“Wha . . . Ria Evaọ Eme Mẹ”

“Wha tẹ ria evaọ eme mẹ, yọ whai ghinọ ilele mẹ, wha rẹ te riẹ uzẹme na, uzẹme na u re ti ru owhai emuyẹ.”—JỌN 8:31, 32.

Oware nọ U Dhesẹ: “Eme” ọ Jesu na họ, iwuhrẹ riẹ nọ o wo no obọ ohwo nọ o kpehru vi ei ze. Jesu ọ ta nọ: “Ọsẹ nọ o vi omẹ, ọye ọ kẹ omẹ [ujaje] onọ mẹ rẹ ta gbe eme oware nọ mẹ rẹ ta.” (Jọn 12:49) Nọ Jesu ọ jẹ lẹ se Jihova Ọghẹnẹ, Ọsẹ obọ odhiwu riẹ, ọ ta nọ: “Ẹme ra uzẹme.” Ẹsibuobu ọ jẹ hai se no Ẹme Ọghẹnẹ ze ovavo rọ tha iwuhrẹ riẹ uke. (Jọn 17:17; Matiu 4:4, 7, 10) Fikiere, uvi Ileleikristi a re ‘ru lele eme riẹ,’ koyehọ, a rẹ jẹ Ebaibol na rehọ, onọ o rrọ Ẹme Ọghẹnẹ inọ yọ “uzẹme,” gbe inọ oye ọvo họ onọ a rẹ rehọ iruẹru gbe iwuhrẹ rai kpobi no ze.

Epanọ Ileleikristi Ikpe-Udhusoi Ọsosuọ A ro Ru Lele Onana: Pọl ukọ na, nọ ọ mai kere ebe bu evaọ Ebaibol na o wo adhẹẹ kẹ Ẹme Ọghẹnẹ wọhọ Jesu. O kere nọ: “Ọghẹnẹ o gie ẹwolo ku ikereakere na kpobi, re e jọ erere.” (2 Timoti 3:16) Ahwo nọ a ro mu evaọ ukoko na re a wuhrẹ ibe Ileleikristi a jẹ hae “yọrọ uzẹme eme nọ [a] wuhrẹ whawha.” (Taitọs 1:7, 9) A tuduhọ Ileleikristi ọsosuọ awọ inọ a whaha ‘eriariẹ ifofe gbe ẹghẹ nọ a sae rọ viẹ ae họ, enọ e rrọ iwuhrẹ ahwo akpọ avọ izi akpọ na, enọ e rrọ erọ Kristi hi.’—Ahwo Kọlọsi 2:8.

Amono A bi Ru Lele Onana Nẹnẹ? Obe nọ a re se Dogmatic Constitution on Divine Revelation nọ a fodẹ evaọ obe ahwo Kathọlik nọ a re se Catechism of the Catholic Church o ta nọ: “Orọnikọ Ikerakere efuafo na ọvo ichọche [Kathọlik] o rehọ iwuhrẹ rai gbe eware kpobi nọ a rọwo no ze he. Fikiere, o gwọlọ nọ a rẹ jẹ iruẹru ichọche na rehọ wọhọ Ikereakere efuafo na jẹ rọ adhẹẹ kẹ ae epọvo na.” Uzoẹme emagazini jọ o ta kpahe ozerẹ ichọche jọ evaọ okpẹwho Toronto, evaọ obọ Canada, nọ ọ nọ inọ: “Fikieme ma rẹ rọ gaviezọ kẹ urru ‘ohwo jọ’ nọ ọ rria anwọ ikpe idu ivẹ nọ i kpemu re eme riẹ e kpọ omai? Ma wo eriariẹ obọ mai nọ e rẹ sae kpọ omai, rekọ ma be sai fi ae họ iruo ho keme kẹse kẹse ma bi roro nọ iwuhrẹ Jesu gbe erọ Ikereakere na e mai woma.”

Obe nọ a re se New Catholic Encyclopedia o ta kpahe Isẹri Jihova inọ: “A rehọ Ebaibol na inọ oye ọvo a rẹ rehọ iwuhrẹ rai kpobi no ze, yọ oye o be kpọ kabọ kabọ uzuazọ rai.” Kẹle na, ọzae jọ evaọ Canada o bru ẹme dhe Osẹri Jihova jọ unu, nọ Osẹri na ọ be gwọlọ dhesẹ omariẹ kẹ ọzae na. Ọzae na ọ ta nọ: “Mẹ riẹ ohwo nọ whọ rrọ, fiki obe nọ o rrọ owhẹ obọ na”; nọ ọzae na ọ be ta ẹme nana yọ ọ be rriẹ obọ rri Ebaibol nọ Osẹri na o kru.