Wariẹ akpọ na soso họ evaọ amara Akpegbivẹ, ahwo a re dhesẹ Jesu evaọ ifoto wọhọ ọmọboba, nọ a wọ fihọ oria nọ a re fi emu erao họ. Kọ okenọ Jesu ọ rrọ jọ ọmọboba ọvo ma rẹ kareghẹhọ?— * Joma ta kpahe emamọ edhere nọ u fo nọ ma rẹ rọ kareghẹhọ Jesu. Oware nọ o via kẹ ithuru-igodẹ jọ evaọ aso ẹdẹjọ kẹle Bẹtlẹhẹm, u ti wuhrẹ omai oware jọ.

Ukọ-odhiwu jọ ọ romavia kẹ ithuru-igodẹ na, jẹ ta kẹ ae nọ: “[A] yẹ Osiwi kẹ owhai nẹnẹ na, ọnọ ọ rọ Kristi Ọnowo na.” Ukọ-odhiwu na ọ tẹ jẹ ta kẹ ae nọ, a “te ruẹ Ọmọ na, a rehọ ohọ wowo [iei], o kiẹzẹ etehe-ọrẹ-erao.” Ẹsiẹvo na, ikọ-odhiwu efa buobu a tẹ romavia bi “jiri Ọghẹnẹ.”

Ẹvẹ o rẹ jọ owhẹ oma nọ who te yo edo ikọ-odhiwu nọ i bi jiri Ọghẹnẹ?— Eva e were ithuru-igodẹ na gaga. Fikiere a tẹ ta nọ: “Ma nya kpobọ Bẹtlẹhẹm na enẹna, re ma ruẹ oware nọ u ru na.” Nọ a te obei, a tẹ ruẹ “Meri gbe Josẹf, gbe ọmọfofa na nọ o kiẹzẹ eva etehe-ọrọ-erao.”

Amọfa a nyaze te ruẹ Meri avọ Josẹf evaọ obọ Bẹtlẹhẹm re. Nọ ithuru-igodẹ na a ta oware nọ o via kẹ ae, akpọ o te gbe ae unu gaga. Kọ eva e were owhẹ nọ whọ riẹ eware nana?— Ere o rrọ kẹ omai kpobi re. Joma ta kpahe oware nọ eyẹ Jesu o rọ wha oghọghọ ze. Rekọ, ma kake ta kpahe okenọ Meri o ri wo ọzae he.

Ẹdẹjọ, ukọ-odhiwu jọ nọ a re se Gebriẹl ọ tẹ nya bru Meri ze. Ọ tẹ ta kẹe nọ o ti yẹ ọmọ nọ “ọ rẹ te jọ ruaro, a re ti sei Ọmọ Oride na. Ọ rẹ te ria uvie uviuwou Jekọp bẹdẹ bẹdẹ; uvie riẹ u re ti wo urere he.”

Meri ọ tẹ nọ ukọ-odhiwu na kpahe oghẹrẹ nọ onana o te sae rọ via keme ọ re riẹ ọzae he. Gebriẹl ọ tẹ ta kẹe nọ: “Ogaga Oride na ọ rẹ te rehọ uwoho ruru owhẹ; fiki ere, ọmọ nọ a re ti yẹ na, a re ti sei Ọrẹri,  Ọmọ Ọghẹnẹ.” Ọghẹnẹ o te kpeze uzuazọ ọmọ riẹ fihọ edhede Meri re o yẹi evaọ obọ otọakpọ obonẹ. Onana yọ oware igbunu gaga.

Kọ whọ ruẹ ifoto ezae iwoareghẹ esa gbe ithuru-igodẹ na no ẹdẹjọ, enọ e nyae ruẹ Jesu evaọ okenọ a ro yẹi na?— Ifoto ezae nana e rẹ vọ oria kpobi evaọ etoke Kresimesi. Rekọ oware nọ a ta kpahe ezae nana o gba ha. Ezae nana orọnikọ ezae iwoareghẹ vievie he, rekọ ahwo nọ a rẹ rọ isi gbẹva, uruemu nọ Ọghẹnẹ o mukpahe. Joma ta kpahe oware nọ o via nọ ezae na a te oria nọ Jesu ọ jọ. Ebaibol na ọ ta nọ: “Nọ a ruọ eva uwou na a tẹ ruẹ ọmọfofa na avọ Meri oni riẹ.” Fikiere evaọ oke nana nọ ezae na a rọ nyaze na, orọnikọ Jesu ọ gbẹ rrọ ọmọ unuevie he, rekiyọ ọ whẹro no.

Ẹvẹ ahwo nọ a rẹ rọ isi gbẹva na a sae rọ ruẹ Jesu?— “Esi” jọ o su rai, rekọ ukpenọ o su ai kpohọ obọ Bẹtlẹhẹm, ọ tẹ kaki su ai kpobọ Jerusalẹm bru Herọd ovie na. Ebaibol na ọ ta nọ Herọd ọ tẹ gwọlọ nọ o re kpe Jesu. Mẹ nọ owhẹ onọ jọ. Ono who roro nọ ọ rọ esi nana kpọ ezae na bru Herọd?— Orọnikọ Jihova Ọghẹnẹ hẹ, rekọ ọwegrẹ Ọghẹnẹ, Setan Ẹdhọ na.

Nẹnẹ, Setan o bi ru ahwo roro nọ Jesu ọ gbẹ rrọ ọmọboba nọ a wọ họ obọ. Rekọ, Gebriẹl ukọ-odhiwu na ọ ta kẹ Meri nọ: “Ọ rẹ te ria uvie uviuwou Jekọp bẹdẹ bẹdẹ; uvie riẹ u re ti wo urere he.” Enẹna, Jesu yọ Ovie nọ o bi su evaọ obọ odhiwu, yọ ọ te raha ewegrẹ Ọghẹnẹ kpobi no kẹle. Fikiere enẹ ma rẹ kareghẹhọ nọ Jesu ọ rrọ, yọ o gwọlọ nọ ma rẹ vuẹ amọfa kpahe onana.