A yẹ omẹ evaọ okpẹwho Santo Domingo, Dominican Republic, yọ mẹ họ ubreyẹ evaọ emọ ene nọ ọsẹgboni mai a yẹ. Ọsẹgboni mai a kpohọ isukulu ziezi, yọ a gwọlọ nọ a rẹ yọrọ omai emọ na evaọ emamọ okegbe. Ikpe ene taure a te ti yẹ omẹ, ọsẹgboni mai a tẹ nyaku imishọnare egagọ Mormon. Fiki oghẹrẹ nọ imishọnare na a gọ ẹgọ gbe oghẹrẹ uruemu nọ a dhesẹ, ọsẹgboni mai a tẹ jiroro nọ uviuwou mai u re kuomagbe egagọ Mormon, re o jọ uviuwou ọsosuọ nọ o kaki kurẹriẹ ruọ egagọ yena evaọ okegbe nọ ma jẹ rria na.

Nọ mẹ be rro ze na, arozaha nọ a jẹ hae jọ ichọche na ru e jẹ were omẹ gaga, yọ eme nọ a jẹ hae ta kpahe uzuazọ uviuwou gbe emamọ uruemu, e jẹ were omẹ re. Oma o jẹ were omẹ nọ mẹ rọ egagọ Mormon, fikiere me te ru ei họ utee mẹ re mẹ jọ imishọnare ichọche na.

Nọ mẹ jọ ikpe ikpegberee, uviuwou mai o tẹ kua kpobọ America re mẹ sae jọ obei kpohọ isukulu ilogbo. Nọ oware wọhọ ukpe ọvo o vrẹ no, oniọvo oni mẹ avọ ọzae riẹ nọ e rrọ Isẹri Jihova a tẹ nyaze te ruẹ omai evaọ ubrotọ Florida. A te zizie omai kpohọ okokohọ ologbo rai. Eva e were omẹ gaga nọ mẹ ruẹ ahwo na kpobi nọ a bi rovie Ebaibol lele oruẹme na je bi kere eware fihotọ. Fikiere mẹ tẹ yare oniọvo jọ re ọ kẹ omẹ obe avọ ebairo, re me kere ẹkẹ mẹ.

Nọ okokohọ na o kuhọ no, oniọvo oni mẹ avọ ọzae riẹ a tẹ ta kẹ omẹ nọ, nọ o rọnọ mẹ gwọlọ jọ imishọnare na, a ti fi obọ họ kẹ omẹ riẹ eware jọ kpahe Ebaibol na. Ẹme yena ọ were omẹ gaga keme mẹ riẹ oware ovo kpahe Ebaibol na wọhọ epanọ mẹ riẹ kpahe obe egagọ Mormon họ.

Nọ oniọvo oni mẹ avọ ọzae riẹ a jẹ jọ ifonu wuhrẹ Ebaibol na kugbe  omẹ, a jẹ hae tuduhọ omẹ awọ re mẹ rehọ eware nọ mẹ be jọ egagọ Mormon wuhrẹ na wawọ oware nọ Ebaibol na o gine wuhrẹ. A gwọlọ nọ mẹ ọvo mẹ kiẹ oware nọ Ebaibol na o gine wuhrẹ via.

Eware buobu e riẹ nọ mẹ jọ egagọ Mormon wuhrẹ, rekọ evaọ oke yena u mu omẹ ẹro ho sọ Ebaibol na o ginẹ rọwokugbe eware yena. Oniọvo oni mẹ o te vi Awake! ọ November 8, 1995 se omẹ, onọ Isẹri Jihova a kere, yọ izoẹme jọ evaọ Awake! nana e ta kpahe egagọ Mormon. U gbe omẹ unu gaga inọ mẹ re riẹ eware buobu kpahe egagọ nana nọ mẹ rrọ na ha. Onana o wha riẹ ze nọ mẹ rọ nyae jọ oria-evuẹ Itanẹte Mormon kiẹ sọ eware nọ a kere fihọ Awake! na ginọ uzẹme. Nọ mẹ kie via no, mẹ tẹ ruẹ nọ ginọ uzẹme, yọ mẹ ruẹ imuẹro efa evaọ okenọ me kpohọ oria nọ a rẹ jọ sẹro eware anwae evaọ ubrotọ Utah.

Mẹ jẹ hai roro vẹre nọ obe egagọ Mormon avọ Ebaibol na e rọwokugbe. Rekọ nọ me mu Ebaibol na họ ese ziezi no, mẹ tẹ ruẹ nọ kpakọ eware nọ ebe ivẹ na i wuhrẹ e rọwokugbe he. Wọhọ oriruo, Ebaibol ọ jọ obe Izikiẹl 18:4 (NW), ta nọ, ẹwẹ na o re whu. Rekọ obe egagọ Mormon o jọ Alma 42:9, ta nọ: “Ẹwẹ na o re whu vievie he.”

U te no iwuhrẹ na nọ e rọwokugbe he no, ofu o je dhe omẹ re fikinọ egagọ Mormon e jẹ ta ewoma họ erẹwho jọ siọ efa ba. Wọhọ oriruo, egagọ na i wuhrẹ nọ ogba Idẹn na o jọ ẹkwotọ nọ a re se Jackson, Missouri evaọ obọ America. Yọ isu egagọ na a wuhrẹ re nọ “egọmeti America oye Ọghẹnẹ o ti ro su otọakpọ na soso.”

O jẹ hai gbe omẹ unu nọ, kọ eme o te via kẹ erẹwho efa, wọhọ orẹwho mẹ? Evaọ owọwọ ẹdẹjọ nọ ọmọzae jọ nọ ma gbẹ jọ egagọ Mormon, nọ a bi wuhrẹ re ọ jọ imishọnare ọ rọ ifonu se omẹ, mẹ tẹ nọe onọ nana. Mẹ nọ riẹ sọ otẹrọnọ orẹwho riẹ avọ orẹwho ọfa a be họre, o ti kpohọ ẹmo nyae họre ahwo egagọ Mormon efa nọ e rrọ orẹwho yena. Akpọ o gbe omẹ unu nọ ọ ta nọ ọ rẹ nya dẹẹ. Mẹ kiẹ eware efa kpahe egagọ Mormon na, jẹ tubẹ nọ isu egagọ na dede. A ta kẹ omẹ nọ iyo rọkẹ enọ mẹ na yọ eware ididi, nọ me ti wo otoriẹ rai nọ oke o be nyaharo na.

Fikinọ a sae kẹ omẹ iyo nọ e vọ omẹ eva ha, me te bru oma kpiroro, jẹ gwọlọ riẹ oware nọ o be lẹliẹ omẹ roro nọ mẹ rẹ jọ imishọnare egagọ Mormon na. Mẹ ruẹ vuhumu nọ oware nọ o be lẹliẹ omẹ gwọlọ jọ imishọnare na họ, re me fi obọ họ kẹ amọfa. Yọ oware ofa họ, fikinọ me roro nọ ahwo a te kẹ omẹ adhẹẹ. Rekọ uzẹme na họ, mẹ riẹ oware ovo kpahe Ọghẹnẹ hẹ. Dede nọ me se Ebaibol na unuẹse buobu no evaọ oke nọ u kpemu, me se rie gbe odoware ovo ho. Mẹ riẹ kpahe ẹjiroro Ọghẹnẹ kẹ ahwo-akpọ gbe otọakpọ na ha.

Nọ Isẹri Jihova a mu Ebaibol na họ ewuhrẹ kugbe omẹ no, mẹ tẹ te riẹ odẹ Ọghẹnẹ, oware nọ o rẹ via kẹ ahwo nọ a whu no, oghẹrẹ nọ Jesu o bi ro ru ẹjiroro Ọghẹnẹ gba, gbe eware efa. Mẹ tẹ te riẹ kpahe Ebaibol na ziezi, yọ o jẹ were omẹ re mẹ ta kẹ amọfa kpahe eware nọ me bi wuhrẹ. Anwẹdẹ mẹ riẹ nọ Ọghẹnẹ ọ rrọ, rekọ enẹna, mẹ rẹ sae ta ẹme kugbei evaọ olẹ, fikinọ o zihe ruọ ogbẹnyusu mẹ no. Mẹ họ-ame jẹ rọ ere zihe ruọ Osẹri Jihova evaọ July 12, 2004, yọ emerae ezeza nọ i lele i rie, mẹ tẹ rehọ ọkobaro oke-kpobi.

Evaọ ikpe isoi soso, mẹ jọ oria nọ u wuzou egagọ Isẹri Jihova ru iruo evaọ obọ Brooklyn, New York. O jẹ were omẹ gaga fikinọ mẹ jẹ rọ ijini printi Ebaibol gbe ebe efa nọ ima ahwo buobu evaọ akpọ na soso a rẹ sai wo erere no ze, yọ enẹna me gbe bi fi obọ họ kẹ amọfa wuhrẹ kpahe Ọghẹnẹ.