OWARE NỌ U GBE BI RO MU AHWO JỌ ẸRO HO: Ekiakiẹ jọ nọ a ru kẹle na i dhesẹ nọ, evaọ oghẹrẹ nọ akpọ na ọ rro te na, ẹko ima gbidigbidi rai e rrọ ẹko-isi ọvo. Ma te roro kpahe epanọ ehrugbakpọ na ọ rro te, ahwo buobu a rẹ nọ inọ, ‘Kọ ẹvẹ Ọghẹnẹ ọ sai ro muẹrohọ oware nọ ohwo akpọ nọ o te oware ovo ho o bi ru?’

OWARE NỌ EBAIBOL NA O WUHRẸ: Orọnikọ Ọghẹnẹ ọ rehọ Ebaibol na kẹ omai no re o gbolo aro kufiẹ hẹ. Rekọ, Jihova ọ kẹ omai imuẹro nọ: “Ẹro mẹ me re ti ro su owhẹ.”—Olezi 32:8.

Roro kpahe Hega, aye obọ Ijipti jọ nọ ọ rria oware wọhọ ikpe odu ọvo gbe egba izii (1,900) nọ e vrẹ no taure Kristi ọ tẹ te ze. Sarai nọ ọ jọ oni-uwou na ọ whọku Hega fikinọ o je veghe uzou kẹe, fiki oyena, Hega ọ tẹ dhẹ kpohọ obọ igbrẹwọ. Kọ Ọghẹnẹ o gbolo aro kẹ Hega fikinọ o veghe uzou? Ebaibol na ọ ta nọ: “Ukọ ỌNOWO na ọ tẹ rue riẹ,” jẹ ta kẹe nọ, “ỌNOWO na o yo uru oviẹ ra no.” Hega ọ tẹ ta kẹ Jihova nọ: “Whẹ họ Ọghẹnẹ nọ ọ rẹ ruẹ ude.”—Emuhọ 16:4-13.

“Ọghẹnẹ nọ ọ rẹ ruẹ ude” na ọ be ruẹ owhẹ re. Wọhọ oriruo: Oni-ọmọ ọ rẹ rẹrote emọ esese riẹ gaga. Nọ ọmọ ọ tẹ rrọ kakao, ẹsiẹe ọsẹgboni riẹ a rẹ mae rẹrotei. Epọvo na re, Ọghẹnẹ ọ rẹ rẹrote omai nọ ma tẹ rrọ ẹbẹbẹ jẹ gwọlọ obufihọ. Jihova ọ ta nọ, ‘Mẹ be ria oria ukpehru gbe oria Ọrẹri, rekọ mẹ rrọ kugbe ahwo nọ a wo eva owhrori gbe ẹzi omaurokpotọ, re mẹ jaja ẹzi enọ erọ omakpotọ jẹ jaja eva iruori.’—Aizaya 57:15.

Rekọ whọ sae roro nọ: ‘Oghẹrẹ vẹ Ọghẹnẹ o bi ro muẹrohọ omẹ? Kọ oware kpobi nọ me ru o re ro gu omẹ ẹdhọ, manikọ ọ rẹ kpairoro vrẹ ejọ fikinọ ọ riẹ oghẹrẹ ohwo nọ mẹ ginẹ rrọ evaọ obeva?’