Si Kẹle Ọghẹnẹ

“Who . . . ti Ruwẹ Bru Omẹ Ze”

OMAUROKPOTỌ yọ uruemu nọ o rẹ were ahwo. Oma o rẹ wọ omai re ma si kẹle ahwo nọ a wo omaurokpotọ. Rekọ u yoma gaga inọ, re a ruẹ ahwo nọ a gine wo uvi omaurokpotọ nẹnẹ o rrọ bẹbẹ, maero evaọ udevie ahwo nọ amọfa a rrọ otọ rai. Rekọ ẹvẹ kpahe Jihova Ọghẹnẹ, ọnọ ọ mae rro evaọ ehrugbakpọ na? Kọ o wo omaurokpotọ? Joma kiẹ eme nọ Jerimaya ọruẹaro na o kere riwi, enọ e rrọ obe Enuobro 3:20, 21, NW: “Ababọ avro, whọ te kareghẹhọ who ve ti ruwẹ bru omẹ ze. Onana me ti wo họ iroro ẹsikpobi. Oyejabọ nọ me ti ro thihakọ hẹrẹ.”

Jerimaya o kere obe Enuobro evaọ okenọ eware e jọ bẹbẹ rọkẹ emọ Izrẹl. O kere obe nana nọ ahwo Babilọn a nwane raha Jerusalẹm no, avọ ọkora nọ o da riẹ oma fia. Jerimaya ọruẹaro nọ uweri o da oma fia na ọ riẹ inọ ọraha nọ o te emọ Izrẹl na o fo, keme onana yọ edhere nọ Jihova ọ rọ kẹ ae uye fiki eware iyoma nọ a ru. Kọ onana u dhesẹ nọ Jerimaya o gbe wo ẹruore he? Kọ o je roro nọ Jihova ọ tehe ezọ di, dede nọ emọ izrẹl nọ e jọ ọkora na a kurẹriẹ no? Gaviezọ re who yo eme nọ Jerimaya ọ ta wọhọ ẹsenọ ọ be ta oware nọ o rrọ eva emọ Izrẹl na.

Dede nọ ọkora ọ jọ ahwo buobu oma, Jerimaya o wo ẹruore. O bo se Jihova inọ: “Ababọ avro, whọ te kareghẹhọ who ve ti ruwẹ bru omẹ ze.” (Owọ avọ 20, NW) Jerimaya o wo avro vievie he. Ọ riẹ nọ Jihova o ti gbolo aro kẹ ọyomariẹ hẹ, gbe inọ emọ Izrẹl nọ i kurẹriẹ e te thọrọ Ọghẹnẹ ẹro vievie he. Kọ eme Ọghẹnẹ erumeru na o ti ru?—Eviavia 15:3.

U mu Jerimaya ẹro inọ Jihova o “ti ruwẹ bru” ahwo nọ a gine kurẹriẹ no eva ze. Eme yena i fi obọ họ kẹ omai riẹ inọ Jihova ọ vọ avọ ẹwo. Jihova, ọnọ ọ “mai kpehru” evaọ akpọ na kpobi o ti ruwẹ ze otọ, wọhọ odẹme, kpare ahwo riẹ nọ e be ruẹ uye, jẹ rọ vrẹ ae. (Olezi 83:18) Ẹruore nana nọ Jerimaya o wo na, o lẹle riẹ wo omosasọ ghele ọkora nọ ọ vọ riẹ oma. Jerimaya ọruẹaro na ọ gba riẹ mu inọ o re thihakọ hẹrẹ oke nọ Jihova o fihọ nọ o ti ro siwi idibo riẹ nọ i kurẹriẹ no uye.—Owọ avọ 21.

Eme nọ Jerimaya o kere na i wuhrẹ omai eware ivẹ kpahe Jihova. Orọ ọsosuọ, Jihova o wo omaurokpotọ. (Olezi 18:35) Dede nọ Jihova ọ vọ avọ “ogaga,” u re noi eva ze re o ruwẹ bru omai ze, wọhọ odẹme, re o fi obọ họ kẹ omai nọ ma tẹ rrọ ọkora. (Job 37:23; Olezi 113:5-7) Kọ eme yena e gbẹ sasa owhẹ oma? Orọ avivẹ, Jihova ọ vọ avọ ohrọ-oriọ; ọ rẹ rọ vrẹ erahaizi nọ i kurẹriẹ je wariẹ dede ai rehọ. (Olezi 86:5) Iruemu-aghae yena, omaurokpotọ gbe ohrọ-oriọ e jẹhọ ohwohwo.

Eva e rẹ were omai gaga inọ Jihova ọ wọhọ isu ahwo-akpọ họ, enọ i wo omorro je bi gbolo aro kẹ ahwo nọ a rrọ otọ rai. Kọ oma o gbẹ be wọ owhẹ re who gbe wuhrẹ kpahe Ọghẹnẹ omaurokpotọ nana, ọnọ ọ rẹ rọ unevaze “ruwẹ” ze otọ re o fi obọ họ kẹ enọ e be gọe evaọ oke uye?

[Ẹme nọ a fi ẹgba họ nọ ọ rrọ ẹwẹ-obe avọ 22]

U re no Jihova eva ze re o ruwẹ bru omai ze, wọhọ odẹme, re o fi obọ họ kẹ omai nọ ma tẹ rrọ ọkora