Orọnikọ Ọghẹnẹ ọ ma Ẹdhọ họ. Ukpoye, Ọghẹnẹ ọ ma ukọ-odhiwu jọ nọ o zihe ruọ Ẹdhọ uwhremu na, ọnọ a se Setan. Ebaibol na o dhesẹ nọ oke jọ o jariẹ nọ Ẹdhọ ọ jọ ukọ-odhiwu uzẹme, nọ ọ kare uzioraha. Onana u dhesẹ nọ evaọ oke ọsosuọ, Ẹdhọ ọ jọ ukọ-odhiwu ọgbagba evaọ obọ odhiwu.—Se Izikiẹl 28:15.

Ukọ-odhiwu nọ o zihe ruọ Ẹdhọ na ọ wọso Ọghẹnẹ, jẹ viẹ ọzae-avọ-aye ọsosuọ na họ re a kuomagbei wọso Ọghẹnẹ. Enẹ o ro ru omariẹ họ “Ẹdhọ,” onọ otofa riẹ o rrọ “Ọtaraha,” gbe “Setan,” onọ otofa riẹ o rrọ “Ohwo Ọwọsuọ.”—Se Emuhọ 3:1-5; Eviavia 12:9.

Wọhọ ikọ-odhiwu efa gbe ahwo-akpọ, ukọ-odhiwu nọ o zihe ruọ Ẹdhọ na o wo ufuoma nọ ọ rẹ rọ salọ sọ o re ru oware uwoma hayo uyoma, fikiere ọ tẹ gwọlọ nọ a gọe. Isiuru nọ o wo kẹ ọkwa e ga vi isiuru nọ ọ gwọlọ ro ru Ọghẹnẹ eva were.—Se Matiu 4:8, 9; Jemis 1:13, 14.

Ẹvẹ Ẹdhọ ọ be rọ viẹ ahwo họ nẹnẹ? Kọ u fo re whọ dhozọ riẹ? Whọ rẹ sae jọ Ebaibol na ruẹ iyo enọ nana.