Kọ ẹruore ẹkparomatha na o mu owhẹ ẹro? * Ababọ avro, a rẹ ruẹ unu gbiku oghọghọ riẹ hẹ nọ a te kpare ahwo mai nọ i whu no ze. Rekọ, ginọ uzẹme nọ a te kpare ahwo nọ a whu no ze? Re ma sae kuyo onọ yena, joma ta kpahe ikọ Jesu.

Fikieme ikọ Jesu a rọ rọwo ẹruore ẹkparomatha na? Ma sae fodẹ eware ivẹ jọ. Orọ ọsosuọ, a rọwo ẹruore ẹkparomatha na fikinọ a ruẹ Jesu nọ a kpare no uwhu ze. Orọnikọ ikọ na ọvo a ruẹ Jesu hu, rekọ ọ romavia kẹ “ahwo nọ a bu vi ahwo egba-isoi” efa. (1 Ahwo Kọrint 15:6) Ofariẹ, a jọ ebe usiuwoma na kpobi ta kpahe ẹkparomatha Jesu re.—Matiu 27:62–28:20; Mak 16:1-8; Luk 24:1-53; Jọn 20:1–21:25.

Orọ avivẹ, o tẹ kawo, ikọ na a rọ ẹro ruẹ imasa nọ Jesu ọ kpare no uwhu ze, ojọ evaọ Nein, ofa evaọ Kapaniọm, onọ u kiọkọ evaọ obọ Bẹtani. (Luk 7:11-17; 8:49-56; Jọn 11:1-44) Orọ obọ Bẹtani nọ ma kake ta kpahe evaọ uzoẹme jọ evaọ Uwou-Eroro nana, o jọ orọ ogbẹnyusu ọkpekpe Jesu. Joma gbẹ ta kpahe oware nọ o via.

Jesu ọ ta kẹ Mata nọ oniọvo riẹ Lazarọs o whu te edẹ ene no inọ: ‘Oniọvo ra ọ te kparoma.’ Mata ọ kaki wo otoriẹ eme Jesu na ha. Ọ tẹ ta kẹ Jesu nọ: “Mẹ riẹ nọ ọ rẹ te kparoma eva ẹkparomatha ẹdẹ urere,” koyehọ Mata o roro nọ oniọvo riẹ ọ te kparoma evaọ obaro. Rekọ Jesu ọ tẹ ta kẹe inọ: “Mẹ họ ẹkparomatha gbe uzuazọ.” U kri hi, oghọghọ o tẹ dae oma fia nọ ọ ruẹ oniọvo riẹ nọ Jesu ọ kpare no uwhu ze—Jọn 11:23-25.

Bovẹ Lazarọs ọ jọ evaọ edẹ ene nọ o ro whu na? Nọ Lazarọs ọ kparoma ze no, o gbiku oware ovo nọ u dhesẹ nọ ọ jọ uzuazọ evaọ obojọ họ. Onana u te dhesẹ nọ Lazarọs o kpohọ odhiwu hu. O hae jọnọ Lazarọs ọ jọ obọ odhiwu be re akpọ kuoma, eme ọ rẹ lẹliẹ Jesu si ie no obei ze? Bovẹ Lazarọs ọ ginẹ jọ evaọ edẹ ene nọ o ro whu na? Uzẹme riẹ họ, Lazarọs ọ jọ owezẹ evaọ uki.—Ọtausiuwoma Na 9:5, 10.

Whọ tẹ kareghẹhọ, Jesu ọ rehọ uwhu dhesẹ owezẹ udidi nọ a rẹ sae rọwo ohwo no ze ẹkwoma ẹkparomatha. Oria Ebaibol na o ta nọ: “’Lazarọs ọzọ mai o kie ruọ owezẹ, rekọ mẹ rẹ nya re mẹ rọyẹe no owezẹ.’ Fikiere ilele na a tẹ ta kẹ e  nọ, ‘Olori, o te kie ruọ owezẹ, oma riẹ ọ rẹ te ga.’ Whaọ ẹme uwhu riẹ Jesu ọ tae: rekọ a te je roro nọ, ọ ta ẹme owezẹ gheghe. Fikiere Jesu ọ tẹ ta kẹ ae vevẹ, nọ, ‘Lazarọs o whu no.’” (Jọn 11:11-14) Jesu o zihe uzuazọ Lazarọs ze ẹkwoma ẹkparomatha na, onọ u ru nọ ọ rọ wariẹ kuomagbe ahwo uviuwou riẹ. A rẹ ruẹ unu gbiku ọghọ nọ Jesu o ru kẹ uviuwou yena ha!

Nọ orọnọ Jesu ọ kpare ahwo ze evaọ okenọ ọ jọ otọakpọ na, onana u te dhesẹ nọ evaọ okenọ o ti su evaọ obaro, o ti ru viere. * Nọ o ti su akpọ na evaọ Uvie Ọghẹnẹ, Jesu ọ te kpare ahwo nọ a whu no ze, enọ e rrọ owezẹ evaọ uki. Fiki oye ọ rọ ta nọ: “Mẹ họ ẹkparomatha” na. Dai roro kpahe oghọghọ nọ o te jọ owhẹ oma nọ whọ tẹ ruẹ ahwo ra nọ a kpare ze. Ere ọvona oghọghọ o te da ahwo nọ a te kpare ze oma fia re.—Luk 8:56.

Jesu ọ ta kẹ Mata nọ: “Ọ nọ ọ rọwo omẹ makọ o whu no, ọ rẹ te zọ; kohwo kohwo nọ ọ rọ nọ ọ rọwo omẹ, o re ti whuẹ hẹ.” (Jọn 11:25, 26) Otẹrọnọ ahwo nọ Jesu ọ te kpare ze evaọ etoke esuo odu ikpe riẹ na a fi ẹrọwọ họ iẹe, a te rria bẹdẹ bẹdẹ.

Nọ Jesu ọ ta ẹme kpahe ẹkparomatha na kẹ Mata no, ọ tẹ nọe sọ ọ rọwo. Mata o te yo kẹe nọ: “Ere, Olori; mẹ rọwo nọ, whẹ họ Kristi na, ọmọ Ọghẹnẹ.” (Jọn 11:26, 27) Kọ ẹvẹ whọ sae rọ rọwo ẹruore ẹkparomatha na wọhọ epanọ Mata o ru na? Oware ọsosuọ nọ who re ru họ, who re wuhrẹ kpahe ẹjiroro nọ Ọghẹnẹ o wo kẹ ahwo-akpọ. (Jọn 17:3; 1 Timoti 2:4) Nọ who te ru ere, who ti wo ẹrọwọ. Iviena ta kẹ Isẹri Jihova re a fi obọ họ kẹ owhẹ riẹ oware nọ Ebaibol na o wuhrẹ kpahe ẹjiroro Ọghẹnẹ kẹ ahwo-akpọ. Yọ eva e te were ae re a lele owhẹ ta kpahe ẹruore ẹkparomatha na re.