rria kugbe emọ-ovie nọ i wo ozodhẹ kẹ Ọghẹnẹ hẹ, ọ jẹ dhozọ Ọghẹnẹ, yọ ọ jẹ kẹ Jerimaya adhẹẹ gaga. Iruemu ezi nọ Ẹbẹdmẹlẹk o wo i dhesẹ oma via evaọ okenọ ewegrẹ a gu ọrue fihọ Jerimaya uzou, je gbolo iei fihọ ozae nọ o vọ avọ oluhu re o whu. (Jerimaya 38:4-6) Kọ eme Ẹbẹdmẹlẹk o ru?

Ẹbẹdmẹlẹk o dhesẹ aruọwha, ọ dhozọ uye nọ emọ-ovie na a te kẹe vievie he. Ọ gbaudu nya bru Zẹdikaya ovie na, jẹ jọ iraro ahwo kpobi ta kẹe inọ oware nọ a ru Jerimaya na u woma vievie he. Ẹsejọhọ, Ẹbẹdmẹlẹk ọ jẹ riobọ rri ezae nọ i ru eyoma na, jẹ ta kẹ ovie na inọ: “Umuomu ahwo ọnana a ru . . . Jerimaya ọruẹaro na.” (Jerimaya 38:9) Nọ ovie na ọ riẹ uzẹme oware nọ o ginẹ via no, ọ tẹ ta kẹ Ẹbẹdmẹlẹk re ọ rehọ ezae jọ gboma re a nyai si Jerimaya no ozae na ze.

Emamọ uruemu ofa nọ Ẹbẹdmẹlẹk o dhesẹ họ ẹwo. Ọ rehọ “iwhre-ehọ gbe ehọ nọ [ehiẹ] no, nọ ọ rehọ ufi si se Jerimaya eva oza na.” Fikieme ọ rọ rehọ inwrehọ gbe ohọ ro se Jerimaya? Re Jerimaya ọ rehọ ae variẹ ataviemu riẹ, re omariẹ o seba ehorie evaọ okenọ a ti si ei no oluhu ozae nọ o zue ro na ze.—Jerimaya 38:11-13.

Jihova ọ ruẹ oware nọ Ẹbẹdmẹlẹk o ru na. Kọ oware na o da Jihova ẹro? Ọghẹnẹ o vi Jerimaya nyae ta kẹ Ẹbẹdmẹlẹk inọ ọraha Juda o kẹlino. Kẹsena, Ọghẹnẹ ọ tẹ kẹ Ẹbẹdmẹlẹk imuẹro inọ o ti siwi ei evaọ etoke ọraha na. Jihova ọ ta kẹe inọ: “Mẹ rẹte thọ owhẹ . . . A rẹte rehọ owhẹ họ obọ ahwo nọ whọ be dhẹ ozọ rai hi . . . Uzẹme nọ mẹ rẹte thọ owhẹ, a te rehọ ọgbọdọ kpe owhẹ hẹ; who reti wo uzuazọ ra wọhọ ọnọ ọ vabọ eva ẹmo.” Fikieme Jihova ọ rọ ya eyaa inọ ọ te thọ Ẹbẹdmẹlẹk? Jihova ọ ta kẹe inọ: “Keme whọ rehọ ẹro suọ omẹ.” (Jerimaya 39:16-18) Jihova ọ riẹ inọ orọnikọ ọdawẹ nọ Ẹbẹdmẹlẹk o wo kẹ Jerimaya ọvo o wọ riẹ ru oyena ha, rekọ fikinọ o wo ẹrọwọ je fievahọ Ọghẹnẹ re.

Oware nọ ma wuhrẹ no onana ze o rrọ vevẹ, koyehọ, oma nọ ma be dawo evaọ egagọ Jihova o be dae ẹro. Ebaibol ọ kẹ omai imuẹro inọ Ọghẹnẹ ọ rẹ kareghẹhọ oware kpobi nọ ma ru evaọ egagọ riẹ, makọ epanọ o kawo te kẹhẹ, otẹrọnọ ma rọ eva mai kpobi ru ei. (Mak 12:41-44) Kọ oma o gbẹ be wọ owhẹ re who si kẹle Ọghẹnẹ nana nọ oware nọ who ru o rẹ da ẹro na? Who te ru ere, o ti ru gba kẹ owhẹ nwane wọhọ epanọ Ebaibol ọ ta kpahe iẹe, inọ: “Ọ rẹ te hwosa kẹ e nọ e guọlọ e riẹ.”—Ahwo Hibru 11:6.

[Oruvẹ-obotọ]