Evaọ okenọ mẹ jọ ọmaha, ma jẹ rria kẹle okpẹwho Leipzig, evaọ Germany, yọ o nwani thabọ no uwhru orẹwho Czech avọ Polish hi. Nọ mẹ jọ ikpe ezeza, ma tẹ kwa kpohọ obọ Brazil je no etẹe kpohọ Ecuador fiki iruo ọsẹ mẹ.

Nọ mẹ jọ ikpe 14, me te je kpohọ isukulu evaọ obọ Germany, yọ evaọ isukulu na mẹ jẹ rria. Fikinọ oria na u thabọ no obonọ ọsẹgboni mẹ a jẹ rria evaọ obọ America, mẹ ọvo mẹ jẹ rẹrote omamẹ. Oware nọ u je omẹ ọvo mẹ jẹ hai ru. Yọ mẹ jẹ daezọ oghẹrẹ nọ uruemu mẹ u je ro kpomahọ amọfa ha.

Nọ mẹ jọ ikpe 17, amọ ọsẹgboni mẹ a te zihe ziọ obọ Germany. Evaọ oke ọsosuọ me te je lele ai rria, rekọ fikinọ mẹ gwọlọ nọ mẹ rẹ jọ orọ obọmẹ, me gbe je yoẹme kẹ ai hi. Fikiere nọ me te ikpe 18 no, mẹ tẹ dhẹ no uwou.

Nọ u te oke jọ no, oma o tẹ jẹ kpakpa omẹ re mẹ riẹ ẹjiroro uzuazọ. Me yeri oghẹrẹ uzuazọ sa-sa je kuomagbe ikoko buobu, rekọ mẹ tẹ jiroro nọ mẹ rẹ rehọ uzuazọ mẹ kiẹ oghẹrẹ nọ otọakpọ na u woma te riwi bẹsenọ ahwo-akpọ a te raha iẹe no.

Mẹ tẹ kwa no Germany, dẹ imotosaikoro, jẹ rọ ovao rri obọ Africa. U kri hi, imotosaikoro mẹ ọ tẹ raha, me te zihe kpobọ Europe nyae ruẹrẹ iẹe. Ẹdẹjọ mẹ tẹ dhẹ kpohọ unueri jọ nọ o jọ orẹwho Portugal. Mẹ tẹ nyase imotosaikoro mẹ ba etẹe, re mẹ ruọ okọ-oyibo kpohọ obonọ mẹ be nya.

Kẹsena me te kuomagbe izoge jọ nọ e gwọlọ fa Abade ọ Atlantic vrẹ. Usu rai mẹ jọ ruẹ Laurie, aye nọ mẹ rehọ uwhremu na. Ma tẹ kaki bi kpohọ ukoliko ọ Caribbean. Ma tẹ rria Puerto Rico omojọ, uwhremu na ma te zihe kpohọ obọ Europe. Ma tẹ jẹ gwọlọ okọ-oyibo nọ ma rẹ bọ uwou fihọ nọ ma rẹ rria evaọ abade na. Ma gwọlọ emerae esa soso rekọ ma ruẹ hẹ, ukuhọ riẹ ma tẹ tubẹ kpairoro vrẹ. Uwhremu na ahwo Germany a tẹ gba omẹ họ iruo isoja.

Ukpe ovo gbe emerae esa me lele ahwo Germany ru iruo isoja. Evaọ etoke yena mẹ avọ Laurie ma rọ rọo je muọ  uzuazọ nọ a re ro kpohọ erẹ ọvo họ eyeri. Taure me te ti mu iruo isoja na họ, ma dẹ ekpe okọ-oyibo jọ. Evaọ okenọ mẹ rọ jọ iruo isoja na, ma tẹ jẹ rọ ẹmẹrera jọ okọ na ru iruo bẹsenọ ma ro ru ei fihọ epanọ a sai ro bi ei. Ẹjiroro nọ ma je ro ku okọ na họ, re ma rriae eva jẹ hai bi ei nya akpọ na wariẹ. Nọ me no iruo isoja no je bi ru iruo evaọ okọ na, ẹdẹjọ Isẹri Jihova a tẹ ta usiuwoma kẹ omẹ je mu Ebaibol na họ ewuhrẹ kugbe omẹ.

Evaọ oke ọsosuọ, o ruọ omẹ re me nwene oghẹrẹ uzuazọ nọ me je yeri hi. Ghele na, mẹ avọ aye mẹ ma te ti kere obe orọo kugbe egọmeti, me te je siobọno isigareti ivovo. (Ahwo Ẹfẹsọs 5:5) Rekọ ma gwọlọ nọ ma rẹ gbẹ rehọ oke mai kpobi kpohọ eria avọ eria nyae kiẹ kpahe emamọ eware buobu nọ Ọghẹnẹ ọ ma.

Uzẹme riẹ họ, o gwọlọ nọ me re ru inwene evaọ uzuazọ mẹ. Fikinọ me wo omorro gbe uruemu mẹ rẹ jọ omẹ sa, mẹ rẹroso omobọ mẹ gaga je roro nọ mẹ rẹ sai ru oware kpobi. Uzuazọ oriobọ me je yeri.

Ẹdẹjọ me te se Ovuẹ obọ Ugbehru Jesu na. (Matiu, uzou avọ 5 rite 7) Mẹ kaki wo otoriẹ oware nọ Jesu ọ ta nọ ohwo o re ru re ọ sai wo evawere he. Wọhọ oriruo, Jesu ọ ta nọ eva e were ahwo nọ ohọo gbe uruame u re kpe. (Matiu 5:6) Me te je roro nọ ẹvẹ ohwo nọ ohọo gbe uruame u bi kpe ọ rẹ were eva. Nọ me bi wuhrẹ nyaharo na, mẹ tẹ te ruẹ vuhumu nọ o gwọlọ nọ ahwo-akpọ kpobi a riẹ nọ u fo re a gọ Ọghẹnẹ, yọ o gwọlọ omaurokpotọ re ma rọwo nọ ere o ginẹ rrọ re ma sae gọ Ọghẹnẹ. Oye o soriẹ nọ Jesu ọ rọ ta nọ: “Eva e were enọ e riẹ nọ u fo re a riẹ Ọghẹnẹ.”—Matiu 5:3, NW.

Obọ Germany mẹ avọ aye mẹ ma jọ kaki mu Ebaibol na họ ewuhrẹ, kẹsena ma tẹ kwa kpohọ obọ France, uwhremu na ma tẹ te kwa kpohọ obọ Italy. Oria kpobi nọ ma te, ma jẹ jọ ruẹ Isẹri Jihova. Uyoyou gbe okugbe nọ o rrọ udevie rai u re gbe omẹ unu gaga. Mẹ tẹ ruẹ vuhumu nọ Isẹri Jihova a be rria wọhọ inievo evaọ akpọ na soso. (Jọn 13:34, 35) Uwhremu na mẹ avọ aye mẹ, ma tẹ te họ-ame je zihe ruọ Isẹri Jihova.

Nọ mẹ họ-ame no, me gbe je ru inwene evaọ uzuazọ mẹ. Mẹ avọ aye mẹ ma tẹ gwọlọ nọ ma re bi kpohọ obọ Africa, re ma fa Abade ọ Atlantic vrẹ kpohọ obọ America. Nọ mẹ avọ aye mẹ ma jọ udevie abade na, who te rri tabọ tabọ, ame ọvo ọ wariẹ omai họ, evaọ etẹe me jo roro kpahe epanọ ohwo akpọ ọ kawo te evaọ aro Ọghẹnẹ. Fikinọ ma wo emamọ oware ovo nọ ma be jọ evaọ okọ na ru hu, yọ ma wo uvẹ, mẹ tẹ jẹ rehọ oke mẹ kpobi se Ebaibol na. Ikuigbe uzuazọ Jesu evaọ okenọ ọ jọ otọakpọ i gbe omẹ unu gaga. Jesu ọ jọ ohwo ọgbagba o te je wo onaa vi ahwo-akpọ kpobi, ghele na ọ jẹ ya oma ha. Ukpenọ o yeri uzuazọ oriobọ, oreva Ọsẹ riẹ o je ru.

Nọ me roro kpahe oriruo Jesu, mẹ tẹ ruẹ vuhumu nọ u fo re mẹ rehọ Uvie Ọghẹnẹ karo viukpenọ mẹ rẹ rọ eware obọmẹ karo. (Matiu 6:33) Nọ mẹ avọ aye mẹ ma bi te okpa no evaọ obọ America, ma tẹ jiroro nọ ma rẹ rria etẹe re ma rọ egagọ Ọghẹnẹ karo.

Uzuazọ oriobọ nọ me je yeri vẹre na o wha erere ọvo se omẹ hẹ. Areghẹ Ọghẹnẹ họ oware nọ o be kpọ uzuazọ mẹ enẹna. (Aizaya 48:17, 18) Me te je duku ẹjiroro uzuazọ no, koyehọ re ma gọ Ọghẹnẹ je fiobọhọ kẹ amọfa gọe.

Fikinọ mẹ avọ aye mẹ, ma bi fi izi Ebaibol họ iruo, u ru omai si kẹle ohwohwo vi epaọ ọsosuọ no. Ma te je yẹ ọmọtẹ owowoma nọ ọ riẹ Jihova ziezi jẹ be gọe.

Orọnikọ akpọ ọ nwane lọhọ kẹ omai hi. Rekọ avọ obufihọ Jihova, ma gba riẹ mu no inọ ma re thihakọ jẹ rẹroso iẹe re ma sae gọe te urere.—Itẹ 3:5, 6.