Fikieme Devidi ọ rọ gwọlọ nọ Ọghẹnẹ ọ daezọ riẹ? Kọ Ọghẹnẹ ọ be daezọ ra? Fikieme o rọ rrọ bẹbẹ kẹ ahwo jọ re a rọwo nọ Ọghẹnẹ ọ be daezọ rai?

Oware jọ nọ o be whae ze họ, keme Ọghẹnẹ o kpehru vi omai ahwo-akpọ kpobi. Nọ o te rri no obọ odhiwu ze, erẹwho akpọ na soso “ewọhọ ogẹ-ame nọ usu no ogẹgẹ ze, a re kele ai wọhọ ovu nọ ọ yagha owawọ eware.” (Aizaya 40:15) Ọzae jọ nọ ọ rọwo Ọghẹnẹ hẹ ọ ta nọ: “Omorro o rẹ lẹliẹ ahwo ta nọ Ọghẹnẹ jọ ọ rrọ oria jọ nọ ọ be daezọ mai omomọvo gbe eware nọ ma bi ru.”

Ofariẹ, ahwo jọ a re roro nọ fiki iruemu iyoma rai, Ọghẹnẹ ọ sae daezọ rai hi keme a fioka evaọ aro riẹ hẹ. Wọhọ oriruo, ọzae jọ nọ a re se Jim, ọ ta nọ: “Ẹsikpobi mẹ jẹ hae lẹ re mẹ sae kpọ ofu mẹ, rekọ u re kri hi, ofu mẹ ọ vẹ wariẹ kpare ze. Me te ti ku ei họ nọ, fiki eva egaga mẹ oyejabọ nọ Ọghẹnẹ ọ gbẹ be sai ro fiobọhọ kẹ omẹ hẹ na.”

Kọ Ọghẹnẹ o thabọ no omai te epanọ ọ gbẹ sai ro muẹrohọ omai hi? Kọ ẹvẹ o bi gine rri omai ahwo-akpọ nọ a gba ha? Ohwo-akpọ ọvuọvo ọ sae kiyo enọ yena ha ajokpa Ọghẹnẹ ọvo. Rekọ Ebaibol na ọ kẹ omai imuẹro inọ Ọghẹnẹ o thabọ no omai vievie he te epanọ ọ gbẹ sae rọ daezọ mai hi. Ebaibol na ọ tubẹ ta nọ: “Otheri omai ọvuọvo abọ họ.” (Iruẹru Ikọ 17:27) Ma te jọ izoẹme ene nọ e rrọ obaro na ta kpahe oghẹrẹ nọ Ọghẹnẹ o ro dhesẹ nọ ọ be daezọ mai omomọvo gbe epanọ o ro ru ere kẹ ahwo jọ no.