Ebaibol Na O Re Nwene Uzuazọ Ohwo

EME o lẹliẹ ohwo jọ nọ ọ jẹ hae kọ itaba nwene okọ riẹ, je no egagọ riẹ nọ o kru gaga? Eme o fi obọ họ kẹ aye jọ nọ ọ jọ ọgba-idieda nwene uruemu yena? Se eme nọ ahwo nana a ta.

“Eva e were omẹ nọ mẹ rọ rrọ ukoko akpọ-soso nana.”​—DINO ALI

UKPE NỌ A YẸ OMẸ: 1949

ORẸWHO MẸ: AUSTRALIA

IKU MẸ: MẸ JẸ HAE KỌ ITABA

UZUAZỌ MẸ EVAỌ OKENỌ U KPEMU: Ọsẹgboni mẹ a kwa no orẹwho Albania kpohọ Mareeba, ẹwho ọsese jọ evaọ Queensland, Australia evaọ ukpe ọ 1939. Ahwo nọ a kwa ze ẹkwotọ na họ ahwo Bosnia, Griki, Itali, Serbia, gbe ahwo erẹwho efa, yọ duọ ohwo duọ ọvuọ orọwọ egagọ gbe uruemu-ẹwho riẹ nọ a ru reria no. Fikinọ Mareeba o jọ ẹkwotọ nọ a rẹ jọ kọ itaba, ọsẹgboni mẹ a te muọ itaba họ ẹkọ.

U kri hi, a te yẹ oniọvo-ọmọtẹ ọkpako mẹ, kẹsena a te yẹ emezae ivẹ tu ei, mẹ kọ ọmọ avene. Nọ mẹ gbẹ jọ ukpe ọvo, ẹyao o ro kpe ọsẹ mẹ. Oni mẹ ọ tẹ wariẹ rọo, je yẹ emọ ene efa kẹ ọzae ọkpokpọ riẹ na. Uwou ọzae oni mẹ nọ o jọ obọ ọgbọ itaba riẹ na ma jọ rro te ahwo.

Me no uwou, nọ mẹ jọ ikpe-ikpegbọ. Nọ mẹ jọ ikpe 23, mẹ tẹ rọo Saime aye mẹ, evaọ uwou egagọ Muslim, keme egagọ yena ma jọ. Imoni mẹ kpobi egagọ yena a jọ re. Mẹ jẹ hai se Koran gbe obe jọ nọ a kere ikuigbe Muhammad ọruẹaro na fihọ. Me wo Ebaibol ọsese jọ nọ mẹ jẹ hai se oke yena re. Obe Koran na o ta kpahe eruẹaro nọ a jọ Ebaibol na fodẹ, yọ Ebaibol na nọ me je se na u fi obọ họ kẹ omẹ wo otoriẹ etoke nọ eruẹaro na e rọ jọ uzuazọ.

Isẹri Jihova a jẹ hae ta usiuwoma kẹ omẹ avọ aye mẹ, jẹ kẹ omai emagazini gbe ebe efa rai nọ e jẹ hae were omai ese gaga. Mẹ kareghẹhọ nọ ẹsibuobu mẹ avọ Isẹri na ma jẹ hae ta ẹme kpahe eware sa-sa nọ i kie kpahe egagọ. Yọ ẹsikpobi, Ebaibol na a jẹ hae rọ kẹ iyo enọ nọ mẹ nọ rai orọnikọ iroro obọrai hi. Oyena u je ru uwuhrẹ rai duobọte omẹ udu.

 Isẹri Jihova na a ta kẹ omẹ nọ a gwọlọ ru obe-uwuhrẹ Ebaibol kugbe omẹ, yọ a jẹ hai zizie omẹ kpohọ iwuhrẹ rai, rekọ mẹ jẹ hae se ẹsikpobi. Oware nọ o jọ omẹ oja evaọ oke yena họ, epanọ me re ro wo udhu itaba obọ mẹ gbe uviuwou ulogbo. Whaọ, mẹ sai wo udhu obọmẹ hẹ, rekọ me yẹ emọ isoi nọ me you gaga.

EPANỌ EBAIBOL NA O RO NWENE UZUAZỌ MẸ: Dede nọ Isẹri Jihova a ta usiuwoma kẹ omẹ te ikpe izii, mẹ rọwo nwene egagọ mẹ hẹ. Rekọ ebe rai e jẹ hae were omẹ se. Evaọ Ẹdoka kpobi, mẹ avọ aye mẹ ma jẹ hae romatotọ se ebe na. Ma sẹro ebe nọ a kẹ omai evaọ ikpe na kpobi. Nọ ahwo jọ a jẹ gwọlọ kpe isiuru nọ i je dhe ẹgẹga evaọ udu mẹ, ebe na i fi obọ họ kẹ omẹ ziezi.

Wọhọ oriruo, ẹdẹjọ mẹ nyaku olori ichọche jọ nọ ọ jẹ daoma gba omẹ họ rọwo nọ Jesu họ Osiwi mẹ. Ọ tẹzẹ oniọvo aye mẹ gbe ọmọsẹ mẹ kurẹriẹ ruọ ichọche riẹ. U ri kri hi na, egbẹnyusu mẹ nọ e jọ egagọ sa-sa a te mu omẹ họ ẹtẹzẹ re me kuomagbe egagọ rai. Ahwo nana jọ a kẹ omẹ ebe nọ e ta eme mukpahe Isẹri Jihova. Mẹ jẹ hae nọ ahwo nana nọ e jẹ raha Isẹri Jihova na re a dhesẹ kẹ omẹ eria nọ a rehọ iwuhrẹ rai no ze evaọ Ebaibol na, rekọ a jẹ sai dhesẹ uvumọ oria ha.

Ewọsuọ nana nọ i je te omẹ na i ru nọ me ro muọ Ebaibol na họ ese gaga je bi roro didi kpahe eware nọ me se, avọ ebe nọ Isẹri Jihova a kẹ omẹ nọ mẹ jẹ hai ro ru ekiakiẹ. Uwhremu na, mẹ tẹ jiroro inọ enẹna họ oke nọ me re ro fi eware nọ me bi wuhrẹ na họ iruo.

Evaọ oke yena, uvumọ Osẹri Jihova o je wuhrẹ obe kugbe omẹ hẹ, ghele na mẹ ọvo me te mu iwuhrẹ ukoko rai họ ẹnya. Nọ me mu iwuhrẹ na họ obọ, udu o jẹ hai bru omẹ avọ oma nọ o jẹ vuomẹ, rekọ ahwo na kpobi a jẹ whẹtiẹ omẹ họ oma ziezi, yọ eware nọ a je wuhrẹ na e were omẹ gaga. Mẹ tẹ gbaemu inọ mẹ rẹ jọ omọvo Isẹri Jihova, mẹ tẹ rọ oma mudhe kẹ Ọghẹnẹ jẹ họ-ame evaọ ukpe ọ 1981.

Aye mẹ ọ wọso omẹ hẹ, rekọ evaọ ẹsejọ ọ jẹ hae nọ omẹ inọ kọ ogbẹrọnọ ẹviẹhọ a r’owhẹ na? Ghele na, o lele omẹ kpohọ oria nọ a jọ họ omẹ ame. Mẹ jẹ hae ta eware nọ me wuhrẹ no Ebaibol ze kẹe. Nọ mẹ avọ Saime aye mẹ ma ruọ omoto bi no erẹ ze ẹdẹjọ evaọ oke nọ mẹ họ-ame te ukpe ọvo no, , ọ tẹ ta nọ ọ gwọlọ jọ omọvo Isẹri Jihova. Akpọ o gbe omẹ unu nọ ọ ta ere. Ọ họ-ame evaọ ukpe 1982.

Re ma jọ uzuazọ mai ru inwene nọ i fo o jọ bẹbẹ. Mẹ siọ itaba ba ẹkọ fikinọ oyena o wọso ehri-izi Ebaibol. (2 Ahwo Kọrint 7:1; Jemis 2:8) O rehọ omai oke krẹkri taure ma tẹ te ruẹ emamọ iruo nọ ma sae rọ ko uviuwou mai. Ofariẹ, fikinọ ma kurẹriẹ ruọ Isẹri Jihova, imoni mai a rọwo weze bru omai ze evaọ ikpe buobu hu. Rekọ ma jẹ daoma rọ uyoyou lele ai yeri wọhọ epanọ Ebaibol na ọ ta. Ukuhọ riẹ, ọwọsuọ na o te kuhọ; imoni mai a be riẹ yeri kugbe omai enẹna.

 IRERE NỌ ME WO NO: Ẹbẹbẹ omovuọ, ugho, gbe ọwọsuọ uviuwou nọ me fi kparobọ na, i fi obọ họ kẹ omẹ riẹ epanọ Jihova Ọghẹnẹ o wo odiri kẹ omẹ te. Wọhọ oriruo, obọnana mẹ yọ ọkpako ukoko, yọ ẹsibuobu mẹ rẹ jọ eplatfọmo ru ẹme. Re me ru ẹme o gbẹ rrọ ẹbẹbẹ kẹ omẹ keme me re bru ekọkọ. Rekọ fiki olẹ nọ mẹ be hae lẹ se Jihova ẹsikpobi, o bi fi obọ họ kẹ omẹ sai ru ẹme nọ a kẹ omẹ.

Mẹ avọ aye mẹ ma kẹle ohwohwo gaga, yọ uyoyou nọ o rrọ udevie mai u bi dhe ẹgẹga. Nọ ma jẹ yọrọ emọ mai, eware jọ e jẹ thọ omai obọ, ghele na ma daoma wuhrẹ ae eware nọ ma wuhrẹ no Ebaibol na ze. (Iziewariẹ 6:6-9) Obọnana, ọmọzae ọkpako mẹ avọ aye riẹ a rrọ iruo imisiọnare.

Mẹ kareghẹhọ oware jọ nọ o via evaọ ẹdẹjọ nọ ma nwani muọ iwuhrẹ Isẹri Jihova họ no. Nọ mẹ dhẹ omoto mẹ họ oria nọ a rẹ dhẹ imoto fihọ no, me te rri no etẹe kpohọ obeva Ọgwa Uvie na, jẹ ruẹ ogbotu ahwo buobu. Mẹ tẹ nọ uviuwou mẹ nọ, “Eme wha be ruẹ?” Ahwo nọ a no eghagha avọ eghagha ze a vọ Ọgwa Uvie na, ahwo Aboriginal, Albania, Australia, Croatia, ghele na, aikpobi a be wereva kugbe. Eva e be were omẹ nọ mẹ rọ rrọ ukoko akpọ-soso nana nọ okugbe ọ rrọ na, yọ orọnikọ evaọ Australia ọvo okugbe ọnana ọ rrọ họ rekọ nya akpọ na soso duwu.—1 Pita 5:9.

“Oniọvo-ọmọtẹ ọkpako mẹ o vuomẹ wa vievie he.”​—YELENA VLADIMIROVNA SYOMINA

UKPE NỌ A YẸ OMẸ: 1952

ORẸWHO MẸ: RUSSIA

IKU MẸ: MẸ JỌ ỌGBA-IDIEDA, MẸ ỌVO ME JE TI KPE OMAMẸ

UZUAZỌ MẸ EVAỌ OKENỌ U KPEMU: A yẹ omẹ evaọ Krasnogorsk, ẹwho ọsese jọ nọ udhedhẹ o jọ, nọ o kẹle Moscow. Ọsẹgboni mẹ a jọ iticha. Mẹ riẹ obe ziezi, yọ me je wuhrẹ kpahe ile-esuọ. Yọ o wọhọ nọ eware i ti kiehọ k’omẹ evaọ obaro.

Nọ mẹ rọo no, mẹ avọ ọzae mẹ ma tẹ kwa kpohọ oria jọ nọ ekela, idieda, gbe ivovavovo e jẹ rrọ odode. Evaọ oke yena, mẹ riẹ hẹ inọ uruemu oria na u ti kpomahọ omẹ yoyoma. Mẹ jẹ hai kpohọ epati, rekọ oware nọ o jẹ hae wọ omẹ nya họ, re mẹ so ile je kporo ijita ọvo. Rekọ oke-kpobi nọ me kpohọ epati, ahwo a jẹ hai se omẹ re me kuomagbe ai vovo ivovavovo jẹ da idi. U kri hi, me te zihe ruọ ọgbidi.

Uruemu idieda-thomawa na u te mu uzuazọ mẹ họ ẹraha. Nọ u te oke jọ no, o tẹ te raha uzuazọ mẹ kpobi no, mẹ gbẹ jẹ sae re emu hu. Mẹ tẹ dhugbẹ gwọlọ whu, fikiere me te ru oware jọ nọ o rẹ sae wha uwhu se omẹ, rekọ me whu hu. Eva e be were omẹ inọ mẹ gbẹ rrọ uzuazọ.

Evaọ etoke nana kpobi, oniọvo-ọmọtẹ mẹ ọ  jẹ hai weze bru omẹ ze ẹsikpobi. O zihe ruọ omọvo Isẹri Jihova no, yọ ọ jẹ hae vuẹ omẹ epanọ Ebaibol na o sai ro fi obọ họ kẹ omẹ. Rekọ me wo isiuru kpahe Ebaibol ho, fikiere mẹ jẹ hae gaviezọ kẹe he. Ghele na, oniọvo mẹ o vuomẹ wa ha. Odiri gbe uyoyou nọ o dhesẹ kẹ omẹ i ru nọ mẹ rọ rọwo uwhremu na inọ a wuhrẹ Ebaibol kugbe omẹ.

EPANỌ EBAIBOL NA O RO NWENE UZUAZỌ MẸ: Nọ a muọ Ebaibol na họ ewuhrẹ kugbe omẹ no, mẹ tẹ gbaemu inọ mẹ rẹ siọ udi-oda ba. Evaọ etoke yena, ọzae jọ nọ ma gbẹ be rria okegbe ọvona nọ ọ rẹ da udi gaga o te kpe omẹ. Ọ nwa omẹ oma gaga, fikiere a tẹ wọ omẹ kpohọ ẹsipito. O wiri ibiefẹ ene mẹ, je tu ubiẹro mẹ jọ. Evaọ etoke nọ mẹ rọ jọ ẹsipito na, mẹ gbẹ jẹ da idi hi, yọ onana u ru nọ udi u ro no omẹ oma.

Evaọ etoke yena, mẹ jẹ hae lẹ ẹsikpobi. Oria Ebaibol nọ o jẹ hae sasa omẹ oma họ Enuobro 3:55, 56, onọ o ta nọ: “E ỌNOWO me bo se owhẹ, no evaọ edidi . . . ọgọdọ na ze; who te ghine yo unu ẹme mẹ, ‘Me bo fiki obufihọ, who vu omẹ wa ha!’”

U mu omẹ ẹro inọ Jihova o gine yo olẹ mẹ. Ọ kẹ omẹ ẹgba nọ mẹ rọ siọ ekpehre uzuazọ nọ me je yeri ba. Etoke jọ e jariẹ nọ isiuru idieda e jẹ gwọlọ wariẹ ruọ omẹ oma. Rekọ eva e be were omẹ inọ me kie kẹ odawọ yena ha.

Nọ a bi wuhrẹ Ebaibol kugbe omẹ na, me te vuhumu inọ o gwọlọ nọ mẹ rẹ tha ọzae mẹ uke. (1 Pita 3:1, 2) Onana o jọ bẹbẹ kẹ omẹ keme mẹ jẹ hai su ọzae mẹ, yọ uruemu nana o reria omẹ obọ no. Mẹ lẹ se Jihova re o fi obọ họ kẹ omẹ. O rehọ etoke jọ re mẹ sai nwene uruemu nana, rekọ ẹmẹrera na, me te ti nwene je zihe ruọ emamọ aye kẹ ọzae mẹ.

Nọ ọzae mẹ ọ ruẹ nọ me nwene no, u te gbei unu. Vẹre, o wo isiuru kpahe Ebaibol ho. Rekọ nọ mẹ gbaemu inọ mẹ rẹ siọ ivovavovo ba, ọ tẹ ta nọ: “Whọ tẹ siọ ivovavovo ba, mẹ te rọwo nọ a wuhrẹ Ebaibol na kugbe omẹ!” Mẹ aviẹ ma siọ ivovavovo ba ẹdọvo na.

IRERE NỌ ME WO NO: Ọzae mẹ o ru eyaa riẹ gba, a te muọ uwuhrẹ Ebaibol họ kugbei. Enẹna, ma be hai se Ebaibol na kugbe kẹdẹ kẹdẹ, roro didi kpahe eware nọ ma se, jẹ be daoma fi ehrẹ na họ iruo evaọ uzuazọ mai.

Mẹ sae ruẹ unu gbiku ẹnyaharo nọ uviuwou mẹ u wo no ho, kabikọ irere nọ i te omẹ omamẹ no. Me yere Jihova nọ o ro si omẹ kẹle omariẹ. (Jọn 6:44) Me yere oniọvo-ọmọtẹ mẹ re fikinọ o vuomẹ wa ha. Mẹ ruẹ vuhumu no inọ Ebaibol na o re gine nwene uzuazọ ohwo.

[Ẹme nọ a fi ẹgba họ nọ ọ rrọ ẹwẹ-obe avọ 11]

Me vuhumu inọ enẹna họ oke nọ me re ro fi eware nọ me bi wuhrẹ na họ iruo

[Ẹme nọ a fi ẹgba họ nọ ọ rrọ ẹwẹ-obe avọ 13]

Odiri gbe uyoyou nọ oniọvo-ọmọtẹ mẹ o dhesẹ kẹ omẹ i ru nọ mẹ rọ rọwo uwhremu na inọ a wuhrẹ Ebaibol kugbe omẹ