Kọ ohwo jọ o mukpahe owhẹ no ẹdẹjọ fikinọ whẹ aviẹ wha no uyẹ ovo ze he? Hayo kọ ohwo jọ ọ whaha owhẹ uvẹ nọ whọ hai ro wo oware jọ tobọ fikinọ ovioma ra u wo ohẹriẹ no oriẹ, hayo fikinọ who wo ugho ho? Otẹrọnọ o via kẹ owhẹ no, riẹ nọ whẹ ọvo o via kẹe no ho. Dede nọ okienyẹ nana ọ vọ oria kpobi evaọ akpọ na, o rrọ ere evaọ obọ odhiwu hu. Pita ukọ na ọ ta avọ imuẹro nọ: “Ọghẹnẹ o wo ọriẹwẹ hẹ.”—Se Iruẹru Ikọ Na 10:34, 35, NW.

Uwou Kọniliọs nọ ọ jọ ohwo orẹwho Egedhọ, Pita ọ jọ ta ẹme yena. Evaọ oke yena ahwo Ju a rri ahwo Egedhọ fihọ ahwo nọ a fo ho, inọ u wo oware ovo nọ a re ru kugbe ai hi. Kọ eme ọ lẹliẹ Pita rueva uwou Kọniliọs? Jihova o vi rie nya. Nọ Pita ọ jọ eruẹaruẹ ẹdẹjọ, o te yo urru nọ o ta kẹe nọ: “Onọ Ọghẹnẹ o ru fo uno, who ru ei họ ekpehre he.” Ẹdẹ nọ o vrẹ taure onana o tẹ te via, ukọ-odhiwu ọ jọ eruẹaruẹ ta kẹ Kọniliọs nọ o vi ohwo jọ nyai se Pita. (Iruẹru Ikọ Na 10:1-15) Nọ Pita ọ ruẹ nọ Jihova họ ọnọ ọ be kpọ oware nọ o be via na, o te nwene eriwo riẹ kpahe ahwo Egedhọ na.

Pita ọ ta nọ: “Enẹna mẹ ruẹ vevẹ no inọ Ọghẹnẹ o wo ọriẹwẹ hẹ.” (Iruẹru Ikọ Na 10:34, NW) Otofa ẹme Griki nọ a jọ etenẹ fa nọ “ọriẹwẹ” na u dhesẹ epanọ ohwo “o re rri ovao omọfa.” Ohwo jọ nọ ọ rẹ kiotọ eme Ebaibol ọ ta kpahe ẹme nana nọ: “U dhesẹ epanọ oguẹdhọ o re rri ovao ohwo bruoziẹ, ukpenọ o re guẹdhọ na sọ ohwo na ọ reabe hayo ọ rease.” Ọghẹnẹ o re rri ovao ahwo jọ siọ edekọ ba fiki ovioma rai hi, yọ o re rri uyẹ hayo epanọ ohwo o wo ugho te gbe he.

Rekọ eva hayo udu na Ọghẹnẹ o re riwi. (1 Samuẹle 16:7; Itẹ 21:2) Pita ọ tẹ jẹ ta nọ: “Evaọ korẹwho korẹwho ọnọ ọ jarae dhẹe o je ru onọ ukiẹrẹe ọ rẹ rehọ iẹe.” (Iruẹru Ikọ Na 10:35) Re ma dhozọ Ọghẹnẹ u dhesẹ nọ ma rẹ kẹe adhẹẹ, fi eva họ iẹe, jẹ whaha oware kpobi nọ o rẹ dhae eva. Re ma ru onọ u kiẹrẹe u dhesẹ nọ ma rẹ rọ unevaze ru oware nọ u kiehọ evaọ aro Ọghẹnẹ. Eva e rẹ were Jihova nọ ọ tẹ ruẹ ohwo nọ ọ be dhozọ riẹ je bi ru oware uwoma.—Iziewariẹ 10:12, 13.

Otẹrọnọ ohwo jọ o mukpahe owhẹ no ẹdẹjọ fikinọ ovioma ra u wo ohẹriẹ no oriẹ, whọ rẹ sai wo omosasọ no ẹme Pita na ze. Jihova o bi si ahwo erẹwho kpobi ziọ egagọ uzẹme. (Jọn 6:44; Iruẹru Ikọ Na 17:26, 27) O re yo elẹ ahwo nọ a be gọe, orọnikọ fiki ovioma rai, orẹwho nọ a no ze hayo epanọ a wo ugho te he. (1 Ivie 8:41-43) Nọ Jihova o te rri no obọ odhiwu ze, jẹ ruẹ omai, ma wọhọ uyẹ ọvo evaọ aro riẹ. Kọ oma o gbẹ be were owhẹ re who wuhrẹ kpahe Ọghẹnẹ nana nọ o wo ọriẹwẹ hẹ na?