Maeka ọ ruẹaro inọ a ti yẹ Jesu evaọ Bẹtlẹhẹm, yọ eruẹaruẹ nana i rugba nọ ikpe egba ene (400) e vrẹ no. Oware wọhọ ikpe 30 nọ i lele i rie, evaọ ukpe 29 C.E., abọ ọsosuọ eruẹaruẹ Daniẹl nọ e ta kpahe ẹtha Mesaya na i te rugba. Nọ Jesu ọ họ-ame no, Ọghẹnẹ ọ tẹ rọ ẹzi ọfuafo riẹ wholo iei. Mesaya nọ ma bi rẹro riẹ anwẹdẹ na ọ tẹ romavia, koyehọ Ubi nọ a ya eyaa riẹ na.

Jesu ọ tẹ nwani mu iruo odibọgba riẹ họ be ‘vuẹ ovuẹ usiuwoma Uvie Ọghẹnẹ.’ (Luk 8:1) Yọ nwane wọhọ epanọ a ruẹaro riẹ, Jesu ọ jọ wowou avọ omaurokpotọ, yọ o wo ororokẹ kẹ amọfa. Iwuhrẹ riẹ e jọ lọlọhọ yọ i je duobọte ahwo udu, “o je siwi . . . oghẹrẹ ẹyao kpobi nọ i mu ahwo,” be rọ ere dhesẹ nọ Ọghẹnẹ o vi rie ze. (Matiu 4:23) Fikiere, nọ ahwo kpobi a ruẹ eware nọ Jesu o bi ru, a te muhọ ẹ ta inọ, ‘Ma ruẹ Mesaya na no.’—Jọn 1:41.

Jesu ọ ta nọ taure Uvie riẹ u te ti muhọ esuo evaọ otọakpọ na, a ti fi emo sa-sa, etọ i ti nuhu, gbe ikpehre eware efa buobu nọ e via. Fikiere ọ tẹ ta nọ, “Wha roro.”—Mak 13:37.

Dede nọ Jesu ọ jọ ohwo ọgbagba nọ o je yoẹme kẹ Ọghẹnẹ, ahwo buobu a mukpahe iẹe, uwhremu na a te kpei. Uwhu riẹ u ru rie lọhọ nọ ma te rọ wariẹ wo oware nọ Adamu avọ Ivi a kufiẹ, koyehọ uzuazọ ebẹdẹ bẹdẹ evaọ aparadase otọakpọ.

Uwhu Jesu gbe ẹkparomatha riẹ u ru eruẹaruẹ Ebaibol gba. Jesu ọ romavia kẹ ahwo nọ a bu vi udhusoi akuasoi (500). Taure o te ti kpohọ odhiwu, Jesu ọ tẹ ta kẹ ilele riẹ nọ, jọ a vuẹ ovuẹ usiuwoma Uvie na kẹ “ahwo erẹwho kpobi.” (Matiu 28:19) Ẹvẹ ilele riẹ a ta usiuwoma na kẹre te no?

​—Whọ rẹ ruẹ iku nana se evaọ obe Matiu, Mak, Luk, Jọn, 1 Ahwo Kọrint.