A yẹ omẹ evaọ ẹwho nọ a re se Moundsville, nọ o rrọ akotọ ethẹ nọ a se Ohio. Mẹ họ ọmọ avivẹ evaọ emọ ene nọ ọsẹgboni mẹ a yẹ, emezae esa gbe ọmọtẹ ọvo. Ma jẹ were eva kugbe ohwohwo evaọ uviuwou na. Ọsẹgboni mẹ a je ru iruo gaga re uviuwou na o sae re eva vọ, yọ a you amọfa gaga. Ma nwane jọ edafe he, ghele na ma jẹ yare re ma tẹ re he. Fikinọ ọsẹgboni mẹ yọ Isẹri Jihova, a rọ Ebaibol na wuhrẹ omai no emaha ze.

Rekọ nọ me te ikpe ikpegbọ no, udu mẹ u te muhọ ereghe no eware nọ ọsẹgboni mẹ a wuhrẹ omai na. Mẹ jẹ hae nọ oma mẹ sọ ginọ uzẹme nọ ohwo nọ o lele eware nọ Ebaibol ọ ta ọvo o re yeri emamọ uzuazọ. Mẹ jẹ hai roro nọ re mẹ sai wo evawere, me re ru oware nọ u je omẹ. U kri hi, mẹ tẹ siọ ewuhrẹ ba ẹnya. Inievo ivẹ mẹ a tẹ jẹ raro kele omẹ mu uzou họ eveghe. Ọsẹgboni mẹ a daoma bẹ re a fi obọ họ kẹ omai, rekọ ma gaviezọ kẹ ae he.

Whaọ, ufuoma nọ mẹ jẹ gwọlọ na u fi omẹ họ uye. Ẹdẹjọ nọ me je no isukulu ze, ogbẹnyusu mẹ jọ ọ tẹ kẹ omẹ isigareti re me vovo. Me te mi ei, je vovo iei. No umuo ẹdẹ yena vrẹ, me te mu eware iyoma efa họ eru. Nọ u te oke jọ, me te mu imu egaga họ ẹrehọ, da idi vrẹ oma, jẹ be wọ emetẹ. Nọ oke o be nyaharo na, me te mu imu nọ e ga viere họ ẹrehọ, je tube te epanọ mẹ gbẹ rehọ imu egaga yena ha, oma o rẹ riẹ omẹ ru hu. Me duoma họ uruemu uyoma nana te epanọ me ro mu imu egaga họ ẹzẹ re mẹ sai wo ugho.

Epanọ mẹ daoma te re obruoziẹ-iroro mẹ o siọ omẹ ba ekpokpo, ere o jẹ hai brukpe omẹ te inọ uzuazọ nọ me bi yeri na o thọ. Me je roro nọ epanọ mẹ nya thabọ te no na, mẹ sai gbe kurẹriẹ hẹ. Dede nọ mẹ avọ egbẹnyusu mẹ ma jẹ hai kpohọ eria sa-sa nyae riakpọ kuoma, mẹ jẹ hae jọ goli avọ ọkora nọ ọ d’omẹ oma fia. Evaọ ẹsibuobu nọ mẹ tẹ kareghẹhọ emamọ uzuazọ nọ ọsẹgboni mẹ a bi yeri, o jẹ hae d’omẹ gaga inọ me yo ẹme rai hi.

Dede nọ me je roro nọ mẹ gbẹ te sai kurẹriẹ hẹ, amọfa a roro ere he. Evaọ  ukpe 2000, ọsẹgboni mẹ a tẹ vuẹ omẹ nọ me lele ai kpohọ okokohọ ubrotọ rai. Udu gaga mẹ rọ nya. Nọ mẹ ruẹ inievo ivẹ mẹ nọ e raro kele omẹ no ukoko na nọ e nya re, u te gbe omẹ unu gaga.

Nọ okokohọ na ọ be nyaharo na, mẹ tẹ kareghẹhọ nọ mẹ avọ egbẹnyusu mẹ ma nyaze etenẹ na ti kporo ile evaọ ukpe nọ o vrẹ. Oware nọ mẹ jọ okokohọ na ruẹ, u wo ohẹriẹ gaga no oware nọ mẹ ruẹ evaọ okenọ mẹ avọ egbẹnyusu mẹ ma nyaze ti kporo ile, yọ onana u duobọte omẹ gaga. Evaọ okenọ ma nyai kporo ile na, ma ru oria na fihọ whọhọwhọhọ, avọ isigareti nọ ma je vovo. Ibuobu ahwo na a re rri ohwo ovao ho, yọ u wo oware ovo nọ ohwo ọ rẹ jọ ile na wuhrẹ nọ o rẹ kẹe omosasọ họ. Rekọ evaọ okokohọ na, ahwo na kpobi a jẹ were eva, yọ a whẹtiẹ omẹ họ oma, dede nọ u kri no nọ me ro ghoro se ae ba. Ogege okokohọ na ọ jọ fuafo, yọ eme kpobi nọ a jẹ ta e kẹ omosasọ gaga. Nọ mẹ ruẹ epanọ Ebaibol na o nwene uzuazọ ahwo te, u te bi gbe omẹ unu kpahe oware nọ o lẹliẹ omẹ ghoro no ukoko na.—Aizaya 48:17, 18.

Nọ mẹ nwani no okokohọ na te uwou no, mẹ tẹ jiroro nọ me re zihe ziọ ukoko na. Fiki eware nọ inievo ivẹ mẹ nọ e raro kele omẹ na a ruẹ evaọ okokohọ na, a tẹ jiroro nọ a re zihe ziọ ukoko na re. U kri hi, mai imasa ma tẹ rọwo nọ a wuhrẹ obe kugbe omai.

Oria Ebaibol jọ nọ u duobọte omẹ gaga họ, obe Jemis 4:8, nọ o ta nọ: “Bigba Ọghẹnẹ o re ti bigba owhẹ.” Mẹ tẹ te ruẹ vuhumu nọ re mẹ sai bigba hayo si kẹle Ọghẹnẹ, o gwọlọ nọ me re siobọno iruemu iyoma mẹ. Onana o tẹ whae ze nọ me ro siobọno isigareti ivovo, siọ imu egaga ba ẹrehọ, jẹ whaha idieda thomawa, gbe iruemu iyoma efa.—2 Ahwo Kọrint 7:1.

Me te je si obọ no ikpehre egbẹnyusu nọ me wo vẹre, jẹ jọ ukoko na mu egbẹnyusu ekpokpọ. Ọkpako ukoko nọ o je wuhrẹ obe kugbe omẹ na o fi obọ họ kẹ omẹ gaga re. Ẹsikpobi ọ jẹ hae rọ ifonu se omẹ, yọ ọ tẹ be nya oria mai vrẹ, ọ jẹ hae wẹriẹ re ọ ruẹ omẹ. Rite inẹnẹ na, ogbẹnyusu ẹzi mẹ ọ rrọ.

Evaọ ukpe 2001, mẹ gbe inievo ivẹ mẹ na ma tẹ rọ oma mudhe kẹ Jihova jẹ họ-ame. Ọsẹgboni mẹ gbe oniọvo ọmaha mai nọ ọ raro kele omai hi na, a ghọghọ gaga fikinọ mai ahwo uviuwou na kpobi ma be gọ Jihova kugbe enẹna.

Mẹ jẹ hai roro vẹre nọ izi Ebaibol i keke hrọ, rekọ enẹna mẹ ruẹ vuhumu no nọ e rẹ thọ ohwo. Ebaibol na o fi obọ họ kẹ omẹ siọ imu egaga ba ẹrehọ, yọ mẹ gbẹ be zẹ gbe he, je fi obọ họ kẹ omẹ zihe ruọ emamọ ohwo no.

Enẹna me kuomagbe inievo akpọ-soso mai nọ e be gọ Jihova. Inievo nana a wo uvi uyoyou kẹ ohwohwo, yọ a be rọ okugbe gọ Ọghẹnẹ. (Jọn 13:34, 35) Mẹ jọ usu inievo nana wo oghale ulogbo jọ, oye họ Adrianne, aye mẹ, ọnọ me you gaga. Mẹ aviẹ ma be rọ oghọghọ gọ Ọghẹnẹ uzẹme na kugbe.

Ukpenọ mẹ rẹ rọ uzuazọ mẹ le eware akpọ, mẹ be rọ oke mẹ kpobi wuhrẹ ahwo epanọ a sai ro wo erere no Ẹme Ọghẹnẹ ze. Usiuwoma nọ mẹ be ta oke-kpobi o be mae kẹ omẹ evawere. Mẹ rẹ sae ginẹ ta nọ Ebaibol na o nwene uzuazọ mẹ no. Enẹna me wo ufuoma no.