A yẹ omẹ evaọ ẹwho ọsese jọ nọ a re se Warialda, evaọ ubrotọ New South Wales, Australia. Iruo ẹwọ a rẹ mae jọ Warialda ru, yọ a rẹ jariẹ thuru igodẹ gbe imẹlu re. Ẹwho na ọ rrọ fuafo, yọ a rẹ nwane jariẹ ru ozighi tere he.

Mẹ họ ọkpako evaọ emọ 10 nọ ọsẹgboni mẹ a yẹ. Nọ mẹ jọ ikpe 13, me te mu iruo họ eru re mẹ sae ruẹ ugho rọ tha uviuwou mai uke. Fikinọ me kpohọ isukulu tere he, iruo ẹwọ me je ru. Nọ mẹ jọ ikpe 15, me te mu enyenya họ ethuru kẹ ahwo.

Fikinọ obọ ẹwọ na mẹ jẹ hae rria, eware ivẹ i no rie ze. Orọ ọsosuọ, iruo na gbe okegbe na e were omẹ gaga. Nọ mẹ tẹ be re erae evaọ aso, oware jọ nọ o jẹ hae were omẹ gaga họ, omofou owọwọ na avọ ore ẹwọ nọ u bi gbo ze, yọ mẹ tẹ kpare ovao rri ehru, mẹ jẹ hae ruẹ ọvẹre gbe isi nọ e vọ ehru na. Onana o tẹ jẹ lẹliẹ omẹ roro nọ ohwo jọ ọ ma eware nana kpobi. Orọ avivẹ, u wo ekpehre iruemu jọ nọ amọfa nọ a jẹ rria ẹwọ na a whẹ họ omẹ. Ahwo na a jẹ hae laeka je duwu-iyei gaga, yọ a jẹ hae kẹ omẹ isigareti vovo. Enẹ isigareti ivovo gbe ekaela avọ iyei-iduwo e rọ reria omẹ obọ.

Nọ me te ikpe 18 no, mẹ tẹ kwa kpohọ ẹwho nọ a re se Sydney. Mẹ gwọlọ nọ mẹ rẹ ruọ iruo isoja evaọ obei, rekọ fikinọ me kpohọ isukulu tere he, a rehọ omẹ hẹ. Mẹ tẹ te ruẹ iruo efa, jẹ rria ẹwho na ẹgbukpe soso. Evaọ oke yena Isẹri Jihova a rọ kake ta usiuwoma kẹ omẹ. Nọ a zizie omẹ kpohọ ewuhrẹ rai, mẹ tẹ nya jẹ ruẹ vuhumu nọ egagọ rai họ egagọ uzẹme.

U kri hi, mẹ tẹ jiroro nọ me re zihe kpohọ iruo ẹwọ nọ mẹ jọ obọ Warialda je ru na. Rekọ nọ me te ẹwho nọ a re  se Goondiwindi, evaọ Australia, mẹ tẹ daji etẹe. Etẹe mẹ jọ wariẹ ruẹ iruo efa, je wo aye. Rekọ mẹ tẹ wariẹ mu idi họ ẹda.

Mẹ avọ aye mẹ ma yẹ emọ ivẹ. Nọ ma yẹ emọ na no, me te je roro kpahe oghẹrẹ uzuazọ nọ me bi yeri. Mẹ kareghẹhọ ẹme jọ nọ a ta evaọ ewuhrẹ Isẹri Jihova nọ mẹ nya evaọ ẹwho Sydney, jẹ jiroro nọ me re ru oware jọ kpahe uzuazọ mẹ.

Ẹdẹjọ, mẹ tẹ ruẹ Uwou-Eroro anwae jọ nọ u wo adrẹse uwou ogha Isẹri Jihova nọ o rrọ Australia. Me te kere ileta se ai nọ a vi ohwo jọ ze ti wuhrẹ obe kugbe omẹ. A te gine vi omọvo rai jọ bru omẹ ze, je mu Ebaibol na họ ewuhrẹ kugbe omẹ.

Nọ a je wuhrẹ Ebaibol kugbe omẹ na, mẹ tẹ ruẹ vuhumu nọ o gwọlọ nọ me re ru inwene jọ evaọ uzuazọ mẹ. Oria Ebaibol jọ nọ u duobọte omẹ udu gaga họ, obe 2 Ahwo Kọrint 7:1, onọ o tuduhọ omai awọ nọ ma “ru oma mai fo uno eware nọ i re zue oma.”

Mẹ tẹ gbaemu nọ mẹ rẹ siọ isigareti ivovo gbe idieda thomawa ba. O lọhọ họ re mẹ sai ru inwene yena, keme e reria omẹ obọ no. Rekọ mẹ gba riẹ mu nọ me re ru Ọghẹnẹ eva were. Oria Ebaibol ofa nọ u fi obọ họ kẹ omẹ gaga họ, obe Ahwo Rom 12:2, nọ o ta nọ: “Wha kielele akpọ nana ha; rekọ jọ ẹjiroro ọkpokpọ rai o rẹriẹ owhai.” Mẹ tẹ ruẹ vuhumu nọ re mẹ sai siobọno iruemu iyoma yena, o gwọlọ nọ me re rri rai tọtọtọ wọhọ epanọ Ọghẹnẹ o bi rri rai. Ọghẹnẹ o gine fi obọ họ kẹ omẹ siobọno ivovavovo gbe idieda thomawa.

Ekaela avọ iyei-iduwo họ oware nọ o mae jọ bẹbẹ kẹ omẹ re me siobọno. Obe Ahwo Ẹfẹsọs 4:29 o ta nọ: “Wha jọ eme ogbẹta u no enu rai ze he.” Dede nọ mẹ riẹ eme yena, o rehọ omẹ oke krẹkri re me te ti siobọno eme iyoma ẹta. Eme nọ e rrọ obe Aizaya 40:26 nọ me je roro kpahe i fi obọ họ kẹ omẹ gaga re. Oria Ebaibol yena o ta nọ: “Wha kpare aro rai kpo ehru re wha ri: ono ọ ma enana kpobi? [Ọnọ] ọ rehọ enana kpobi ọvuọvo ze, o je mu edẹ kẹ ai kpobi; fiki ẹgba ologbo riẹ, ọvuọvo o vo rie ei ẹro ho.” Mẹ tẹ ta kẹ omamẹ nọ, otẹrọnọ Ọghẹnẹ o wo ogaga nọ ọ rọ ma ehrugbakpọ na, koyehọ ọ sae kẹ omẹ ẹgba nọ me re ro ru inwene evaọ uzuazọ mẹ re mẹ sai ru ei eva were. Mẹ jẹ hae lẹ se Ọghẹnẹ kpahe iẹe ẹsikpobi, ẹmẹrera na, mẹ tẹ siọ eme iyoma ba ẹta.

Fiki erao nọ mẹ jẹ hai thuru evaọ obọ ẹwọ, uvẹ o nwane jariẹ kẹ omẹ tere nọ me je ro lele ahwo ta ẹme he. Rekọ eware nọ mẹ jọ obọ ewuhrẹ Isẹri Jihova wuhrẹ no, i bi fi obọ họ kẹ omẹ sai lele ahwo ta ẹme ziezi enẹna. U te no ere no, iwuhrẹ na i bi fi obọ họ kẹ omẹ ta usiuwoma Uvie Ọghẹnẹ kẹ amọfa.—Matiu 6:9, 10; 24:14.

Anwọ ikpe buobu ze na, mẹ yọ ọkpako evaọ ukoko nọ mẹ rrọ. O rẹ kẹ omẹ evawere re me ru oware kpobi nọ mẹ sai ru ro fi obọ họ kẹ inievo ukoko na. Rekọ oware nọ o be mae kẹ omẹ evawere họ, aye gbe emọ mẹ nọ ma gbẹ be gọ Jihova kugbe.

Me yere Jihova gaga nọ o bi ro wuhrẹ omẹ, dede nọ me kpohọ isukulu tere he. (Aizaya 54:13) Mẹ rọwokugbe ẹme nọ ọ rrọ obe Itẹ 10:22, nọ o ta nọ: “Oghale ỌNOWO na u re ru ohwo họ ọdafe.” Mẹ avọ uviuwou mẹ ma gba riẹ mu nọ ma ti gbe wuhrẹ kpahe Jihova jẹ gọe bẹdẹ bẹdẹ.