No emaha mẹ ze, eware nọ Ọghẹnẹ ọ ma e rẹ were omẹ. O rẹ were uviuwou mai re a nyai rri ughe evaọ owhawho gbe ewa nọ e wariẹ ẹwho mai nọ a re se Jyväskylä họ, evaọ Central Finland. Erao e rẹ were omẹ gaga re. Nọ mẹ gbẹ jọ ọmaha, mẹ jẹ hae wọ erakọ gbe ibusu họ oma. Nọ mẹ be ro ze na, oghẹrẹ nọ ahwo a re gboja kẹ erao o jẹ hae kẹ omẹ uye gaga. Nọ u te oke jọ no, me te kuomagbe ukoko jọ nọ o rẹ họre re ahwo a siọ oja ba egbe kẹ erao, yọ mẹ jọ etẹe ruẹ ahwo jọ nọ erao e rẹ were wọhọ omẹ.

No oke te oke, ma jẹ hae nya no oria ruọ oria, be vuẹ ahwo re a siọ oja ba egbe kẹ erao. Ma jẹ hae nya ẹwho na wariẹ re ma họre wọso iwou-eki nọ a rẹ jọ zẹ oviẹ erao gbe eria nọ a rẹ jọ rehọ erao nọ a kpe no wuhrẹ ahwo. Ma tubẹ rehọ ukoko okpokpọ jọ mu nọ o rẹ thọ erao. Ẹsibuobu ma jẹ hai wo ẹbẹbẹ kugbe otu egọmeti fiki ozighi nọ ma jẹ hai ru re ahwo a siọ oja ba egbe kẹ erao. A mu omẹ fihọ uwou-odi, jẹ rehọ omẹ kpohọ ekọto unuẹse buobu.

U te no oja nọ a re gbe kẹ erao no, ebẹbẹ efa nọ e rrọ akpọ na e jẹ kẹ omẹ idhọvẹ re. Fikiere, me te kuomagbe ikoko sa-sa, te onọ o rẹ họre wọso ahwo nọ a be raha okegbe. Mẹ rehọ ẹgba mẹ kpobi thae uke. Mẹ jẹ hae thothọ iyogbere, enọ ohọo u bi kpe, gbe ahwo nọ a wo ahwo ho nọ a bi kienyẹ.

Rekọ nọ u te oke jọ no, mẹ tẹ ruẹ vuhumu nọ mẹ te sai nwene eware vievie he. Dede nọ ikoko yena nọ me dhomahọ na i ku ebẹbẹ esese jọ họ, a sai ku ebẹbẹ nọ e mae rro họ họ. Epanọ ma daoma te ere ebẹbẹ na i bu te, o tẹ wọhọ ẹsenọ ohwo ọvo ọ be daezọ họ. U gbe wo oware ovo nọ me re ru hu.

Onana u fi ọkora họ omẹ oma, me te mu Ọghẹnẹ gbe Ebaibol na  họ eroro kpahe. Evaọ oke jọ, Isẹri Jihova a jẹ hai wuhrẹ Ebaibol na kugbe omẹ. Dede nọ a jọ wowou je wo isiuru kpahe omẹ, u no omẹ eva ze re me nwene uzuazọ nọ me je yeri evaọ oke yena ha. Uwhremu na, eware i te nwene.

Me te mu Ebaibol na họ ese. Eware nọ mẹ jariẹ se, e were omẹ oma gaga. Me se ku eria Ebaibol nọ e ta nọ ma rẹrote erao. Wọhọ oriruo, Itẹ 12:10 o ta nọ “ohwo okiẹrẹe ọ rẹ rehọ ẹro te uzuazọ arao riẹ.” Mẹ tẹ jẹ ruẹ vuhumu nọ orọnikọ Ọghẹnẹ họ ọnọ ọ be wha ebẹbẹ akpọ na ze he. Ukpoye, ebẹbẹ i bi dhe ebuebu evaọ akpọ na fikinọ ahwo a bi ru lele oware nọ ọ ta ha. Eva e were omẹ gaga nọ mẹ jọ Ebaibol na ruẹ vuhumu nọ Ọghẹnẹ ọ rrọ yoyou jẹ vọ avọ ohrọ gbe aruoriwo.—Olezi 103:8-14.

Evaọ oke nana, mẹ tẹ yare Isẹri Jihova re a vi obe na Eme Ebaibol na O Gine Wuhrẹ? se omẹ. U kri hi, Isẹri Jihova jọ a tẹ nyaze te ta usiuwoma kẹ omẹ, je mu Ebaibol na họ ewuhrẹ kugbe omẹ. Me te ti mu ewuhrẹ họ ẹnya. Ẹmẹrera na, ewuhrẹ na ọ tẹ ruọ omẹ oma ziezi.

Ebaibol na o fi obọ họ kẹ omẹ ru inwene buobu evaọ uzuazọ mẹ. Mẹ siọ ivovavovo gbe idieda thomawa ba, jẹ siọ eme iyoma ba ẹta. Me te ti mu adhẹẹ họ ẹrọ kẹ otu egọmeti. (Ahwo Rom 13:1) Mẹ tẹ jẹ siọ ọfariẹ-ogbe ba, uruemu nọ mẹ jẹ rọ họ vẹre na.

Enwene jọ nọ o mae bẹ kẹ omẹ họ, re me no ikoko nọ me dhomahọ vẹre na. O lọhọ kẹ omẹ vievie he. Me je roro nọ me te no ikoko yena, o te wọhọ ẹsenọ me bi vivie ai. Rekọ mẹ tẹ ruẹ vevẹ nọ Uvie Ọghẹnẹ ọvo họ ifue rọkẹ ebẹbẹ ahwo akpọ. Mẹ tẹ be daoma kpobi re mẹ ta usiuwoma kpahe Uvie na, re amọfa a riẹ kpahe iẹe.—Matiu 6:33.

Fiki oghẹrẹ ohwo nọ mẹ jọ, mẹ tẹ nwane ruẹ ohwo, me re rri rie fihọ emamọ ohwo hayo ekpehre ohwo. Fikiere, oghẹrẹ nọ mẹ jẹ hai yerikugbe ekpehre ahwo, ere mẹ jẹ hai yerikugbe enọ me rri fihọ ekpehre ahwo. Rekọ me yere Ọghẹnẹ gaga nọ me gbe wo omukpahe otioye kẹ ahwo ho. Ukpoye, mẹ be daoma you ahwo kpobi. (Matiu 5:44) Edhere jọ nọ me bi ro ru onana họ, ẹkwoma usiuwoma Uvie Ọghẹnẹ nọ mẹ be ta kẹ ahwo. O be kẹ omẹ evawere gaga inọ usiuwoma na u bi fi obọ họ kẹ ahwo wo evawere gbe udhedhẹ, je wo ẹruore kpahe obaro na.

Enẹna, eva e be were omẹ gaga keme mẹ kẹ Jihova uvẹ re o ru onọ u je rie. U mu omẹ ẹro nọ ọ te kuvẹ re a gboja kẹ ahwo gbe erao bẹdẹ bẹdẹ hẹ, hayo re ahwo a raha otọakpọ na no riẹriẹriẹ. Ọ te rọ ẹkwoma Uvie riẹ wariẹ ruẹrẹ eware nọ e raha no họ ziezi. (Aizaya 11:1-9) Eware nana nọ me wuhrẹ no Ebaibol ze na gbe obọ nọ me bi fihọ kẹ amọfa re a riẹ uzẹme na o be kẹ omẹ evawere gaga. Enẹna me gbe bi roro nọ me ti nwene eware he.