Kọ Ginọ “Ileleikristi” Kpobi Họ Uvi Ileleikristi?

ẸVẸ ahwo nọ a se oma rai Ileleikristi a bu te? Obe jọ nọ a re se Atlas of Global Christianity u dhesẹ nọ evaọ ukpe 2010, otu nọ o se omarai Ileleikristi a joma bu te ima idu ivẹ gbe ima egba esa (2,300,000,000) evaọ akpọ na soso. Obe na u te je dhesẹ nọ, ahwo nana a rrọ egagọ sa-sa nọ i bu vi idu udhuvẹ gbe ọvo (41,000), yọ a wo ọvuọ izi riẹ gbe iwuhrẹ sa-sa. Fikinọ egagọ Ileleikristi sa-sa i bu thesiwa, o wha riẹ ze nọ ofu o bi ro dhe ahwo jọ, tube t’epanọ a gbẹ be riẹ onọ a re ru hu. O tẹ be lẹliẹ ae nọ inọ, ‘Kọ ahwo nọ a se omarai Ileleikristi kpobi họ uvi Ileleikristi?’

Joma romatotọ rri ẹme na no abọfa ze. O gwọlọ nọ ohwo nọ o bi kpohọ orẹwho ọfa o re dhesẹ omariẹ vevẹ kẹ ohwo egọmeti nọ o bi ru iruo evaọ uwhru orẹwho na. O tẹ jẹ gwọlọ nọ o re dhesẹ obe-udu riẹ nọ ọ sai ro kpohọ orẹwho ọfa re a riẹ sọ ginọ ọye họ ohwo na. Epọvo na, o gwọlọ nọ uvi Oleleikristi ọ rẹ rọ uruemu riẹ dhesẹ nọ ọye ginọ Oleleikristi, orọnikọ ugbunu nọ ọ rẹ rọ tae ọvo ho. O re wo oware ofa jọ nọ a re ro vuhu ei. Eme họ oware yena?

Oke ọsosuọ nọ a rọ rehọ odẹ na “Ileleikristi” se utu ahwo jọ họ, nọ ukpe 44 C.E. o vrẹ no. Luk, ọnọ ọ jọ omọvo enọ i kere Ebaibol na ọ ta nọ: “Evaọ Antiọk a jẹ kaki se ilele na [nọ Ileleikristi, NW].” (Iruẹru Ikọ Na 11:26) Muẹrohọ nọ ahwo nọ a je se Ileleikristi evaọ oke yena yọ enọ e jọ ilele Kristi. Kọ ẹvẹ ohwo ọ sae rọ jọ olele Jesu? Obe-ofeme jọ o ta nọ: “Re ohwo ọ jọ olele Jesu u dhesẹ nọ u re noi eva ze re ọ rọ uzuazọ riẹ kpobi lele iei . . . evaọ edẹ uzuazọ rie kpobi.” Fikiere, uvi Oleleikristi yọ ohwo nọ ọ rẹ rọ unevaze gbe uzuazọ riẹ kpobi ru lele iwuhrẹ gbe ijaje Jesu, ọnọ ọ to egagọ Ileleikristi họ.

Kọ o lọhọ re a jọ udevie ahwo nọ a bi se omarai Ileleikristi nẹnẹ na ruẹ ahwo otiọnana? Eme Jesu omariẹ ọ ta nọ a ti ro vuhu uvi Ileleikristi? Ma tuduhọ owhẹ awọ inọ gbe se haro re whọ ruẹ iyo nọ Ebaibol na ọ kẹ kpahe enọ nana. Evaọ izoẹme nọ e rrọ obaro na, ma te ta kpahe eme isoi jọ nọ Jesu ọ ta, nọ i ti fi obọ họ kẹ omai vuhu uvi ilele riẹ. Ma te jẹ ta kpahe epanọ Ileleikristi ikpe-udhusoi ọsosuọ a ro ru lele eme yena. Kẹsena, ma vẹ te ruẹ ahwo nọ a bi gine ru lele eme yena evaọ usu ahwo nọ i bi se omarai Ileleikristi nẹnẹ na.