Omaurokpotọ yọ abọdekọ omorro hayo ababọ oma nọ a rẹ wọ kpehru. Ohwo nọ o wo omaurokpotọ o re rri amọfa nọ a fioka ha ha, yọ ọ rẹ riẹ ọnyaba riẹ.

Mosis ọ wọ oma kpehru fiki ọkwa riẹ hẹ. A tẹ kẹ ohwo ọkwa, ẹsiẹe whọ rẹ rọ riẹ sọ o wo omaurokpotọ. Ọzae jọ nọ a re se Robert G. Ingersoll ọ ta nọ: “Ahwo buobu a rẹ sai thihakọ ẹbẹbẹ. Rekọ whọ tẹ gwọlọ riẹ oghẹrẹ nọ ohwo ọ ginẹ rrọ, kẹe ọkwa.” Mosis o fi emamọ oriruo họ otọ evaọ abọ nana. Evaọ oghẹrẹ vẹ?

Mosis o wo ọkwa ologbo, keme Jihova ọ rehọ e riẹ mu osu kẹ emọ Izrẹl. Ghele na, oyena o lẹliẹ Mosis fu uke he. Wọhọ oriruo, roro kpahe oghẹrẹ nọ o ro ku ẹbẹbẹ jọ họ kpahe ukuoriọ. (Ikelakele 27:1-11) Onana yọ okpẹme, keme oghẹrẹ nọ Mosis o ro ku ẹbẹbẹ na họ u kpomahọ oge yena gbe ige efa nọ e jọ obaro.

Kọ oghẹrẹ vẹ Mosis o ro ku ẹbẹbẹ na họ? Kọ o roro nọ fikinọ ọye họ osu emọ Izrẹl, o wo udu nọ o re ro ru epanọ u je rie? Kọ o fi eva họ omariẹ hayo ikpe nọ o su emọ Izrẹl no, manikọ ọ jẹ iroro jọ, je roro nọ oghẹrẹ kpobi nọ o rrọ kẹhẹ, o te were Jihova?

Ẹsejọhọ ere ohwo nọ o wo omorro ọ hai ti ru. Rekọ Mosis o ru ere he. Ebaibol na ọ ta nọ: “Mosis ọ tẹ rehọ ẹme [na] se ỌNOWO na.” (Ikelakele 27:5) U gbe gbunu? Dede nọ Mosis o su emọ Izrẹl ikpe 40 no, ọ rẹroso Jihova, orọnikọ omobọriẹ hẹ. Mosis o gine wo omaurokpotọ.

Mosis o roro nọ ọyọvo họ ohwo nọ o re wo ọkwa ha. Eva e were riẹ gaga nọ Jihova ọ rehọ emọ Izrẹl efa mu re a jọ eruẹaro kugbe ọyomariẹ. (Ikelakele 11:24-29) Nọ ọsẹ aye riẹ ọ ta kẹe nọ ọ rehọ amọfa jọ mu ọkwa re a fi obọ họ kẹe, o ru lele ohrẹ yena, yọ onana u dhesẹ omaurokpotọ. (Ọnyano 18:13-24) Dede nọ ọ gbẹ jọ gaga evaọ okenọ ọ kpako no, ọ yare Jihova re ọ rehọ omọfa mu nọ o ti nwene ẹta riẹ. Nọ Jihova ọ salọ Joshua, Mosis ọ rọ udu kpobi tha Joshua uke, jẹ tuduhọ emọ Izrẹl awọ re a yoẹme kẹ Joshua, ọnọ o ti su ai ruọ Ẹkwotọ Eyaa na. (Ikelakele 27:15-18; Iziewariẹ 31:3-6; 34:7) Mosis o rri rie fihọ uvẹ-ọghọ ulogbo re ọ jọ ohwo nọ o re su emọ Izrẹl evaọ egagọ Ọghẹnẹ. Rekọ o rri ọkwa riẹ kpehru vi amọfa nọ o re fi obọ họ kẹ hẹ.

Ma rẹ kuvẹ hẹ re ọkwa hayo eriariẹ nọ ma wo e lẹliẹ omai fu uke hayo wọ oma kpehru. Kareghẹhọ: Re ma sai ru iruo nọ Jihova ọ kẹ omai gbagba, o gwọlọ nọ ma rẹ roma kpotọ, viukpenọ ma rẹ wọ oma kpehru fiki oware jọ nọ ma wo. (1 Samuẹle 15:17) Ma te wo uvi omaurokpotọ, o te lọhọ kẹ omai re ma sai fi ohrẹ Ebaibol nana họ iruo: “Rehọ ẹroọrọsuọ ra kpobi kpahe ỌNOWO na whọ rehọ eva kpahe ẹriẹ omobọ ra ha.”—Itẹ 3:5, 6.

Oriruo Mosis u wuhrẹ omai nọ u fo ho re ma rri oma mai kpehru gahrọ fiki ọkwa hayo eriariẹ nọ ma wo.

Kọ erere jọ o re noi ze nọ ma tẹ raro kele oriruo omaurokpotọ Mosis? Irere buobu. Ma te wo uvi omaurokpotọ, u re ru akpọ lọhọ kẹ ahwo nọ a rrọ kugbe omai, yọ onana o rẹ lẹliẹ ai rri omai ghaghae. Mai wuzou, Jihova o ti rri omai ghaghae, keme ọyomariẹ o bi dhesẹ omaurokpotọ re. (Olezi 18:35) Ebaibol ọ ta nọ: “Ọghẹnẹ o re hrẹ obroma-oro, rekọ ọ vẹ rọ aruoriwo kẹ enọ e roma-kpotọ.” (1 Pita 5:5) O ginẹ gwọlọ nọ ma raro kele oriruo omaurokpotọ Mosis.