Wuhrẹ No Ẹme Ọghẹnẹ Ze

Eme Họ Emamọ Usi na Kpahe Egagọ?

Uzoẹme nana u dhunu te enọ jọ nọ o rẹ sae jọnọ whọ nọ no ẹdẹjọ, u te je dhesẹ oria nọ whọ rẹ sae jọ ruẹ iyo na evaọ Ebaibol ra. O te were Isẹri Jihova re a lele owhẹ ta ẹme kpahe iyo na.

1. Kọ egagọ kpobi Ọghẹnẹ ọ jẹrehọ?

Whọ rẹ jọ egagọ buobu ruẹ ahwo nọ a ginẹ gwọlọ ru Ọghẹnẹ eva were. Ọghẹnẹ ọ be ruẹ ahwo otiọye na, yọ ọ be sẹro rai. Rekọ u yoma gaga inọ ahwo jọ a be rehọ odẹ egagọ ru umuomu. Evaọ oke nọ u kpemu, isu egagọ a tube gboja kẹ ewegrẹ rai dede. (2 Ahwo Kọrint 4:3, 4; 11:13-15) Nẹnẹ, iyẹrẹ nọ ma bi yo i bi dhesẹ nọ isu egagọ jọ a be tuduhọ ahwo awọ re a ru ozighi hayo dhomahọ ẹmo-ofio, yọ isu egagọ na jọ dede a be gba emaha du.—Se Matiu 24:3-5, 11, 12.

Ebaibol o wuhrẹ nọ egagọ ivẹ eriẹ, eye họ egagọ uzẹme gbe egagọ erue. Egagọ erue i bi wuhrẹ ahwo uzẹme na kpahe Ọghẹnẹ hẹ. Rekọ Jihova Ọghẹnẹ ọ gwọlọ nọ ahwo a riẹ uzẹme na kpahe ọyomariẹ.—Se 1 Timoti 2:3-5.

2. Eme họ emamọ usi na kpahe egagọ?

Ọghẹnẹ ọ gwọlọ nọ ahwo a siomano egagọ nọ e be ta nọ a you ọyomariẹ rekiyọ a bi wuhrẹ uzẹme na kpahe iẹe he, jẹ be viẹ ahwo họ. Uzẹme riẹ họ, o rẹ were ahwo nọ e rrọ egagọ itieye na re a mu usu kugbe akpọ nana nọ Setan Ẹdhọ na o bi su na. (Jemis 4:4; 1  Jọn 5:19) Ebaibol na ọ rehọ egagọ nọ e be tha isuẹsu ahwo-akpọ uke je bi kiuke ku esuo Ọghẹnẹ dhesẹ ogberẹ. Ebaibol o se ogberẹ nana “Babilọn ologbo na,” keme okpẹwho Babilọn oke anwae họ oria nọ egagọ erue i muhọ no ze nọ ẹvo edẹ Noa ọ nwani ku vrẹ no. Kẹle na, Ọghẹnẹ ọ te raha egagọ kpobi nọ e be viẹ ahwo họ no.—Se Eviavia 17:1, 2, 5, 17; 18:8, 23, 24.

  3. Ẹvẹ Ọghẹnẹ o ti ro ru ahwo otọakpọ na kpobi ghọghọ?

Emamọ usi o rrọ inọ kẹle na, Ọghẹnẹ ọ te raha egagọ erue kpobi no. U ti ru nọ ahwo-akpọ kpobi a ti ro wo ufuoma no okienyẹ. Egagọ erue e gbẹ te viẹ ahwo họ hayo fi ohẹriẹ họ udevie ahwo-akpọ vievie he. Ahwo kpobi nọ a te rria otọakpọ na a te rọ okugbe gọ Ọghẹnẹ uzẹme ọvo na.—Se Aizaya 11:9; Eviavia 18:20, 21; 21:3, 4.

4. Eme u fo nọ ahwo evezi a re ru enẹna?

Ahwo evezi nọ e rrọ egagọ erue sa-sa evaọ akpọ na soso, a re thọrọ Ọghẹnẹ ẹro ho. O bi koko ahwo itieye na họ enẹna re a jọ okugbe ọvo je bi wuhrẹ ae uzẹme na.—Se Maeka 4:2, 5.

Jihova o re dede ahwo kpobi nọ a gwọlọ gọe rehọ ziọ uviuwou riẹ. O tẹ make rọnọ eva e rẹ kake dha ahwo uviuwou gbe egbẹnyusu mai fikinọ ma salọ nọ ma be gọ Jihova, ma ti wo irere buobu ma gbe siuke kpemu hu. Ma ti wo usu okpekpe kugbe Ọghẹnẹ, kuomagbe uviuwou ọkpokpọ nọ o rrọ yoyou, gbe ẹruore ewo uzuazọ ebẹdẹ bẹdẹ.—Se Mak 10:29, 30; 2 Ahwo Kọrint 6:17, 18.

Re whọ gbẹ riẹ kpahe ẹme nana, rri uzou avọ 15 gbe orọ avọ 16 ọrọ obe nana, Eme Ebaibol na O Gine Wuhrẹ? onọ Isẹri Jihova a kere.

[Ọnọ o wo uwoho nọ o rrọ ẹwẹ-obe avọ 24]

The Complete Encyclopedia of Illustration/J. G. Heck