WỌHỌ epanọ ma ta evaọ uzoẹme nọ o vrẹ na, Jesu o wo evawere evaọ uzuazọ. Fikiere ma tẹ gwọlọ wo evawere evaọ uzuazọ, o gwọlọ nọ ma rẹ rọ aro kele oriruo riẹ je ru oware nọ ọ ta.

Wọhọ epanọ oria ikere nọ o rrọ obehru na o ta na, Jihova ọ tuduhọ omai awọ nọ ma rọ aro kele oriruo Jesu. Re ma nya edhere ọvona nọ Jesu ọ nya, o gwọlọ nọ ma re yeri uzuazọ epanọ o yeri je ru lele eware nọ ọ ta. Ere oruo u ti fi obọ họ kẹ omai wo ọjẹrehọ Ọghẹnẹ, jẹ sai wo evawere evaọ uzuazọ.

Jesu o wuhrẹ kpahe ehri-izi sa-sa nọ e rẹ sai fi obọ họ kẹ omai yeri oghẹrẹ uzuazọ nọ o yeri. Ma rẹ sae ruẹ ibuobu ehri-izi nana evaọ Ovuẹ obọ Ugbehru na. Joma ta kpahe ejọ evaọ usu rai gbe epanọ ma sai ro fi ai họ iruo evaọ uzuazọ mai.

EPANỌ EHRI-UZI NANA O SAI RO FI OBỌ HỌ KẸ OMAI WO EWAWERE:

Jesu ọ be jọ etenẹ ta nọ o rrọ isiuru ahwo-akpọ re a riẹ Ọghẹnẹ. Ma rẹ gwọlọ riẹ iyo kẹ enọ wọhọ: Fikieme ma jẹ rrọ uzuazọ? Fikieme uye-oruẹ u je bu akpọ na t’enẹ? Kọ Ọghẹnẹ ọ be ginẹ daezọ mai? Kọ ohwo o re kpohọ oria jọ nyae rria nọ o te whu no? O gwọlọ nọ ma rẹ riẹ iyo kẹ enọ itieye na re ma sai wo evawere evaọ uzuazọ. Jesu ọ riẹ nọ Ebaibol na ọvo o rẹ sae kẹ iyo enọ yena. Nọ Jesu ọ jẹ lẹ se Ọsẹ riẹ, ọ ta nọ: “Ẹme ra uzẹme.” (Jọn 17:17) Kọ Ẹme Ọghẹnẹ ọ sai gine fi obọ họ kẹ omai riẹ Ọghẹnẹ, jẹ rọ ere wo evawere?

OWARE NỌ O VIA DẸẸ:

Esa, yọ uzoge ọmọzae nọ o wuzou utu ile-esuọ jọ, yọ o wọhọ nọ akpọ o bi ti kiehọ kẹe. Ghele na, eva e jẹ were iẹe he. Ọ ta nọ: “Dede nọ ile-esuọ e jẹ were omẹ, mẹ gwọlọ wo evawere evaọ uzuazọ vi onọ ile na e rẹ kẹ.” Ẹdẹjọ, Osẹri Jihova jọ ọ tẹ ta usiuwoma kẹ Esa. Esa ọ ta nọ: “Mẹ nọ riẹ enọ buobu. Oghẹrẹ nọ ọ jẹ rọ rehọ Ebaibol na za enọ mẹ u gbe omẹ unu gaga, fikiere mẹ tẹ rọwo nọ o wuhrẹ Ebaibol kugbe omẹ.” Eware nọ Esa o wuhrẹ no Ebaibol na ze i duobọte ei udu gaga, onana o tẹ wọe roma mudhe kẹ Jihova jẹ họ-ame. Esa ọ ta haro nọ: “Vẹre vẹre, mẹ jẹ hai kie ruọ ebẹbẹ buobu, rekọ enẹna me bi gine yeri uzuazọ evawere.”

EPANỌ EHRI-UZI NANA O SAI RO FI OBỌ HỌ KẸ OMAI WO EWAWERE:

Re a re ohrọ u dhesẹ epanọ a re wo ọdawẹ gbe ororokẹ kẹ amọfa. Jesu o dhesẹ ohrọ-oriọ kẹ ahwo. Ohrọ-oriọ o wọ riẹ fi obọ họ kẹ ahwo nọ a jẹ ruẹ uye. (Matiu 14:14; 20:30-34) Ma tẹ be rọ aro kele Jesu dhesẹ ohrọ-oriọ kẹ amọfa, o rẹ lẹliẹ omai wo evawere, keme ahwo nọ a re fi obọ họ kẹ amọfa a re wo evawere. (Iruẹru Ikọ Na 20:35) Ma rẹ sae rọ ẹme gbe uruemu mai dhesẹ ohrọ-oriọ kẹ amọfa, yọ onana o rẹ sae tuduhọ ae awọ. Kọ ohrọ-oriọ nọ ma re dhesẹ o sai gine fi obọ họ kẹ omai wo evawere?

OWARE NỌ O VIA DẸẸ:

Maria avọ Carlos ọzae riẹ yọ emamọ oriruo evaọ ohrọ-oriọ udhesẹ. Oni Maria o whu siọ ọsẹ Maria ba, yọ ọsẹ na ọ be mọ gaga, tube te epanọ ọ gbẹ be sae rọ kpama no ehwa ha. Maria avọ ọzae riẹ a rehọ ọsẹ na ziọ uwou rai be rẹrotei. A rẹ rọ owezẹ tẹro ẹsibuobu hu fiki ẹyao ọsẹ na, tubẹ wọe dhẹ kpohọ ẹsipito nọ ẹyao na ọ tẹ ga thesiwa. Aimava na a ta nọ o  rẹ bẹ ae t’unu ẹsejọ. Rekọ eva e be were ae ghele wọhọ epanọ Jesu ọ ta na, fikinọ a be rẹrote ọsẹ Maria ziezi.

EPANỌ EHRI-UZI NANA O SAI RO FI OBỌ HỌ KẸ OMAI WO EWAWERE:

Otofa ẹme Griki nọ a jọ etenẹ fa “ruẹrẹ ahwo họ” na họ ohwo nọ ‘o re ru udhedhẹ.’ Ẹvẹ ma sai ro wo evawere evaọ uzuazọ nọ ma tẹ be rria dhedhẹ kugbe amọfa? O te lẹliẹ eva mai were ahwo nọ a rrọ kugbe omai. O gwọlọ nọ ma ru lele ohrẹ Ebaibol nana: “Otẹ make bẹ, epa umutho nọ orọ owhai oma na, wha rehọ iẹe lele ahwo kpobi ria dhedhẹ.” (Ahwo Rom 12:18) “Ahwo kpobi,” u kugbe ahwo uviuwou mai gbe amọfa nọ a make rrọ ukoko na ha. Kọ ma tẹ be rria dhedhẹ kugbe “ahwo kpobi,” u re gine fiba evawere mai?

OWARE NỌ O VIA DẸẸ:

Roro kpahe oriruo aye jọ nọ a re se Nair. Anwọ ikpe buobu ze na, ọ rẹriẹ ovao dhe edawọ buobu no, nọ u bi ru ei bẹbẹ kẹe re ọ rria dhedhẹ kugbe amọfa, maero kọ ahwo uviuwou riẹ. Ọzae riẹ ọ dhẹ siẹe ba anwọ ikpe 15, yọ ọyọvo ọ be yọrọ emọ nọ avọ ọzae na a yẹ. Ọmọzae riẹ jọ ọ be rehọ imu egaga, yọ o re ru ozọ mu oni na gbe oniọvo-ọmọtẹ riẹ inọ o ti kpe ai. Eware nọ Nair o wuhrẹ no Ebaibol na ze eye i bi fi obọ họ kẹe thihakọ enana kpobi jẹ be daoma rria dhedhẹ. Ọ be daoma whaha avro nọ o re lele ọmọ na vro. Ọ be daoma dhesẹ ẹwo gbe ororokẹ kẹ amọfa, jẹ be daoma wo otoriẹ ahwo re ọ sae rria dhedhẹ kugbe ae. (Ahwo Ẹfẹsọs 4:31, 32) U mu rie ẹro nọ ahwo uviuwou riẹ gbe amọfa nọ ọ be daoma rria dhedhẹ kugbe na u bi fi obọ họ kẹe wo evawere.

Ma te bi ru lele ohrẹ Jesu, u ti fi obọ họ kẹ omai wo evawere gbe edẹro evaọ uzuazọ. Ofariẹ, eva e rẹ were omai viere nọ ma tẹ riẹ oware nọ o rrọ obaro. Evawere mai e rẹ tọ họ, otẹrọnọ eware nọ ma riẹ kpobi họ, ma te who, mọ, je whu ẹdẹjọ. Whaọ, ena họ eware nọ ma be rẹriẹ ovao dhe evaọ akpọ nana.

Rekọ emamọ usi jọ o riẹ. Jihova ọ ruẹrẹ eghale jọ kpahe kẹ ahwo nọ a be daoma “nya eva edhere ọvona nọ [Jesu] ọ nyae.” Jihova ọ ya eyaa nọ kẹle na, ọ te rehọ akpọ ọkpokpọ tha nọ ahwo nọ a ru oreva riẹ a te rria, wọhọ epanọ o wo họ iroro no emuhọ ze, yọ ohwo kpobi o ti wo omokpokpọ. Ebaibol na ọ ta nọ: “Rri oria ẹria Ọghẹnẹ o rọ udevie ahwo, a vọ ae a gbẹ te ria, a rẹ te jọ ahwo riẹ gbe Ọghẹnẹ oma riẹ a gbẹ te jọ, ọ vẹ te jọ Ọghẹnẹ rai. Ọghẹnẹ o ve ti ririe irui kpobi no aro rai; uwhu o gbẹte jọ ofa ha, hayo kọ uweri hi, hayo oviẹ hẹ, hayo edada ọvuọvo ho, keme eware anwae evrẹ no.”—Eviavia 21:3, 4.

Maria, nọ ọ kpako te ikpe 84 no nọ ma ta ẹme te evaọ uzoẹme ọsosuọ na, o bi rẹro okenọ eme nana i ti ro rugba. Kọ ẹvẹ kpahe owhẹ? Kọ whọ gwọlọ gbẹ riẹ kpahe “uvi uzuazọ” nọ Uvie Ọghẹnẹ o te wha ze na? (1 Timoti 6:19) Whọ rẹ sae nọ Isẹri Jihova nọ e rrọ ẹwho ra, hayo whọ sai kere se enọ i kere obe nana. *