Eme o gwọlọ re ma ru Ọghẹnẹ eva were? Kọ u dhesẹ nọ ma re koko izi buobu tao? O rrọ ere vievie he. Wọhọ epanọ Jesu ọ ta, ma rẹ sae rọ ẹme ọvo ta kpahe oware nọ Ọghẹnẹ ọ gwọlọ mi omai.—Se Mak 12:28-31.

Joma kake ta kpahe oware nọ o wọ Jesu ta eme yena. Jesu ọ jọ etẹmpol je wuhrẹ evaọ Nisan 11, emedẹ jọ taure o te ti whu. Ewegrẹ riẹ a gwọlọ nọ ọ ta oware jọ thọ re a ruẹ oria nọ a sai ro kru ei. Oke kpobi nọ a nọ riẹ enọ, iyo nọ ọ jẹ kẹ e jẹ lẹliẹ akpọ gbe ai unu. Kẹsena a tẹ nọ Jesu onọ nana: ‘Ujaje ovẹ o maero kpobi?’—Owọ avọ 28.

Onana yọ onọ ulogbo. Ahwo Ju buobu a wo ọvuọ iroro riẹ kpahe uzi nọ o mae rro evaọ usu izi nọ i bu vrẹ egba ezeza (600) nọ i ru Uzi Mosis na via. Efa e ta nọ izi na kpobi ẹrẹrẹ, gbe nọ o thọ re ohwo o roro nọ ejọ i wuzou vi ejọ. Kọ ẹvẹ Jesu ọ rọ kẹ uyo onọ yena?

Nọ Jesu ọ jẹ kẹ uyo na, ọ tẹ fodẹ izi ivẹ orọnikọ ọvo ho. Orọ ọsosuọ, ọ ta nọ: “Whọ rẹ rehọ eva ra kpobi, gbe ẹzi ra kpobi, gbe iroro ra kpobi, gbe ogaga ra kpobi, you Ọnowo na Ọghẹnẹ ra.” (Owọ avọ 30; Iziewariẹ 6:5) Dede nọ Jesu ọ fodẹ “eva,” “ẹzi,” “iroro,” gbe “ogaga,” eme ene nana e nwani wo ohẹriẹ no ohwohwo ho, rekọ i bi dhesẹ oghẹrẹ ohwo nọ ma rrọ evaọ obeva. Otofa ẹme riẹ na họ: Ma rẹ rọ uzuazọ gbe eyero mai kpobi you Jihova. Obe jọ o ta kpahe oria Ebaibol nana nọ: “Whọ rẹ rọ omara kpobi you Ọghẹnẹ ababọ ogbọ.” Fikiere, who te gine you Ọghẹnẹ, whọ rẹ daoma kpobi re whọ sai ru ei eva were kẹdẹ kẹdẹ.—1 Jọn 5:3.

Orọ avivẹ, Jesu ọ ta nọ: “Who re you omọfa epanọ who you oma ra.” (Owọ avọ 31; Iruo-Izerẹ 19:18) Re a you Ọghẹnẹ gbe ọrivẹ, e jẹ họ ohwohwo. Uyoyou nọ ohwo o wo kẹ Ọghẹnẹ oye o rẹ wọe you ọrivẹ riẹ. (1 Jọn 4:20, 21) Ma te you erivẹ mai wọhọ epanọ ma you omamai, ma ti lele ai yeri evaọ oghẹrẹ nọ ma gwọlọ nọ a lele omai yeri. (Matiu 7:12) Ma vẹ te rọ ere dhesẹ nọ ma you Ọghẹnẹ nọ ọ rọ uwoho riẹ ma omai gbe erivẹ mai na.—Emuhọ 1:26.

Re a you Ọghẹnẹ gbe ọrivẹ ohwo, ẹvẹ u wuzou te? Jesu o fibae nọ: ‘Ujaje ovuovo nọ o ro vi enana, o rọ họ.’ (Owọ avọ 31) Nọ Jesu ọ jẹ ta kpahe ẹme nana evaọ oria Ebaibol ọfa, ọ ta nọ izi nọ i kiọkọ kpobi e rrọ otọ ijaje ivẹ nana.—Matiu 22:40.

Re ma ru Ọghẹnẹ eva were, o bẹ vievie he. Ma rẹ sae rọ ẹme ọvo ta kpahe oware nọ Ọghẹnẹ ọ gwọlọ mi omai, oye họ uyoyou. Uyoyou họ oware nọ Ọghẹnẹ ọ gwọlọ mi idibo riẹ, yọ oye ọ te gbẹ gwọlọ mi ai. Rekọ orọnikọ igbenu gheghe ọvo ma rẹ rọ ta nọ ma you Ọghẹnẹ hẹ, o gwọlọ nọ ma rẹ j’owọ jọ. (1 Jọn 3:18) Ma tuduhọ owhẹ awọ nọ gbe wuhrẹ kpahe epanọ whọ sai ro you Jihova, keme “Ọghẹnẹ họ uyoyou.”—1 Jọn 4:8.