Wuhrẹ No Ẹme Ọghẹnẹ Ze

Fikieme Ileleikristi A Jẹ Họ-Ame?

Uzoẹme nana u dhunu te enọ jọ nọ o rẹ sae jọnọ whọ nọ no ẹdẹjọ, u te je dhesẹ oria nọ whọ rẹ sae jọ ruẹ iyo na evaọ Ebaibol ra. O te were Isẹri Jihova re a lele owhẹ ta ẹme kpahe iyo na.

1. Eme u dhesẹ re Oleleikristi ọ họ-ame?

Ame-ọhọ yọ edhere nọ ohwo ọ rẹ rọ yare Ọghẹnẹ inọ ọ gwọlọ jọ ogbẹnyusu riẹ. Fikiere, u fo re Oleleikristi ọ họ-ame, orọnikọ okenọ ọ gbẹ rrọ ọmaha ha, rekọ nọ ọ tẹ kpako te ohwo nọ ọ rẹ sai wuhrẹ kpahe Ọghẹnẹ jẹ jọ olele Jesu no. (Iruẹru Ikọ Na 8:12; 1 Pita 3:21) Ma rẹ jọ ilele Jesu, otẹrọnọ ma bi wuhrẹ je bi ru eware nọ ọ ta.—Se Matiu 28:19, 20.

Evaọ okenọ ilele Jesu a jọ otọakpọ, ahwo buobu a jowọ ababọ okioraha inọ a re wuhrẹ kpahe Ọghẹnẹ avọ Jesu. Wọhọ oriruo, nọ ọzae jọ ọ ruẹ vuhumu nọ ẹkwoma uwhu Jesu ahwo a ti ro wo esiwo, o te kurẹriẹ je muọ Ọghẹnẹ họ ẹgọ. Nẹnẹ, ahwo evezi buobu a salọ no inọ a rẹ jọ ilele Jesu.—Se Iruẹru Ikọ Na 8:26-31, 35, 36, 38.

2. Fikieme Jesu ọ rọ họ-ame?

Oware wọhọ ikpe 30 Jesu ọ jọ, nọ Jọn Ọhọahwo-Ame na ọ rọ họe ame evaọ Ethẹ Jọdan. Ame-ọhọ Jesu o dhesẹ nọ u no rie eva ze re o ru oreva Ọghẹnẹ. (Ahwo Hibru 10:7) Onana u dhesẹ uzuazọ riẹ nọ o ti ro dheidhe fiki izieraha ahwo-akpọ. Makọ taure o te no odhiwu ze te rria obọ otọakpọ obonẹ, Jesu o you Jihova Ọsẹ riẹ, yọ o je yo ẹme kẹe ẹsikpobi.—Se Mak 1:9-11; Jọn 8:29; 17:5.

  3. Fikieme Oleleikristi ọ jẹ họ-ame?

Mai ahwo-akpọ ma wo ohẹriẹ no Jesu, keme a yẹ omai avọ uzioraha. Ghele na, uwhu Jesu u ru rie lọhọ nọ ma sai ro wo usu kugbe Ọghẹnẹ. (Ahwo Rom 5:10, 12; 12:1, 2) U gine ru ei lọhọ nọ ma sae rọ jọ ahwo uviuwou Ọghẹnẹ. (2 Ahwo Kọrint 6:18) Ẹvẹ ma sai ro wo uvẹ-ọghọ yena tobọ? Evaọ olẹ omobọ-mai, ma rọ oma mai mudhe kẹ Jihova, jẹ ya eyaa inọ ma gwọlọ ru oreva riẹ evaọ edẹ uzuazọ mai kpobi. Nọ ma rọ oma mai mudhe no, ma tẹ rọ ame-họ dhesẹ iẹe via evaọ ẹgbede.—Se Matiu 16:24; 1 Pita 4:2.

4. Ẹvẹ whọ sae rọ ruẹrẹ oma kpahe kẹ ame-ọhọ?

Isẹri Jihova a re wuhrẹ Ebaibol kugbe ohwo kpobi nọ ọ gwọlọ si kẹle Ọghẹnẹ. Nọ who te bi wuhrẹ Ebaibol na je bi kpohọ iwuhrẹ ukoko mai, u ti ru uyoyou nọ who wo kẹ Ọghẹnẹ diwi viere jẹ bọ ẹrọwọ nọ who fihọ iẹe ga. Onana u ti fi obọ họ kẹ owhẹ wo emamọ iruemu re. Whọ tẹ be daoma ru uyoyou, ẹrọwọ, gbe iruemu ezi efa ra diwi viere, u ti fi obọ họ kẹ owhẹ ru eyaa nọ whọ rọ gwọlọ gọ Jihova bẹdẹ bẹdẹ gba.—Se Jọn 17:3; Ahwo Hibru 10:24, 25.

[Uwoho nọ o rrọ ẹwẹ-obe avọ 15]

Re whọ gbẹ riẹ kpahe ẹme nana, rri uzou avọ 18 orọ obe nana, Eme Ebaibol na O Gine Wuhrẹ? onọ Isẹri Jihova a kere.