SI KẸLE ỌGHẸNẸ
‘Ọnọ Ọ Rẹ Hwosa kẹ E Nọ E Guọlọ E Riẹ’
Kọ oma nọ idibo Jihova a be dawo re a sae gọe o be dae ẹro? Ahwo jọ a rẹ ta nọ ijo, inọ Ọghẹnẹ ọ be daezọ mai hi. Rekọ ọrue koikoi ahwo yena a be ta na. Ebaibol na ọ ta uzẹme ẹme na kpobi vevẹ kẹ omai. Ebaibol na o dhesẹ vevẹ nọ, oma nọ idibo Ọghẹnẹ a be dawo re a sae gọe o be dae ẹro. Muẹrohọ eme jọ nọ Pọl ukọ na ọ ta evaọ obe Ahwo Hibru 11:6.
Eme o gwọlọ re ma sai ru Jihova eva were? Pọl o kere nọ: “O rẹ bẹbẹ re ohwo ọ were Ọghẹnẹ ababọ ẹrọwọ.” Muẹrohọ nọ Pọl ọ ta nọ o gwọlọ ẹrọwọ re ma sae gọ Ọghẹnẹ ziezi. Koyehọ re ma sae gọ Ọghẹnẹ, ma re wo ẹrọwọ hrọ.
Oghẹrẹ ẹrọwọ vẹ Jihova ọ ginẹ gwọlọ? Re ma ta nọ ma wo ẹrọwọ, o gwọlọ eware ivẹ. Orọ ọsosuọ, ma rẹ “rọwo nọ Ọghẹnẹ ọ rọ.” Kọ ẹvẹ ma sae rọ gọ Ọghẹnẹ otẹrọnọ ma rọwo nọ ọ rrọ họ? Re ma rọwo nọ Ọghẹnẹ ọ rrọ ọvo u te he, keme idhivẹri na dede a rọwo ere re. (Jemis 2:19) Ma tẹ ginẹ rọwo nọ Ọghẹnẹ ọ rrọ, ma re dhesẹ onana via nọ ma te bi yeri uzuazọ nọ o rẹ were iẹe.—Jemis 2:20, 26.
Orọ avivẹ, ma “rẹ rọwo nọ Ọghẹnẹ . . . ọ rẹ te hwosa kẹ e nọ e guọlọ e riẹ.” U re mu ohwo nọ o gine wo ẹrọwọ ẹro inọ oma nọ ọ be dawo re ọ sae gọ Ọghẹnẹ, o rrọ uvrẹvru vievie he. (1 Ahwo Kọrint 15:58) Kọ ẹvẹ ma sae rọ gọ Jihova ma gbẹ rọwo nọ ọ te hwosa kẹ omai hi? (Jemis 1:17; 1 Pita 5:7) Ohwo nọ o roro nọ Ọghẹnẹ ọ be daezọ mai hi, hayo oma nọ ma be dawo o be dae ẹro ho, yọ ọ re ginẹ riẹ Ọghẹnẹ hẹ.
Amono Jihova ọ te hwosa kẹ? Pọl ọ ta nọ: “E nọ e guọlọ e riẹ.” Obe jọ o ta nọ ẹme Griki nọ a fa nọ “guọlọ” na, orọnikọ u dhesẹ epanọ a re wuhrẹ kpahe Ọghẹnẹ ọvo ho rekọ re a daoma gọe. Obe ofa jọ o tẹ jẹ ta nọ ẹme Griki nana o dhesẹ epanọ ohwo ọ rẹ daoma kpobi re ọ sai ru onana. Avro ọ riẹ hẹ, Jihova ọ rẹ ghale enọ e be rọ eva kpobi gọe fiki ẹrọwọ.—Matiu 22:37.
Kọ ẹvẹ ma sae rọ gọ Jihova ma gbẹ rọwo nọ ọ te hwosa kẹ omai hi?
Ẹvẹ Jihova ọ te rọ hwosa kẹ enọ e be rọ eva kpobi gọe? Fikinọ ọ rrọ Ọghẹnẹ oyoyou nọ ọ be daezọ, ọ ya eyaa nọ idibo riẹ a te rria bẹdẹ bẹdẹ evaọ aparadase otọakpọ. (Eviavia 21:3, 4) Makọ enẹna dede, ahwo nọ a be rọ eva kpobi gọ Jihova a bi wo eghale buobu. Jihova ọ be rọ ẹkwoma ẹzi ọfuafo riẹ gbe Ebaibol na fi obọ họ kẹ ai yeri uzuazọ evawere.—Olezi 144:15; Matiu 5:3.
Uzẹme riẹ họ, Jihova ọ be daezọ oma nọ idibo riẹ a be dawo re a sae gọe. Kọ onana u gbe ru owhẹ si kẹle iẹe viere? O tẹ rọ ere, daoma wuhrẹ kpahe epanọ whọ sai ro wo oghẹrẹ ẹrọwọ nọ o rẹ wọ owhẹ gọ Ọghẹnẹ re ọ sae hwosa kẹ owhẹ.
