Ahwo nọ a wuhrẹ kpahe oghẹrẹ nọ ahwo a re roro a ta nọ, orọnikọ ekwakwa efe buobu nọ ohwo o wo e rẹ kẹe evawere evaọ uzuazọ họ. Ma be ruẹ onana vuhumu evaọ oghẹrẹ eware nọ ahwo a bi le re a sae riẹ ae odẹ evaọ akpọ na. Fikiere a tẹ be rọ oke rai kpobi dhomahọ eware sa-sa wọhọ arozaha gbe ile-esuọ. Rekọ eware nana kpobi e be sae wha evawere se ai hi.

Ma jọ Ebaibol na ruẹ nọ ohwo-akpọ kpobi ọ riẹ nọ u fo re ọ riẹ Ọghẹnẹ. Obe ọsosuọ Ebaibol na u dhesẹ nọ, Ọghẹnẹ ọ jẹ hai lele ọzae-avọ-aye ọsosuọ nọ ọ ma na ta ẹme kẹse kẹse, re a sai wo emamọ usu kugbei. (Emuhọ 3:8-10) Onana u dhesẹ nọ Ọghẹnẹ ọ ma ahwo-akpọ re a jọ orọ obọrai hi. Yọ Ebaibol na ọ ta nọ ohwo-akpọ ọ ginẹ gwọlọ Ọghẹnẹ.

Wọhọ oriruo, Jesu ọ ta nọ: “Eva e were enọ e riẹ nọ u fo re a riẹ Ọghẹnẹ.” (Matiu 5:3 NW) Eme Jesu nana i dhesẹ nọ re ma sai wo evawere evaọ uzuazọ, u fo nọ ma rẹ riẹ Ọghẹnẹ. Ẹvẹ ma sai ro ru onana? Jesu ọ kẹ uyo na nọ ọ ta nọ: “Fiki ebrẹdi ọvo ohwo ọ rẹ rọ zọ họ, rekọ fiki kẹme kẹme nọ ọ via no unu Ọghẹnẹ ze.” (Matiu 4:4) Idhere vẹ Ẹme Ọghẹnẹ nọ ọ rrọ Ebaibol na ọ sai ro fi obọ họ kẹ mai wo evawere evaọ uzuazọ? Joma ta kpahe igogo idhere esa jọ.

Nẹnẹ, ahwo buobu a riẹ nọ a be kẹ ahwo ohrẹ kpahe emamọ usu, orọo, uzuazọ uviuwou, epanọ a re ro ku ẹwhọ họ, gbe epanọ a sai ro yeri uzuazọ evawere. Rekọ ono ọ rẹ sae kẹ ahwo-akpọ emamọ ohrẹ kpahe eware nana, ogbẹrọnọ Jihova nọ ọ ma ahwo-akpọ na?

Wọhọ iriruo: Nọ whọ tẹ dẹ okwakwa okpokpọ jọ wọhọ ekọmputa hayo ekamẹra, a re fi omobe jọ họ ekatọno na lele iei nọ u re fi obọ  họ kẹ owhẹ riẹ oghẹrẹ nọ a rẹ rehọ iẹe ru iruo. Ebaibol na ọ wọhọ omobe utioye na. Ọghẹnẹ ọ rehọ iẹe kẹ omai ahwo-akpọ re o sae kpọ omai yeri emamọ uzuazọ. Evaọ Ebaibol na ma sae jọ riẹ kpahe oware nọ Ọghẹnẹ ọ gwọlọ mi omai, gbe epanọ ma sae rọ rehọ iẹe ru iruo re o sae kẹ omai erere.

Wọhọ epanọ omobe nọ u lele oware okpokpọ ze u re fi obọ họ kẹ ohwo nọ ọ dẹ oware na riẹ kpahe iẹe ziezi na, ere Ebaibol na ọ rẹ kpọ omai re ma sae whaha eware nọ e rẹ wha enwoma se omai evaọ uzuazọ. Ahwo a rẹ kẹ ehrẹ sa-sa nọ o rẹ wọhọ ẹsenọ e rrọ lọlọhọ re a nya lele. Kọ o gbẹ rrọ oware areghẹ re ma nya lele ehrẹ Ọghẹnẹ nọ ọ ma omai re ma sae whaha ebẹbẹ?

Jihova Ọghẹnẹ ọ rẹ gba omai họ re ma nya lele ehrẹ gbe ekpọvio riẹ nọ ọ be kẹ omai hi. Ukpoye, fikinọ ọ gwọlọ nọ u woma kẹ omai, ọ ta kẹ omai nọ: “Mẹ họ ỌNOWO na Ọghẹnẹ ra, ọnọ o wuhrẹ owhẹ wo erere, ọnọ osu owhẹ nya edhere nọ o fo ẹnya. O whọ hae yo ijaje mẹ, udhedhẹ ra o hae jọ wọhọ ethẹ, ẹrẹreokie ra ọ hae jọ wọhọ ẹkporo abade.” (Aizaya 48:17, 18) Re a tae kpẹkpẹe, nọ ma tẹ nya lele ekpọvio Ọghẹnẹ, u re woma kẹ omai; koyehọ re u woma kẹ omai jẹ sai wo evawere, ma gwọlọ Ọghẹnẹ.

Nọ ahwo jọ a tẹ rọ eware nọ e be via evaọ uzuazọ wawọ oghẹrẹ nọ a dhesẹ nọ Ọghẹnẹ o you te, a rẹ ta nọ a wo oware ovo kugbe Ọghẹnẹ hẹ. Wọhọ oriruo, a rẹ nọ inọ: ‘Fikieme emamọ ahwo a be rọ ruẹ uye?’ ‘Fikieme a bi ro yẹ emọ nọ e ko hayo avọ eyao efa, kpakiyọ emọ na a riẹ onahona ha?’ ‘Fikieme okienyẹ ọ rọ da akpọ na fia enẹ?’ Enọ yena i wuzou gaga, yọ iyo rai i re fi obọ họ kẹ omai evaọ uzuazọ. Rekọ, ukpenọ ma rẹ nwane fo Ọghẹnẹ kẹ ebẹbẹ nọ e rrọ akpọ na, joma ruẹ oware nọ Ebaibol na ọ ta kpahe onana.

Obe Emuhọ uzou avọ 3 o ta kpahe oghẹrẹ nọ Setan ọ rọ rehọ ẹkwoma araomuomu viẹ imava ọsosuọ na họ inọ a re ubi-ure ewoma gbe eyoma nọ Ọghẹnẹ ọ ta nọ a re he na. Setan ọ ta kẹ Ivi nọ: “Wha re ti whuẹ hẹ. Keme Ọghẹnẹ ọ riẹ nọ, ẹdẹ nọ wha re riẹ, ibiaro rai i re ti rovie, wha vẹ te jọ wọhọ Ọghẹnẹ, nọ ọ rẹ riẹ uwoma gbe uyoma.”—Emuhọ 2:16, 17; 3:4, 5.

Orọnikọ Setan ọ rehọ eme yena dhesẹ nọ Ọghẹnẹ yọ ọtọrue ọvo ho rekọ inọ yọ ekpehre osu. Setan o seha nọ eware e te mai woma kẹ ahwo-akpọ nọ a te yoẹme kẹ ọyomariẹ. Kọ ẹvẹ a sai ro ku ẹme yena họ? Fikiere Jihova ọ tẹ kuvẹ re nọ oke o be nyaharo na, ahwo kpobi a vẹ ruẹ sọ eme yena nọ Ẹdhọ ọ ta fihọ iẹe uzou na ginọ uzẹme hayo ọrue. Koyehọ, Ọghẹnẹ ọ kẹ Setan avọ enọ e rrọ abọ riẹ kpobi uvẹ re a  dhesẹ sọ eware i ti woma kẹ ahwo-akpọ ababọ Ọghẹnẹ.

Eme whọ rẹ sae ta kpahe eha-ise Setan na? Kọ ahwo-akpọ a sai gine su omarai ababọ Ọghẹnẹ re eware i woma kẹ ae? Uye-oruẹ, okienyẹ, ẹyao, uwhu, ozighi, ọfariẹ-ogbe, ẹmo, ahwo nọ a re mu kpe gbe eware iyoma efa nọ e be via evaọ akpọ na i dhesẹ nọ ohwo-akpọ ọ sai su omariẹ ababọ Ọghẹnẹ re eware i woma kẹe he. Ukpenọ ma re roro nọ Ọghẹnẹ ọ be wha enana kpobi ze, Ebaibol na ọ fodẹ ugogo oware nọ o be wha onana ze inọ: “Ohwo ọ rẹ rehọ obọ ogaga su ọrivẹ riẹ nwa oma riẹ”—Ọtausiuwoma Na 8:9.

Rono ẹme nọ ma ta no na ze, u re vevẹ inọ ma gwọlọ Ọghẹnẹ orọnikọ re ọ kẹ iyo enọ ahwo-akpọ ọvo ho, rekọ re o ku ebẹbẹ mai họ. Kọ Ọghẹnẹ o ti ru ere?

U kri no nọ ahwo a be rọ gwọlọ no igbo ẹyao, owho, gbe uwhu. Yọ a daoma gaga no be raha oke, ẹgba gbe igho rai re a sai no igbo nana, rekọ omodawọ rai kpobi uvrẹvru. Ahwo jọ a roro nọ a tẹ be fọrọ imu jọ da, ru oma rai jaja ẹsikpobi, hayo rria oghẹrẹ eria jọ, a rẹ gbẹ kake who ho. Enana kpobi uye uvrẹvru gheghe.

Ọghẹnẹ ọ gwọlọ nọ eware i woma kẹ ahwo-akpọ re a jẹ rria avọ evawere. Oye họ ẹjiroro nọ ọ rọ ma ohwo-akpọ, yọ onana o re thọrọ iẹe ẹro vievie he. (Emuhọ 1:27, 28; Aizaya 45:18) Jihova ọ kẹ omai imuẹro nọ o ti ru oware kpobi nọ ọ ya eyaa riẹ gba. (Aizaya 55:10, 11) Ma rẹ jọ Ebaibol na ruẹ eyaa Ọghẹnẹ nọ ọ ya inọ o ti zihe aparadase nọ Adamu avọ Ivi a kufiẹ na ze. Obe Eviavia nọ o rrọ obe urere Ebaibol na o ta kpahe onana inọ: “Ọghẹnẹ o ve ti ririe irui kpobi no aro rai; uwhu o gbẹte jọ ofa ha, hayo kọ uweri hi, hayo oviẹ hẹ, hayo edada ọvuọvo ho, keme eware anwae evrẹ no.” (Eviavia 21:4) Ẹvẹ Ọghẹnẹ o ti ro ru onana, kọ ẹvẹ ma sai ro wo erere no eyaa nana ze?

Jesu, Ọmọ Ọghẹnẹ o wuhrẹ ilele riẹ nọ a lẹ re a jọ otọakpọ na ru oreva Ọghẹnẹ. Ahwo buobu a riẹ kpahe olẹ nana nọ a re se Olẹ Olori na gaga. O ta nọ: “Ọsẹ mai nọ ọ rọ obọ odhiwu, odẹ ra ojọ ọrẹri. Uvie ra oze, epanọ a rọ obọ odhiwu ru orọ eva ra, ru re a jọ akpọ na ru ere re.” (Matiu 6:9, 10) Ẹhẹ, Ọghẹnẹ ọ te rọ ẹkwoma Uvie riẹ si eyoma nọ esuo ohwo-akpọ ọ wha ze kpobi no otọ jẹ rọ ẹkwoma Uvie na ru otọakpọ na zihe ruọ aparadase wọhọ epanọ ọ ya eyaa riẹ na. * (Daniẹl 2:44; 2 Pita 3:13) Eme o gwọlọ nọ ma re ru re ma sai wo erere no eyaa Ọghẹnẹ ze?

Jesu Kristi ọ fodẹ oware nọ o gwọlọ nọ ma re ru hrọ inọ: “Onana họ uzuazọ ebẹdẹ bẹdẹ, re a  riẹ owhẹ nọ whẹ ọvo họ uvi Ọghẹnẹ, gbe Jesu Kristi ọnọ who vi.” (Jọn 17:3) Ẹhẹ, Ọghẹnẹ ọ rẹ sai ru ei re ma wo uzuazọ ebẹdẹ bẹdẹ evaọ akpọ ọkpokpọ nọ ọ ya eyaa riẹ na. Eyaa Ọghẹnẹ nana i te je dhesẹ nọ ẹjiroro ọfa jọ ọ riẹ nọ ma rọ gwọlọ Ọghẹnẹ.

Evaọ ikpe idu ivẹ nọ i kpemu evaọ Arẹopagọs, nọ ọ rrọ obọ Athẹns, Pọl ukọ na ọ ta kẹ ahwo ẹwho na kpahe Ọghẹnẹ inọ: “Ọ ye ọvo ọ rẹ kẹ ahwo kpobi uzuazọ, gbe ẹwẹ, jegbe eware kpobi. Keme eva riẹ ma je wo uzuazọ gbe oma unuho mai jegbe ẹria mai, wọhọ epanọ eketa rai jọ e ta nọ, ‘Keme mai emọ riẹ ma rọ re.’”—Iruẹru Ikọ Na 17:25, 28.

Ẹme nọ Pọl ọ ta kẹ ahwo Athẹns na ginọ uzẹme. Ọghẹnẹ họ ọnọ ọ kẹ omai ẹwẹ nọ ma bi se rehọ, emu nọ ma be re, gbe ame nọ ma be da. Ababọ eware nana nọ Jihova ọ kẹ omai, ma sae jọ uzuazọ vievie he. Rekọ, fikieme Ọghẹnẹ ọ gbẹ be rọ kẹ ahwo-akpọ kpobi eware nana, te enọ e rọwo e riẹ gbe enọ e rọwo e riẹ hẹ? Pọl ọ ta nọ, “re aruẹse guọlọ Ọghẹnẹ, te epanọ a re ro kie lele iei. Dede na orọnikọ otheri omai ọvuọvo abọ họ.”—Iruẹru Ikọ Na 17:27.

Kọ whọ gwọlọ riẹ kpahe ẹjiroro Ọghẹnẹ gbe ehrẹ riẹ nọ e rẹ sai fi obọ họ kẹ omai yeri emamọ uzuazọ enẹna gbe evaọ obaro? O tẹ rrọ ere, ta kẹ ohwo nọ ọ kẹ owhẹ emagazini nana hayo rọ adrẹse nọ ọ rrọ emagazini na kere se Isẹri Jihova. O te were ai re a fi obọ họ kẹ owhẹ.