Ima ahwo buobu evaọ akpọ na nẹnẹ a rọwo nọ Uvie Ọghẹnẹ ọvo họ ẹruore nọ a wo kpahe obaro na. A be rọ aro kele oriruo nọ Jesu o fihotọ, ọnọ o wuhrẹ ilele riẹ re a lẹ nọ: “Uvie ra oze, epanọ a rọ obọ odhiwu ru orọ eva ra, ru re a jọ akpọ na ru ere re.”​—⁠Matiu 6:⁠10.

Dede nọ o be were ahwo buobu re a ta kpahe Uvie Ọghẹnẹ, egagọ buobu a bi se gbe oware ovo ho. Fiki onana, ogbiku jọ nọ a re se H. G. Wells ọ ta nọ: “Uvie Odhiwu họ oware nọ Jesu ọ jẹ mai wuhrẹ ahwo kpahe, rekọ ichọche buobu nẹnẹ nọ a se omarai Ileleikristi a be rehọ iẹe evevere.”

Isẹri Jihova a wọhọ ichọche itieye na ha, keme a be rrọ ọwhọ ta kpahe Uvie Ọghẹnẹ. Wọhọ oriruo, a bi kere emagazini mai nana nọ who bi se na fihọ evẹrẹ nọ i bu te egba ivẹ gbe udhe (220) soso. Unu nọ a bi printi evaọ uvitha ovuovo i bu te ima 46, nọ u dhesẹ nọ emagazini nana a be mae jọ akpọ na soso ghale. Kọ eme họ ugogo oware nọ emagazini na ọ be ta kpahe? Muẹrohọ odẹ nọ a bi se emagazini nana: Uwou-Eroro Na Nọ U Bi Whowho Uvie Jihova.  *

Kọ fikieme Isẹri Jihova a be rọ rehọ ẹgba gbe oke rai kpobi whowho Uvie Ọghẹnẹ? Uzẹme riẹ họ, ma rọwo nọ Uvie Ọghẹnẹ họ uzoẹme nọ o dhe Ebaibol na soso duwu. U te no ere no, u te je mu omai ẹro nọ Uvie Ọghẹnẹ ọvo họ ifue rọkẹ ebẹbẹ nọ ahwo-akpọ a be rẹriẹ ovao dhe nẹnẹ.

Isẹri Jihova a be daoma rọ aro kele oriruo Jesu Kristi be ta kẹ amọfa kpahe Uvie Ọghẹnẹ. Evaọ okenọ Jesu ọ jọ otọakpọ jẹ ta usiuwoma, Uvie Ọghẹnẹ họ oware nọ o mae jariẹ oja, yọ oye ọ jẹ mai wuhrẹ ahwo kpahe. (Luk 4:43) Kọ fikieme Jesu o ro se Uvie na gboja tere? Kọ eghale vẹ Uvie na o te wha se owhẹ? Iviena se kpahe iyo nọ Ebaibol na ọ kẹ evaọ izoẹme nọ e rrọ obaro na.