Wuhrẹ No Ẹme Ọghẹnẹ Ze

Fikieme Ma bi ro Se Odẹ Ọghẹnẹ je bi Ru re Amọfa A Riẹ Odẹ Na?

Uzoẹme nana u dhunu te enọ jọ nọ o rẹ sae jọnọ whọ nọ no ẹdẹjọ, u te je dhesẹ oria nọ whọ rẹ sae jọ ruẹ iyo na evaọ Ebaibol ra. O te were Isẹri Jihova re a lele owhẹ ta ẹme kpahe iyo na.

1. Fikieme Ọghẹnẹ ọ rọ kẹ omariẹ odẹ?

Ababọ avro o rẹ were owhẹ re a rọ odẹ-oma ra se owhẹ, viukpenọ a rẹ rọ odẹ-ova wọhọ “ọzae na,” “ọga,” “madamu,” hayo “aye na” se owhẹ. Odẹ u re ru nọ ahwo a sai ro vuhu owhẹ ziezi. Ọghẹnẹ o wo edẹ-ova wọhọ “Ọnowo ỌGHẸNẸ,” “Ọghẹnẹ Erumeru,” gbe “ọnọ ọ ma.” (Emuhọ 15:2; 17:1; Ọtausiuwoma Na 12:1) Rekọ Ọghẹnẹ ọ kẹ omariẹ odẹ nọ u re fi obọ họ kẹ omai mu usu okpekpe kugbei. Lele epanọ a fa odẹ na no Oyibo ze, evaọ ẹvẹrẹ Isoko, a be hai sei Jihova. Ọghẹnẹ ọ jọ Ebaibol na ta nọ: “Mẹ họ Jihova. Oye họ odẹ mẹ.”—Aizaya 42:8, NW.

Dede nọ efefafa buobu nọ e fa Ebaibol sa-sa a si odẹ-oma Ọghẹnẹ no eria nọ o jọ romavia evaọ Ebaibol na jẹ rọ edẹ-ova wọhọ “Ọghẹnẹ” gbe “Olori” ro nwene iei, odẹ na Jihova o romavia bu te enwenọ isia idu ihrẹ (7,000) evaọ iko-ebe Hibru anwae nọ a kaki ro kere Ebaibol na. U muẹro inọ Ọghẹnẹ ọ gwọlọ nọ ahwo a riẹ odẹ riẹ.—Se Aizaya 12:4.

2. Fikieme u ro wuzou re ma riẹ odẹ Ọghẹnẹ?

Re ma riẹ epanọ a re se odẹ Ọghẹnẹ ọvo họ oware nọ u dhesẹ hẹ re ma riẹ odẹ na. Re ma ginẹ riẹ odẹ Ọghẹnẹ, u dhesẹ nọ ma re wo usu okpekpe kugbei. Otofa odẹ Jihova họ, “Ọnọ O re Ru Zihe Ro.” Otofa odẹ na o kẹ omai imuẹro inọ Ọghẹnẹ ọ rẹ sai ru oware kpobi nọ u je riẹ re ọ sai ru ẹjiroro riẹ gba. Fikiere, re ma riẹ odẹ Ọghẹnẹ u dhesẹ nọ ma rẹ rọwo inọ o ti ru eyaa riẹ gba. (Olezi 9:10) Ẹrọwọ nọ ahwo nọ a riẹ odẹ Ọghẹnẹ a wo o rẹ wọ ai fi eva họ iẹe, jẹ rọ oreva riẹ uruo karo evaọ uzuazọ rai. Jihova Ọghẹnẹ ọ rẹ thọ ahwo otiọye na.—Se Olezi 91:14.

  3. Fikieme Ọghẹnẹ ọ rọ gwọlọ nọ ahwo a riẹ odẹ riẹ?

Ọghẹnẹ ọ gwọlọ nọ ahwo a riẹ odẹ riẹ, keme oyena o rẹ kẹ ae erere. U re fi obọ họ kẹ ai zihe ruọ egbẹnyusu Ọghẹnẹ, je wo uzuazọ ebẹdẹ bẹdẹ. Agbẹta nọ Jihova ọ rọ gwọlọ nọ ma ru re amọfa a riẹ odẹ riẹ na.—Se Jọn 17:3; Ahwo Rom 10:13, 14.

Jesu o ru ahwo riẹ odẹ Ọghẹnẹ evaọ okenọ o je wuhrẹ ahwo na kpahe idhere Ọghẹnẹ, izi riẹ, gbe eyaa riẹ. Nẹnẹ, ilele Jesu a gbe bi wuhrẹ ahwo kpahe odẹ Ọghẹnẹ evaọ erẹwho na kpobi. A be rọ okugbe ru iruo na evaọ “isẹri ise kẹ odẹ [Ọghẹnẹ].”—Se Iruẹru Ikọ Na 15:14; Jọn 17:26.

4. Oghẹrẹ vẹ Ọghẹnẹ ọ te rọ kẹ odẹ riẹ orro?

Jihova Ọghẹnẹ ọ gwọlọ kẹ odẹ riẹ orro keme a ta odẹ na raha no. Wọhọ oriruo, ahwo jọ a ta nọ Ọghẹnẹ ọ ma eware nọ e rrọ uzuazọ họ, gbe inọ u fo re ma yoẹme kẹe he. Amọfa a ta nọ Ọghẹnẹ ọ be daezọ mai hi gbe inọ ọye ọ be wha uye-oruẹ mai ze. Ahwo otiọye na a be ta odẹ Ọghẹnẹ raha. Rekọ a te ta odẹ na raha bẹdẹ bẹdẹ hẹ. Ọghẹnẹ ọ te raha ahwo kpobi nọ a be raha odẹ riẹ.—Se Olezi 83:17, 18.

Ọghẹnẹ ọ te kẹ odẹ riẹ orro, nọ Uvie riẹ o tẹ raha isuẹsu ahwo-akpọ kpobi jẹ rehọ udhedhẹ gbe omofọwẹ ze no. (Daniẹl 2:44) Kẹle na, ahwo kpobi a te riẹ inọ Jihova họ Ọghẹnẹ uzẹme na.—Se Izikiẹl 36:23; Matiu 6:9.

Eme u fo nọ who re ru enẹna? U fo nọ who si kẹle Ọghẹnẹ ẹkwoma Ẹme riẹ nọ who re wuhrẹ, je kuomagbe ahwo nọ a you Ọghẹnẹ. Okenọ Jihova ọ te kẹ odẹ riẹ orro, ọ te kareghẹhọ idibo riẹ nọ e be rọ eva kpobi gọe.—Malakae 3:16.

Re whọ gbẹ riẹ kpahe ẹme nana, rri uzoẹme 1 orọ obe nana, Eme Ebaibol na O Gine Wuhrẹ? onọ Isẹri Jihova a kere.

[Uwoho nọ o rrọ ẹwẹ-obe avọ 26]

A jọ uko-obe Hibru anwae nana nọ a kere eria Ebaibol jọ fihọ na ruẹ Odẹ Ọghẹnẹ