SI KẸLE ỌGHẸNẸ
‘Yare, A rẹ te Kẹ Owhẹ’
‘Olori, wuhrẹ omai epanọ a rẹ lẹ.’ (Luk 11:1) Olele Jesu jọ ọ ta ẹme yena kẹe. Evaọ uyo nọ Jesu ọ kẹ riẹ, ọ ta kpahe etadhesẹ ivẹ jọ nọ i re wuhrẹ omai epanọ ma sae rọ lẹ re Ọghẹnẹ o yo elẹ mai. Otẹrọnọ whọ nọ omara no ẹdẹjọ sọ Ọghẹnẹ o bi gine yo elẹ ra, kiyọ uyo Jesu na u ti fi obọ họ kẹ owhẹ gaga.—Se Luk 11:5-13.
Ọtadhesẹ ọsosuọ ọ ta kpahe ohwo nọ ọ be lẹ na. (Luk 11:5-8) Jesu ọ ta nọ ọrara ọ kpahe ọzae jọ evaọ udeviaso, rekọ ọzae na o wo emu nọ ọrara na ọ rẹ re he. Whaọ ọzae na ọ gwọlọ nọ ọ rẹ j’owọ jọ kpata kpata. Dede nọ udeviaso ọrara na ọ rọ nyaze, ọzae na ọ tẹ dhẹ bru ogbẹnyusu riẹ jọ re o momo ibrẹdi jọ kẹe re ọ rọ ghọ ọrara riẹ na. Nọ o te uwou ogbẹnyusu riẹ na je kporo ẹthẹ, ogbẹnyusu riẹ ọ kake rọwo nọ ọ rẹ kpama ha keme uviuwou riẹ soso o wezẹ no evaọ ubruwou ovona. Rekọ fikinọ ọzae na ọ ruabọhọ bi kporo, ogbẹnyusu riẹ na ọ tẹ kpama rovie ẹthẹ jẹ kẹe ibrẹdi jọ. *
Kọ eme ọtadhesẹ yena o wuhrẹ omai kpahe olẹ? Jesu ọ be jọ etenẹ ta kẹ omai nọ ma ruabọhọ hẹ yare, gwọlọ, je kporo. (Luk 11:9, 10) Fikieme? Kọ Jesu ọ be ta nọ Ọghẹnẹ ọ rẹ kaki yo elẹ mai hi? Vievie. Otọ ẹme Jesu na họ, wo ohẹriẹ no ogbẹnyusu nọ ọ jẹ kake kpama ha na, Ọghẹnẹ o re yo elẹ ahwo nọ a lẹ sei avọ ẹrọwọ. Ma te bi dhe ẹlẹlẹ, u re dhesẹ nọ ma wo ẹrọwọ. U re je dhesẹ nọ ma ginẹ gwọlọ oware nọ ma be yare na, gbe nọ ma ginẹ rọwo nọ Ọghẹnẹ ọ rẹ sai ru ei kẹ omai otẹrọnọ oware na o rọwokugbe oreva riẹ.—Mak 11:24; 1 Jọn 5:14.
Ọtadhesẹ avivẹ na ọ ta kpahe Jihova, “ọnọ o re yo elẹ” na. (Olezi 65:2) Jesu ọ nọ inọ: “Whai ọvẹ ọ rọ ọsẹ, nọ ọmọzae riẹ ọ rẹ te yare eri, kọ ọ rẹ kẹe oriọvọ rọ eri; hayo ọ tẹ yare iẹ eke, kọ ọ rẹ kẹe akpakpasimagha?” Uyo na o bẹ hẹ, keme ọsẹ ọvuọvo ọ riẹ hẹ nọ ọ rẹ kẹ emọ riẹ ikpehre eware itieye. Kẹsena Jesu ọ tẹ f’otọ ọtadhesẹ na nọ: Otẹrọnọ ahwo-akpọ nọ a gba ha a ‘riẹ epanọ a rẹ rehọ emamọ eware kẹ emọ rai, kẹvẹ Ọsẹ obọ odhiwu rai ọ rẹ rehọ ẹzi ọfuafo kẹ enọ e yare riẹ te?’ *—Luk 11:11-13; Matiu 7:11.
Ọghẹnẹ o re yo elẹ ahwo nọ a lẹ sei avọ ẹrọwọ
Eme ọtadhesẹ nana o wuhrẹ omai kpahe Jihova, “ọnọ o re yo elẹ” na? Jesu ọ be tuduhọ omai awọ re ma riẹ nọ Jihova ọ wọhọ Ọsẹ oyoyou nọ o rẹ were re o ru ẹgwọlọ emọ riẹ kẹ ae. Fikiere, idibo Jihova kpobi a rẹ sai horie eva rai kẹ Jihova ababọ ozọ. Fikinọ ma riẹ nọ Jihova ọ riẹ oware nọ o mai woma kẹ omai, u fo re ma jẹ oghẹrẹ nọ ọ rọ kẹ uyo elẹ mai rehọ, o tẹ make rọnọ ere ma rẹro riẹ hẹ. *
Oria Ebaibol nọ ma jiroro riẹ nọ who se evaọ amara June
Jọn 17 rite Iruẹru Ikọ Na 10
^ edhe-ẹme 4 Uruemu nọ o jọ otọ dẹẹ evaọ oke yena, oye Jesu ọ rọ kẹ ọtadhesẹ na. Ahwo Ju a rri ọrara ọghọ ghare gaga. Uviuwou u re there ibrẹdi buobu nọ a rẹ re okpẹdẹ soso, fikiere a jẹ hae ruẹ momo mi omọfa nọ erai i te re. Ofariẹ, otẹrọnọ uviuwou na u yogbe, otọ gheghe aikpobi a re kiẹzẹ evaọ ubrukpẹ ovona.
^ edhe-ẹme 6 Jesu ọ nọ inọ “kẹvẹ,” bi ro dhesẹ nọ otẹrọnọ ohwo-akpọ ọ rẹ sai ru ei, Ọghẹnẹ o re ru vi ohwo-akpọ thethabọ.
^ edhe-ẹme 7 Re whọ gbẹ riẹ kpahe epanọ whọ sae rọ lẹ re Ọghẹnẹ o yo elẹ ra, se uzou avọ 17 orọ obe na Eme Ebaibol na O Gine Wuhrẹ? onọ Isẹri Jihova a kere.
