Ozọ uwhu u re mu ahwo gaga. Fikiere ahwo a be daoma gaga re a seba ewhu. Nọ ohwo nọ ma you o te whu, o rẹ kaki mu omai ẹro ho. Hayo nọ ma tẹ gbẹ rrọ udhu, ma re roro nọ ma ti whu hu. Yọ ere ọvo ma re roro bọwo ẹdẹ nọ ma re whu.

Fẹro sa-sa nọ i je su Ijipti a je roro nọ a ti whu vievie he. A jẹ daoma ru oware kpobi re a sae rria tọ, tubẹ jẹ rehọ ahwo ru iruo gaga re a sai wo oware kpobi nọ a gwọlọ, re a seba ewhu. Oghẹrẹ iwou nọ a bọ i dhesẹ nọ a gwọlọ rria bẹdẹ bẹdẹ, rekọ a whu ghele.

Oghẹrẹ iroro evona ivie ahwo China a wo re, fikiere a te je ru imu emajiki. Ovie ahwo China jọ nọ a re se Qin Shi Huang ọ ta kẹ ọgba-eriariẹ jọ dede nọ o ru umu nọ o rẹ whaha uwhu kẹe. Rekọ eware jọ nọ a ro ru imu kẹe i re mu gaga, yọ ẹsejọhọ umu jọ nọ ọ da, oye u kpe rie.

Evaọ ukpe 1513 C.E, ọzae China jọ nọ a re se Juan Ponce de León nọ ọ rẹ kiotọ eware, o te je bi Abade ologbo Caribbean vrẹ be gwọlọ oware nọ ohwo o re ru nọ ọ gbẹ rọ who ho. Kẹsena o te bi te Florida evaọ America, u kri hi, nọ o lele ahwo ẹwho na họre, a te kpei, yọ ọ sae ruẹ oware nọ ọ jẹ gwọlọ na tobọ họ.

Fẹro sa-sa nọ i je su Ijipti, ivie ahwo China gbe ahwo nọ a rẹ kiotọ eware, aikpobi na a gwọlọ nọ a re whu vievie he. Dede nọ edhere nọ a je ro le oware nọ a gwọlọ na u woma ha, ono ọ rẹ sae ta nọ oware nọ a je le na u yoma? Uzẹme riẹ họ, ohwo ọvo ọ gwọlọ nọ o re whu vievie he.

Fikieme ohwo ọvo ọ gbẹ rọ gwọlọ nọ o re whu hu? Ebaibol na ọ kẹ uyo onọ yena. Ebaibol na ọ ta nọ Jihova, * “o ru eware kpobi woma re evaọ ezi rai; o te fi uzuazọ ibẹdẹ họ eva ohwo.” (Ọtausiuwoma Na 3:11) Ma gwọlọ nọ ma rẹ rria bẹdẹ  bẹdẹ evaọ akpọ na, orọnikọ ikpe 80 hayo dina bu vi ere ọvo ho. (Olezi 90:10) Oware nọ ma gwọlọ kpobi oye.

Fikieme Jihova o ro fi “uzuazọ ibẹdẹ” họ eva mai ahwo-akpọ? Orọnikọ Jihova o ru onana re o wha idhọvẹ se omai hi. Ọ ya eyaa nọ o ti si uwhu no otọ riẹriẹriẹ. Ebaibol na ọ ta kpahe epanọ Ọghẹnẹ o ti ro si uwhu no otọ gbe epanọ ahwo-akpọ a te rọ rria bẹdẹ bẹdẹ.—Rri ẹkpẹti na,  “Uwhu U ti no Otọ Riẹriẹriẹ.”

Jesu Kristi ọ ta vevẹ nọ: “Onana họ uzuazọ ebẹdẹ bẹdẹ, re a riẹ owhẹ nọ whẹ ọvo họ uvi Ọghẹnẹ, gbe Jesu Kristi ọnọ who vi.” (Jọn 17:3) Fikiere irẹro mai inọ uwhu u ti no otọ, e rrọ oware ufofe he. Jesu ọ ta vevẹ nọ Ọghẹnẹ ọvo họ ohwo nọ ọ rẹ sai si uwhu no otọ kẹ omai riẹriẹriẹ.