Kọ whọ gwọlọ riẹ uzẹme na kpahe oghẹrẹ ohwo nọ Ọghẹnẹ ọ rrọ, gbe oreva riẹ? Jihova ọ jọ Ebaibol na rovie uzẹme na via kpahe omariẹ. Rekọ orọnọ ohwo kpobi o re se Ebaibol na ọ vẹ sai wo otoriẹ uzẹme yena ha. Fikieme? Keme re ohwo o wo otoriẹ uzẹme Ebaibol yọ uvẹ-ọghọ ulogbo, yọ orọnikọ ohwo kpobi ọ rẹ sai woi tobọ họ. Joma ta kpahe oware nọ Jesu ọ ta kpahe onana.—Se Matiu 11:25.

Enẹ oria Ebaibol yena u ro muhọ: “Ezi ọyena Jesu [o] te bo nọ.” Fikiere, o wọhọ nọ oware jọ nọ o nwane via no obọ o lẹliẹ Jesu ta eme nọ i lele i rie na. O re nwani kri nọ ọ rọ whọku ahwo nọ e jọ ikpewho esa Galili jọ họ, eria nọ o jo ru iruo igbunu buobu, rekiyọ a rọwo kurẹriẹ hẹ. (Matiu 11:20-24) Whọ rẹ sae nọ inọ, ‘Ẹvẹ ohwo ọ rẹ ruẹ iruo igbunu nọ Jesu o ru rekiyọ o re kurẹriẹ hẹ?’ Fiki udu ogaga hayo eva iyoma nọ ahwo na a wo, oye o soriẹ nọ a gbe ro kurẹriẹ hẹ na.—Matiu 13:10-15.

Jesu ọ riẹ nọ re ma sae riẹ uzẹme na kpahe Ọghẹnẹ rọwokugbe epanọ o rrọ Ebaibol, o gwọlọ eware ivẹ mi omai: obufihọ Ọghẹnẹ gbe emamọ eva. Jesu ọ ta nọ: “Ọsẹ Ọnowo odhiwu gbe akpọ, me yere owhẹ, epanọ who si eware enana no dhere iwoareghẹ gbe enọ e riẹ, whọ tẹ rehọ ae via kẹ emọ efofa.” Kọ whọ gbẹ ruẹ oware nọ ma rọ ta nọ re ohwo ọ sai wo otoriẹ uzẹme Ebaibol na yọ uvẹ-ọghọ ulogbo? Jihova o wo udu nọ o re ro dhesẹ uzẹme na kpahe omariẹ kẹ ahwo nọ u je rie, keme ọye họ “Ọnowo odhiwu gbe akpọ.” Rekọ orọnikọ Ọghẹnẹ ọ rẹ salọ ahwo jọ dhesẹ uzẹme na kẹ hẹ, rekọ ohwo kpobi ọ rẹ sae riẹ uzẹme na kpahe iẹe. Kọ fikieme ọ be rọ kuọ uzẹme na dhere no ahwo jọ o ve rovie via kẹ amọfa?

Ahwo nọ a wo omaurokpotọ a rẹ were Jihova, rekọ o mukpahe ahwo nọ a wo omorro. (Jemis 4:6) Ọ rẹ kuọ uzẹme na dhere no “iwoareghẹ gbe enọ e riẹ,” koyehọ ahwo nọ a bi roro nọ a wo areghẹ je wo eriariẹ gbe nọ a gwọlọ obufihọ ovo mi Ọghẹnẹ hẹ. (1 Ahwo Kọrint 1:19-21) Rekọ o re rovie uzẹme na via kẹ “emọ efofa,” koyehọ ahwo nọ e rọ unevaze nyaze te gọe je bi dhesẹ omaurokpotọ wọhọ emaha. (Matiu 18:1-4; 1 Ahwo Kọrint 1:26-28) Jesu o muẹrohọ ẹko ahwo ivẹ nana evaọ okenọ ọ jọ otọakpọ. Isu egagọ nọ e vọ avọ omorro jẹ riẹ ikpebe, a sai wo otoriẹ oware nọ Jesu o je wuhrẹ hẹ, rekọ ikuori gheghe a wo otoriẹ eware na. (Matiu 4:18-22; 23:1-5; Iruẹru Ikọ Na 4:13) Ghele na, ahwo jọ nọ a maki fe jẹ riẹ obe gaga a zihe ruọ ilele Jesu fikinọ a wo omaurokpotọ.—Luk 19:1, 2, 8; Iruẹru Ikọ Na 22:1-3.

Joma zihe kpohọ onọ nọ ma ro mu uzoẹme nana họ na: Kọ whọ gwọlọ riẹ uzẹme na kpahe oghẹrẹ ohwo nọ Ọghẹnẹ ọ rrọ? O tẹ rrọ ere, o te were owhẹ re whọ riẹ nọ Ọghẹnẹ o re rovie uzẹme na kẹ ahwo nọ a bi se omarai iwoareghẹ akpọ nana ha. Rekọ o re rovie ei kẹ ahwo nọ iwoareghẹ akpọ nana a rri vo. Whọ tẹ be rọ emamọ eva wuhrẹ Ẹme Ọghẹnẹ, whọ te jọ usu ahwo nọ Ọghẹnẹ o ti rovie uzẹme na kpahe ọyomariẹ kẹ. Who te wo otoriẹ uzẹme yena, o te wha irere se owhẹ enẹna je fi obọ họ kẹ owhẹ wo “uvi uzuazọ” na evaọ obaro, koyehọ uzuazọ ebẹdẹ ebẹdẹ evaọ akpọ ọkpokpọ nọ Ọghẹnẹ ọ ya eyaa riẹ, nọ ọ kẹle no na. *—1 Timoti 6:12, 19; 2 Pita 3:13.