A yẹ omẹ evaọ ẹwho ọsese jọ nọ a re se Texcoco. Evaọ oke yena, ẹwho na o wo emamọ idhere he, jẹ vọ avọ ovu. Ahwo a jẹ hae rọ eketekete wọ eware no iwhre sa-sa ze te zẹ evaọ ẹwho na. Mai emọ izii ọsẹgboni mẹ a yẹ, mẹ họ ọmọ avọ ihrẹ, yọ ma yogbe gaga. Ọsẹ mẹ ọ jẹ hae ruẹrẹ eviẹ re ọ sae ruẹ ugho rẹrote omai. Rekọ nọ mẹ jọ ikpe ihrẹ, o te whu siọ omai ba. No umuo oke yena vrẹ, oni mẹ o te je ru iruo gaga re ọ sae ruẹ nọ ma re eva vọ.

Ọsẹ oni mẹ ọ jẹ hai kporo urete, yọ o je tube wuhrẹ ahwo ile egagọ dede. Enwenọ ohwo kpobi evaọ uviuwou mai ọ riẹ epanọ a re kporo okwakwa ikporakporo. Oni mẹ ọ jọ omọvo ikuaya ichọche na, yọ oniọvo riẹ jọ ọ jẹ hae suọ ile gaga, je kporo epiano evaọ ichọche na. Ma wọ egagọ Kathọlik họ uzou dẹẹ. Obọ aruẹri ichọche na mẹ jẹ hae jọ, yọ o jọ omẹ iroro nọ mẹ te jọ imishọnare ichọche na. Dede na, ifimu ozighi e jẹ hae were omẹ gaga. Ifimu yena nọ mẹ jẹ hai rri na e lẹliẹ omẹ wo uruemu ozighi avọ ofu ọkpoo.

Me te ti mu isukulu nọ a re jo wuhrẹ efada ichọche na họ ẹnya evaọ ẹwho ọ Puebla. Utee mẹ họ, nọ me te nwrotọ no, mẹ vẹ te jọ efada ichọche Kathọlik. Rekọ evaọ ukpe nọ me ti ro nwrotọ na, oware jọ o tẹ via nọ o lẹliẹ ichọche Kathọlik no omẹ oma. Ọmọtẹ ichọche na jọ nọ o duwu omariẹ iyoi nọ ọ rẹ rọo vievie he, ọ tẹ jẹ gwọlọ lẹliẹ omẹ họ re me lele iei bruẹnwae. Me kie kẹe he, rekọ onana o lẹliẹ omẹ wo isiuru inọ mẹ rẹ rọo. Ofariẹ, me muẹrohọ nọ efada buobu evaọ ichọche na a bi yeri uzuazọ agbava. Uwhremu na, me te nwene utee nọ mẹ rọ gwọlọ jọ efada.

 Mẹ tẹ jiroro nọ me bi kpohọ isukulu nọ a jo wuhrẹ ile evaọ Mexico City. Nọ me nwrotọ no, me te wo aye je yẹ emọ ene. Ile nọ mẹ jẹ hae so evaọ okenọ a te bi ru Emase evaọ ichọche na, etẹe mẹ jẹ hae jọ ruẹ ugho rọ rẹrote uviuwou mẹ.

Nọ ma rọo no, u kri hi, ebẹbẹ buobu e tẹ ruọ orọo mai. Eva i re kru aye mẹ ẹdha ha, yọ ere mẹ jọ re fikinọ ma je viẹro ku ohwohwo. Ma jẹ hae la ohwohwo eka, jẹ tubẹ họre dede. Nọ ikpe 13 e ruọ emu no, ma tẹ jiroro nọ ma rẹ hẹriẹ, jẹ tubẹ fa orọo na uwhremu na.

Isẹri Jihova a nyaze te ta usiuwoma kẹ omẹ ẹdẹjọ taure mẹ avọ aye mẹ ma tẹ te hẹriẹ. Nọ Isẹri ivẹ na a kporo ẹthẹ na, a tẹ ta nọ a nyaze te ta usiuwoma kẹ omai. Me roro nọ mẹ riẹ Ebaibol na ziezi, fikiere mẹ tẹ jọ eva mẹ ta nọ me ti dhesẹ kẹ ai nọ a riẹ oware ovo ho. Mẹ jẹ hae nọ ae enọ egaga nọ me roro nọ a te sae za kẹ omẹ hẹ. Rekọ a jẹ hae kẹ iyo enọ mẹ kpobi no Ebaibol na ze, yọ onana o jẹ lẹliẹ akpọ gbe omẹ unu gaga. Mẹ tẹ te ruẹ vuhumu nọ kpakọ mẹ riẹ Ebaibol na tere he. Fikinọ aye mẹ ọ jẹ hae kpahe eme egaga kẹ Isẹri na, yọ mẹ jẹ hai wo uvẹ tere he, a gbẹ nyaze viere he.

Nọ ikpe isoi e ruọ emu no, mẹ tẹ wọ aye ọfa nọ a re se Elvira fihọ uwou, yọ evaọ oke nana, Isẹri Jihova efa a tẹ wariẹ mu Ebaibol na họ ewuhrẹ kugbe omẹ. Fikinọ Elvira o mukpahe Isẹri na ha, o jọ lọlọhọ kẹ omẹ re me wuhrẹ Ebaibol na ẹsikpobi. Ghele na, o rehọ omẹ ikpe buobu re mẹ sai siobọno ekpehre iruemu jọ nọ e reria omẹ obọ no.

Mẹ ruẹ vuhumu nọ re mẹ sae rọ udu kpobi gọ Jihova, o gwọlọ nọ me re ru inwene jọ evaọ uzuazọ mẹ. Orọ ọsosuọ, o gwọlọ nọ mẹ rẹ siọ ile nọ mẹ jẹ hae so ba evaọ okenọ a te bi ru Emase, re mẹ gwọlọ iruo efa nọ mẹ sae rọ rẹrote uviuwou mẹ. (Eviavia 18:4) O tẹ jẹ gwọlọ nọ, re mẹ avọ Elvira ma gbẹ sae rria kugbe, ma rẹ ruọ orọo lele uzi.

Ghele na, enwene jọ nọ o mae jọ bẹbẹ kẹ omẹ họ, re mẹ kpọ ofu ọkpoo mẹ. Eria Ebaibol ivẹ nọ i fi obọ họ kẹ omẹ gaga họ: Olezi 11:5, nọ u dhesẹ nọ Jihova o mukpahe ozighi, gbe 1 Pita 3:7, nọ u dhesẹ nọ mẹ tẹ gwọlọ nọ Jihova o yo elẹ mẹ, me re tete aye mẹ. Me roro kpahe eria Ebaibol yena ziezi jẹ lẹ se Jihova re o fi obọ họ kẹ omẹ, ẹmẹrera na, me te ti wuhrẹ epanọ mẹ sae rọ kpọ ofu mẹ.

Enẹna, mẹ avọ uviuwou mẹ ma be were eva kugbe ziezi. Mẹ be daoma gaga re mẹ sai fi obọ họ kẹ aye mẹ gbe emọ nọ aye ọsosuọ mẹ o yẹ kẹ omẹ na re aikpobi a dikihẹ ga ziezi evaọ ukoko na.

Nọ mẹ jọ ọmaha, mẹ jẹ gwọlọ nọ mẹ rẹ jọ efada gbe ohwo nọ o re fi obọ họ kẹ ahwo. Whaọ, enẹna mẹ mai ro wo evawere evaọ uzuazọ. Mẹ yọ iticha nọ o re wuhrẹ ahwo ile. Iruo nana mẹ be jọ ruẹ ugho rẹrote uviuwou mẹ. Me yere Jihova gaga fiki odiri nọ o wo kẹ omẹ, jẹ sai ru inwene nọ i zihe omẹ ruọ emamọ ohwo uwhremu na.