A yẹ omẹ evaọ okpẹwho nọ a re se Riga evaọ orẹwho ọ Latvia. Oni mẹ ọvo ọ yọrọ omẹ avọ oniọvo mẹ ọkpako. Dede nọ ichọche Kathọlik oni mẹ ọ jọ, okenọ a te bi ru ehaa jọ evaọ ichọche na ọvo ma jẹ hae nya. Mẹ ginẹ rọwo nọ Ọghẹnẹ ọ rrọ, rekọ fikinọ mẹ gbẹ jọ udhu, eware efa buobu e tẹ jẹ rehọ oke mẹ no.

Nọ mẹ be rro ze na, oni mẹ o te muẹrohọ nọ mẹ ọvo mẹ rẹ ra eware no, mẹ vẹ jẹ wariẹ whẹ ae họ. Ozọ o jẹ hai mu oni mẹ re ọ nyasiọ omẹ ọvo ba uwou keme eware e vọ uwou na nọ mẹ rẹ sae ra no jẹ wariẹ whẹ họ. Fikiere ọ tẹ dẹ emetehe jọ nọ ekwakwa buobu e vọ kẹ omẹ, nọ mẹ jẹ hai ro ku eware jẹ ra no. Oware ofa nọ o jẹ hae were omẹ họ, imotosaikoro nọ a rẹ dhẹ rọ zaharo. Fikiere oni mẹ o te fi odẹ mẹ họ otọ evaọ arozaha imotosaikoro esese jọ nọ a rẹ rehọ awọ thahe, nọ a re se The Golden Moped. Oyena me ro muhọ, uwhremu na, me te mu uzedhe imotosaikoro họ ẹdhẹ.

Ahwo a riẹ omẹ gaga evaọ arozaha nana nọ o re fi uzuazọ ohwo họ ọza na, keme o raha oke he re ọ tẹ reria omẹ obọ fikinọ me re wuhrẹ eware vẹrẹ gaga. Isiasoi soso mẹ jọ ohwo ọsosuọ evaọ eria sa-sa nọ ma jo kpohọ arozaha imotosaikoro edhẹ. Isiasa evaọ orẹwho Latvia, isiava evaọ ubrotọ Baltic.

Nọ me mu ugho họ e wo ziezi no evaọ arozaha imotosaikoro edhẹ na, ọmọtẹ jọ nọ me je lele nyusu nọ a re se Evija (ọnọ o zihe ruọ aye mẹ uwhremu na) o te mu Ebaibol na họ ewuhrẹ kugbe Isẹri Jihova. Ọ jọ evaọ obe rai jọ ruẹ oria jọ nọ ohwo ọ rẹ sai kere fihọ nọ a nyaze ti wuhrẹ Ebaibol na kugbei. O te kere eme fihọ oria na je vi ei se Isẹri Jihova. U kri hi, Isẹri Jihova ivẹ jọ a tẹ nya bru ei ze, je mu Ebaibol na họ ewuhrẹ kugbei. O were omẹ nọ Evija o wuhrẹ Ebaibol na kugbe ai, rekọ evaọ oke yena me wo isiuru kpahe egagọ tere he.

Ẹdẹjọ, Isẹri na a tẹ ta kẹ omẹ nọ me kuomagbe ai evaọ etoke uwuhrẹ na. Me te gine kuomagbe ai, yọ eware nọ me  wuhrẹ e were omẹ oma gaga. Oware jọ nọ o mai duobọte omẹ udu họ, eyaa aparadase otọakpọ nọ Ebaibol ọ yaa na. Wọhọ oriruo, a jọ Ebaibol na dhesẹ obe Olezi 37:10, 11 kẹ omẹ nọ o ta nọ: “Omoke kakao, iru-umuomu e gbẹ te jọ họ; dede nọ wha bi ri oria riẹ ziezi na, ọ rẹ te jọ etẹe he. Rekọ enọ e rọ oma kpotọ, e rẹ te rọ otọ na reuku; oma o rẹ te were ae evaọ omofọwẹ.” Ẹme nana o gine duobọte omẹ udu gaga.

Me te ti mu isiuru họ ewo kpahe egagọ Ọghẹnẹ. Mẹ tẹ te ruẹ vuhumu nọ egagọ buobu a bi wuhrẹ ahwo iwuhrẹ erue. Rekọ eware nọ mẹ jọ Ebaibol wuhrẹ na, i duobọte omẹ udu gaga keme e jọ vevẹ.

Nọ me gbe bi wuhrẹ Ebaibol na, mẹ tẹ te ruẹ epanọ Jihova o rri uzuazọ ghare te. (Olezi 36:9) Onana u te ru nọ mẹ rọ jiroro nọ me re no arozaha imotosaikoro edhẹ na, keme mẹ gbẹ gwọlọ fi uzuazọ mẹ họ ọza ha. Ukpoye, mẹ gwọlọ nọ mẹ rẹ rọ uzuazọ mẹ wha orro se Jihova. Fikiere okpodẹ, orro gbe omawere imotosaikoro edhẹ i gbe si omẹ urru vievie he.

Evaọ ukpe 1996, me te kpohọ okokohọ akpọ-soso jọ nọ Isẹri Jihova a ru evaọ Tallinn, Estonia. Oria nọ a jo ru okokohọ na, o nwani thabọ no oria nọ ma jẹ hae jọ kpohọ arozaha imotosaikoro edhẹ na ha. Mẹ jọ okokohọ na ruẹ udhedhẹ gbe okugbe nọ o jọ udevie ahwo nọ a no eria avọ eria ze. Wọhọ oriruo, nọ ẹmẹkpa ọsese oniọvo jọ o vru, me te roro nọ a te gbẹ sae rue eriẹ hẹ. U kri hi oniọvo ọfa jọ ọ tẹ ruẹ ẹmẹkpa na je zihe iei se oniọvo nọ o wo rie kọkọ. Oware na u gbe omẹ unu gaga. Onana u te ru omẹ vuhumu nọ Isẹri Jihova a bi gine ru lele eme Ebaibol na. Mẹ avọ Evija, ma tẹ gbẹ ruabọhọ uwuhrẹ Ebaibol mai, kẹsena evaọ ukpe 1997, mai imava ma tẹ họ-ame.

Igbẹnyusu mẹ buobu nọ ma gbe je kpohọ arozaha imotosaikoro edhẹ na a whu no fiki ugbẹdhẹ nọ a rẹ dhẹ imotosaikoro na. Rekọ Ebaibol na nọ me wuhrẹ, u fi obọ họ kẹ omẹ rri uzuazọ wọhọ epanọ Jihova nọ ọ kẹ omai uzuazọ o rri rie. O sae jọnọ onana u ru nọ mẹ rọ gbẹ rrọ uzuazọ rite inẹnẹ.

Ikpe ene soso mẹ avọ aye mẹ Evija, ma jọ uwou ogha Isẹri Jihova nọ o rrọ Riga ru iruo. Enẹna ma bi fi obọ họ kẹ ọmọtẹ mai Alise, re ọ sai kru egagọ Jihova ga. Ofariẹ, ẹsiẹvo ẹkpoka me re kpohọ ọfisi nọ a be jọ fa ebe mai nyai fi obọ họ ruẹrẹ imoto gbe eware efa nọ e raha. Eva e be were omẹ gaga inọ mẹ be rehọ onaa nọ me wuhrẹ anwọ emaha ze ro fi obọ họ. Uzẹme riẹ họ, mẹ gbẹ be ra eware no jẹ wariẹ whẹ ae họ.

Uvẹ-ọghọ ulogbo o rrọ kẹ omẹ avọ uviuwou mẹ nọ ma be rọ ta kẹ amọfa kpahe Ọghẹnẹ uzẹme na. Me yere Ọghẹnẹ gaga fiki eware nọ me wuhrẹ no Ebaibol na ze. Evaọ uzẹme, eyaa aparadase otọakpọ na u nwene uzuazọ mẹ.