Uyoyou yọ abọdekọ ọjẹfiẹ. Ohwo nọ ọ rrọ yoyou ọ rẹ rọ ẹme gbe uruemu riẹ dhesẹ oghẹrẹ nọ o rri amọfa, o tẹ make rọnọ ere oruo o rẹ rehọ oware jọ mi ei.

Mosis o you Ọghẹnẹ. Evaọ oghẹrẹ vẹ? Kareghẹhọ ẹme nọ ọ rrọ obe 1 Jọn 5:3, nọ o ta nọ: “Uyoyou Ọghẹnẹ ona, nnọ ma re koko ijaje riẹ.” Mosis o koko ijaje Ọghẹnẹ. Mosis o ru oware kpobi nọ Ọghẹnẹ ọ ta kẹe. Dede nọ u re fi uzuazọ ohwo họ ọza re ọ nyae ruẹ Fẹro, Mosis o ru ere nọ Ọghẹnẹ o vi ei bru Fẹro. Yọ o yoẹme kẹ Ọghẹnẹ, makọ evaọ oware osese dede, wọhọ ọkpọ nọ Ọghẹnẹ ọ vuẹ riẹ nọ ọ riẹ rri Abade Ọwawae na. Makọ epanọ uwou nọ Ọghẹnẹ o vi rie o lọhọ hayo ga te kẹhẹ, Mosis o yoẹme. “Ere o ru.”—Ọnyano 40:16.

Mosis o you emọ Izrẹl gaga re. A riẹ nọ Jihova ọ be rọ Mosis su ai, fikiere a jẹ hae nyabru Mosis kẹ ẹbẹbẹ kpobi nọ a wo. Ebaibol ọ ta nọ: “Ahwo na a te mugba kẹ Mosis no ohiohiẹ rite owọwọ.” (Ọnyano 18:13-16) Dai roro epanọ o rẹ rọ oma te nọ Mosis ọ be gaviezọ kẹ ahwo na, nọ ọvuọ ẹbẹbẹ riẹ ọ be ta ze no ohiohiẹ rite owọwọ na. Ghele na, Mosis o fi obọ họ kẹ ahwo na avọ evawere fikinọ o you rai.

U te no ahwo na nọ Mosis ọ jẹ gaviezọ kẹ no, ọ jẹ lẹ kẹ ai re. Ọ tubẹ lẹ kẹ ahwo nọ a ru rie thọ. Wọhọ oriruo, nọ Miriam, oniọvo-ọmọtẹ Mosis ọ go kpahe Mosis, Jihova ọ tẹ rọ ẹyao oti tehe Miriam. Ukpenọ Mosis ọ rẹ ghọghọ fiki onana, ọ tẹ lẹ Ọghẹnẹ kẹe inọ: “Siwi ei, O, Ọghẹnẹ, mẹ lẹ owhẹ.” (Ikelakele 12:13) Uyoyou o wọ Mosis lẹ olẹ yena.

Ma rẹ sae rọ aro kele Mosis nọ ma tẹ rọ eva kpobi you Ọghẹnẹ. Onana o vẹ lẹliẹ omai koko izi riẹ “no eva” ze. (Ahwo Rom 6:17) Nọ ma tẹ be rọ eva hayo udu kpobi yoẹme kẹ Jihova, o rẹ lẹliẹ eva were iẹe. (Itẹ 27:11) O rẹ jẹ wha irere buobu se omai re. Nọ uyoyou o tẹ be wọ omai gọ Ọghẹnẹ, orọnikọ onana o te lẹliẹ omai ru oware ezi ọvo ho, rekọ eva e te were omai nọ ma te bi ru ere.—Olezi 100:2.

Edhere ọfa nọ ma sae rọ rehọ aro kele Mosis họ, nọ ma te bi dhesẹ uyoyou kẹ amọfa. Nọ ahwo uviuwou gbe egbẹnyusu mai a tẹ be ta ebẹbẹ rai kẹ omai, uyoyou o rẹ wọ omai (1) gaviezọ kẹ ai ziezi; (2) wo ororokẹ kẹ ai, hayo rehọ iẹe nọ whẹ oware na o via kẹ; gbe (3) kẹ ai imuẹro nọ a rrọ ghaghae kẹ omai.

Ma rẹ sae lẹ roro amọfa wọhọ epanọ Mosis o ru. Ẹsejọ nọ amọfa a tẹ ta ebẹbẹ rai kẹ omai, ofu ọ rẹ sai dhe omai, nọ ma gbe wo oware ovo nọ ma rẹ sai ru kpahe ae he. Ma rẹ sae ta avọ oma uweri nọ, “Oware nọ mẹ rẹ sai ru kẹ owhẹ kpobi họ, mẹ te lẹ roro owhẹ.” Rekọ kareghẹhọ nọ: “Olẹ ohwo okiẹrẹe u re ru iruo ilogbo.” (Jemis 5:16) Elẹ nọ ma rẹ lẹ roro amọfa e rẹ sae lẹliẹ Jihova ru oware jọ kpahe ebẹbẹ rai, o tẹ make rọnọ ọ hai ti ru ere vẹre he. Fikiere olẹ nọ ma rẹ lẹ roro amọfa yọ oware ulogbo. *

Kọ u gbe mu owhẹ ẹro nọ ma rẹ sai wuhrẹ eware buobu mi Mosis? Dede nọ Mosis yọ ohwo wọhọ omai, o fi emamọ oriruo ẹrọwọ, omaurokpotọ gbe uyoyou họ otọ kẹ omai. Ma tẹ be daoma rọ aro kele oriruo riẹ, o te wha irere buobu se omai gbe amọfa.—Ahwo Rom 15:4.