Wuhrẹ Emọ Ra

Uvou-Uthei O Wha Uye Se Gehazi

KỌ ẹdẹjọ o jariẹ nọ urru oware jọ u je si owhẹ, yọ whọ gwọlọ nọ who re woi tobọ?— * O tẹ rrọ ere, kiyọ whọ wọhọ ahwo buobu. Kọ u fo re whọ ta ọrue fikinọ whọ gwọlọ wo oware na tobọ?— Ijo, u fo vievie he. Ohwo nọ o re ru ere yọ o bi thei-uvou. Jọ ma ta ẹme kpahe epanọ uvou-uthei o rọ wha uye se ọzae jọ nọ a re se Gehazi. Ọ jọ odibo Elaesha, ọruẹaro Jihova, Ọghẹnẹ uzẹme na.

Elaesha avọ Gehazi a rria oke krẹkri nọ u kpemu, oware wọhọ ikpe odu ọvo taure a te ti yẹ Jesu. Jihova ọ rehọ Elaesha ru eware igbunu buobu. Wọhọ oriruo, Ebaibol na o ta kpahe ọzae jọ nọ o wo ekpehre ẹyao jọ nọ a re se oti, yọ ọzae nana họ osu ogbaẹmo ahwo Siria. Ohwo ọvuọvo ọ sai siwi ẹyao riẹ na ha, rekọ Elaesha o siwi rie.

Nọ Ọghẹnẹ ọ tẹ rehọ Elaesha siwi ẹyao no ahwo oma, o re mi ugho nọ a kẹ riẹ vievie he. Kọ whọ riẹ oware nọ o soriẹ?— Keme Elaesha ọ riẹ nọ obọ Jihova eware igbunu nọ o bi ru na i no ze, orọnikọ obọ ọyomariẹ hẹ. Nọ Elaesha o siwi oti Neaman ohwo Siria na no, eva e were Neaman gaga, te epanọ ọ rọ gwọlọ nọ ọ rẹ kẹ Elaesha ekẹ, wọhọ igoru, isiliva, gbe iwu. Elaesha ọ rọwo mi ei oware ovo ho, rekọ Gehazi ọ gwọlọ nọ o re wo ekẹ nana tobọ.

Nọ Neaman o je zihe kpo, Gehazi ọ tẹ be dhẹ lele iei, ababọ Elaesha nọ ọ ta kẹ. Kọ whọ riẹ oware nọ Gehazi ọ vuẹ Neaman evaọ okenọ o tei oma no?— Ọ vuẹ riẹ nọ, ‘Elaesha o vi omẹ bru owhẹ ze re mẹ vuẹ owhẹ inọ erara ivẹ e kpahe riẹ obọnana. Ọ gwọlọ nọ whọ kẹ omẹ iwu ivẹ re ọ rehọ ae kẹ erara na.’

 Rekọ ọrue o gu na. Gehazi ọvo ọ jọ udu riẹ roro kpahe ọrue nana nọ o gu na. O gu ọrue nana, keme ọ gwọlọ nọ o re wo iwu nọ Neaman ọ jẹ kẹ Elaesha na. Rekọ Neaman ọ riẹ nọ ọrue Gehazi o bi gu na ha. Fikiere, avọ evawere, ọ tẹ kẹ Gehazi eware nọ ọ yare na. Neaman ọ tubẹ kẹ Gehazi eware bu vi epanọ ọ yare. Kọ whọ riẹ oware nọ o via uwhremu na?—

Nọ Gehazi o zihe ze no, Elaesha ọ tẹ nọe inọ: ‘Bovẹ whọ rrọ anwẹsiẹ?’

Gehazi o te yo nọ: ‘Oria ovo ho.’ Rekọ Jihova ọ vuẹ Elaesha oware kpobi nọ Gehazi o ru no. Fikiere, Elaesha ọ tẹ ta kẹ Gehazi nọ: ‘Onana o rrọ oke nọ a rẹ rọ rehọ igho gbe iwu hu.’

Gehazi ọ rehọ igho gbe iwu nọ e rrọ eriẹ hẹ. Fikiere, Ọghẹnẹ o te ru re oti Neaman o ruọ Gehazi oma. Eme who roro nọ ma rẹ sai wuhrẹ no onana ze?— Oware jọ nọ ma wuhrẹ noi ze họ, u fo ho re ma jọ udu mai roro kpahe ọrue nọ ma re gu.

Fikieme Gehazi ọ rọ jọ udu riẹ roro kpahe iku ọrue?— Fikinọ Gehazi o wo uvou-uthei. Ọ gwọlọ wo eware nọ e rrọ eriẹ hẹ, yọ o gu ọrue re ọ ruẹsi wo ai tobọ. Fiki ọrue nana nọ o gu na, ọ re-oja ekpehre ẹyao bọwo ẹdẹ nọ o ro whu.

Evaọ uzẹme, Gehazi ọ ruẹ uye oware jọ nọ u yoma vi oti nọ u te riei oma na. Kọ whọ riẹ oware yena?— Oye họ aruoriwo Ọghẹnẹ nọ o kufiẹ na, Ọghẹnẹ o gbe you rie he. Ajọ ma ru oware ovuovo nọ o rẹ lẹliẹ omai ku aruoriwo Ọghẹnẹ fiẹ hẹ. Ukpoye, joma jọ wowou, u ve je no omai eva ze re ma rọ eware nọ ma wo ro fi obọ họ kẹ amọfa.

Jọ Ebaibol ra se

2 Ivie 5:5, 20-27; Jud 21

Jọn 15:10

[Oruvẹ-obotọ]