Ebaibol na họ obe nọ ahwo a mae riẹ evaọ akpọ na soso. Fikieme ma rọ ta ere? Keme u wo ohẹriẹ no ebe efa kpobi. Ma rẹ jọ eva riẹ ruẹ ikuigbe ahwo nọ a rria vrẹ no, oghẹrẹ nọ a ro yerikugbe ohwohwo gbe epanọ Ọghẹnẹ o ro yerikugbe ai. Ma rẹ sai wuhrẹ eware buobu no ikuigbe nana ze keme e rẹ lọlọhọ, yọ a rẹ sae fa ai fihọ evẹrẹ buobu nọ ahwo kpobi a rẹ sai se vevẹ. U te no ere no, ehrẹ Ebaibol na i re kie kpo ho.

Maero na, orọnikọ Ebaibol na o ta kpahe Ọghẹnẹ ọvo ho rekọ yọ obe nọ u no obọ Ọghẹnẹ ze. O ta kpahe odẹ Ọghẹnẹ, oghẹrẹ ohwo nọ ọ rrọ, gbe ẹjiroro riẹ kẹ ahwo-akpọ gbe otọakpọ na. Ebaibol na ọ tẹ jẹ ta kpahe oghẹrẹ nọ Ẹdhọ ọ rọ wọso udu-esuo Jihova gbe epanọ Jihova o ti ro dhesẹ Ẹdhọ fihọ ọtọrue je si eyoma no otọ. Nọ ma te bi se Ebaibol na, ma re wo ẹrọwọ gbe ẹruore.

Ma rẹ jọ obe ofa ruẹ oghẹrẹ evuẹ nọ e rrọ Ebaibol na ha. Wọhọ oriruo, Ebaibol na ọvo ọ ta uzẹme na kẹ omai kpahe:

• Oghẹrẹ nọ a rọ ma omai gbe oware nọ ma be rọ ruẹ uye

• Oware nọ Ọghẹnẹ o ru re ma sai wo esiwo

• Oware nọ Jesu o ru kẹ omai

• Oghẹrẹ nọ obaro ahwo-akpọ gbe otọakpọ na o te jọ

Ma tuduhọ owhẹ awọ nọ who gbe se haro re whọ riẹ oware nọ Ebaibol na ọ ta kpahe eware nana nọ ma fodẹ na.