U kri hi, me te dhomahọ arozaha oma u ru jaja nọ a rẹ jọ wọ ihweti. Uwhremu na, me te rovie oria nọ ahwo a rẹ nyaze ti jo wuhrẹ epanọ a rẹ wọ ihweti evaọ ẹwho San Leandro, nọ ọ rrọ California evaọ America. Mẹ avọ ọzae jọ nọ ọ jẹ hae wọ ihweti gaga ma jẹ hai wuhrẹ ahwo kugbe. Mẹ wọ ihweti te epanọ oma mẹ o rọ jọ wọhọ ogwara, rekọ onana u fiobọhọ kẹ omẹ ghele he.

Fikinọ ogbẹnyusu mẹ jọ nọ ọ jọ oria nọ me rovie na ọ riẹ nọ mẹ gwọlọ wuhrẹ Ebaibol na, ọ tẹ vuẹ omẹ nọ o ti dhesẹ ohwo jọ kẹ omẹ. Okioke riẹ, Osẹri Jihova jọ ọ tẹ nyaze uwou mẹ. Ọ k’iyo enọ kpobi nọ mẹ nọ riẹ no Ebaibol na ze. Yọ euwa ene soso ọ raha kugbe omẹ. Mẹ tẹ ta kẹe nọ o zihe ze evaọ owọwọ. Nọ o zihe ze, mẹ avọ iẹe ma tẹ wariẹ mu eme Ebaibol họ ẹta rite udevie aso. Eware nọ me wuhrẹ e were omẹ gaga. Fikiere, mẹ tẹ ta kẹe nọ me ti lelie i kpohọ usiuwoma okioke riẹ re mẹ riẹ epanọ ọ be hai ro wuhrẹ ahwo. Oghẹrẹ nọ o je ro rovie Ebaibol rọ k’iyo enọ nọ a nọ riẹ, u je gbe omẹ unu gaga. Mẹ tẹ nwane jiroro oware nọ me ti ru!

Fikiere, mẹ tẹ zẹ oria nọ me rovie na re mẹ hai lele Osẹri Jihova nọ ọ ta usiuwoma kẹ omẹ na kpohọ usiuwoma ẹsikpobi. Evaọ amara Asoi ukpe 1948, mẹ tẹ họ-ame evaọ okokohọ ologbo nọ a ru evaọ oria jọ nọ a re se Cow Palace evaọ San Francisco, California. Ubro obọ urere ukpe ovo yena, me te mu iruo ọkobaro họ, ere a re se Osẹri Jihova nọ ọ rẹ ta usiuwoma oke kpobi.

Mẹ tẹ jẹ ta kẹ Isẹri Jihova na inọ a nyai wuhrẹ obe kugbe oni mẹ. Fikinọ oni mẹ ọ rọwo nọ a wuhrẹ obe kugbei, u kri hi o te zihe ruọ Osẹri Jihova. Dede nọ ahwo uviuwou riẹ a je kpokpo iei, ọ gọ Ọghẹnẹ rite ẹdẹ nọ o ro whu. Ohwo uviuwou mai ọvuọvo o gbe kurẹriẹ viere he.

Evaọ ukpe 1950, mẹ tẹ kwa kpohọ ẹwho Grand Junction evaọ Colorado, etẹe mẹ jọ ruẹ ọmọtẹ nọ a re se Billie. A yẹ riẹ evaọ ukpe 1928, jẹ whẹro evaọ okenọ eki ahwo America o ro kie, onọ u kpomahọ akpọ na soso. Oni riẹ nọ a re se Minnie, ọ jẹ hae rehọ ukpẹ-obọ se Ebaibol na kẹe kaso kaso. Nọ Billie ọ jọ ikpe ene ọ rọ riẹ obe ese, yọ ọ riẹ iku Ebaibol buobu uzuzou. Taure ukpe 1949 u te ti te, oni riẹ ọ tẹ jọ Ebaibol nọ Isẹri Jihova a je wuhrẹ kugbei ruẹ vuhumu nọ orọnikọ ehẹle yọ oria nọ erae e rẹ jọ to ahwo ho, rekọ uki gheghe. (Ọtausiuwoma Na 9:5, 10) Minnie avọ ọzae riẹ a te kurẹriẹ ruọ ukoko Isẹri Jihova.

 Evaọ ukpe 1949 nọ Billie o nwrotọ no isukulu no, o te mu Ebaibol na họ ewuhrẹ ziezi. Ukpenọ ọ rẹ jọ iticha isukulu, ọ tẹ rọ oma riẹ mudhe kẹ Ọghẹnẹ. Billie ọ họ-ame evaọ ukpe 1950, evaọ okokohọ akpọ-soso Isẹri Jihova nọ a ru evaọ Yankee Stadium evaọ New York. Nọ ọ họ-ame no, u kri hi, mẹ tẹ rue riẹ, ma tẹ rọo je mu iruo ọkobaro họ kugbe.

Ẹwho Eugene evaọ Oregon ma ro muhọ, yọ ma wo emamọ egbẹnyusu buobu nọ e rẹ thọrọ omai ẹro ho. Evaọ ukpe 1953, ma tẹ kwa kpohọ ẹwho Grants Pass evaọ Oregon, nyai fiobọhọ kẹ ukoko osese jọ nọ o jọ etẹe. Evaọ urere ukpe yena, a te zizie omai kpohọ eklase avọ 23 isukulu ọ Giliad, isukulu nọ Isẹri Jihova a re jo wuhrẹ imishọnare. Yọ oria na o kẹle South Lansing, evaọ New York.

Evaọ amara Akpegbivẹ ukpe 1954, nọ ma nwrotọ no isukulu Giliad no, mẹ avọ Billie aye mẹ, ma tẹ ruọ arupre kpobọ Brazil. Nọ arupre na ọ ra te auwa ọvo no, ẹjini riẹ jọ o te wo ẹbẹbẹ, rekọ ma sae kpahe ghele evaọ ẹwho nọ a re se Bermuda. Ma tẹ wariẹ ruẹe je muhọ ẹdhẹ, rekọ ẹjini na ọ tẹ wariẹ wo ẹbẹbẹ, ma tẹ jẹ kpahe Cuba. Fikiere o rehọ euwa 36 taure ma te ti te uwou ogha Isẹri Jihova nọ o rrọ Rio de Janeiro evaọ Brazil.

Nọ ma rria omoke jọ no evaọ etẹe, mẹ avọ aye mẹ gbe inievo emetẹ ivẹ efa jọ nọ e jọ imishọnare re, ma te kpohọ Bauru, São Paulo, re ma rovie uwou imishọnare okpokpọ fihọ etẹe. Ahwo nọ a rrọ okpẹwho na a bu te idu udhuvẹ gbe ikpe (50,000), yọ mai họ Isẹri Jihova ọsosuọ nọ e ziọ okpẹwho na.

Ma te mu usiuwoma họ ẹta kẹ ahwo ẹwho na, rekọ efada ichọche Katọlik nọ ọ jọ etẹe o te mu omai họ ẹwọso. Ọ jẹ hai lele omai emuemu nọ ma tẹ rrọ usiuwoma, yọ ọ be ta kẹ ahwo na nọ a gaviezọ kẹ omai hi. Rekọ u kri hi, uviuwou jọ nọ ma ta usiuwoma kẹ a tẹ rọwo nọ ma wuhrẹ obe kugbe ai, uwhremu na a tẹ te họ-ame. Kẹsena amọfa a te mu Ebaibol na họ ewuhrẹ re.

Uviuwou nọ o họ-ame na a wo omoni jọ nọ ọ jọ prẹsidẹnte ogbẹgwae jọ nọ a riẹ gaga evaọ ẹwho na. Ma tẹ gwọlọ nọ ma rẹ haya uwou jọ nọ ogbẹgwae na a bọ re ma jariẹ ru okokohọ. Efada ichọche na ọ tẹ jẹ lẹliẹ ahwo ogbẹgwae na họ nọ a haya riẹ kẹ omai hi. Rekọ prẹsidẹnte na ọ tẹ ta kẹ ahwo ogbẹgwae na nọ: “Wha gbẹ haya uwou na kẹ ai hi, me re no ogbẹgwae na!” Fiki onana, a tẹ haya uwou na kẹ omai.

Evaọ ukpe 1956, a te zizie omai kpohọ okokohọ ubrotọ evaọ Santos, São Paulo. Inievo nọ i bu te 40 soso evaọ ukoko mai a ruọ itreni kpohọ okokohọ na. Nọ ma no okokohọ na kpozi no, ma tẹ ruẹ ileta nọ a vi se omai inọ ma kpohọ iruo ọsẹro ọnyawariẹ. Yọ iruo nana ma ru enwene ikpe 25 evaọ Brazil, nọ ma je ro weze kpohọ ikoko nọ e jọ orẹwho na soso.

Evaọ oke yena, re a no oria ruọ oria o jọ bẹbẹ gaga. Ghele na, ma daoma nya orẹwho na soso wariẹ. Ẹsejọ ma rẹ ruọ imoto, itreni, akẹkẹ, ẹdhighere jẹ tubẹ nya owotọ dede. Okpẹwho ọsosuọ nọ ma kaki weze kpohọ họ Jaú, evaọ São Paulo. Efada ichọche na o kpokpo omai gaga evaọ etẹe.

Ọ ta na: “Wha ta usiuwoma kẹ ‘igodẹ mẹ hẹ!’”

Ma tẹ ta kẹe nọ: “Igodẹ na era ha, erọ Ọghẹnẹ.”

Ma te ru ọruẹrẹfihotọ re ma dhesẹ ividio nọ e ta kpahe iruo usiuwoma ota akpo-soso mai na kẹ ahwo, onọ uzoẹme riẹ o ta nọ, The New World Society in Action. Rekọ efada na avọ ahwo ichọche riẹ a tẹ gwọlọ nọ a rẹ họre omai evaọ oria nọ ma ti jo dhesẹ ifimu na. Kẹsena ma tẹ nwane nyae vuẹ  iporisi. Nọ efada na avọ ahwo ichọche riẹ a nyaze oria nọ ma kokohọ na, a te zere iporisi nọ e rọ igbeke dhe ai. Ogbotu na soso a reawere ifimu na ziezi.

Enwene oria kpobi nọ ma te evaọ oke yena a jẹ hae jọ kpokpo omai. Wọhọ oriruo, a je kpokpo inievo emetẹ ivẹ jọ gaga enọ e jọ ekobaro evaọ ẹwho jọ nọ a re se Brusque, nọ ọ kẹle Blumenau, evaọ Santa Catarina. Rekọ akothiwo rai o wha eghale buobu ze. Ikpe 50 soso e ruọ emu no, yọ ikoko nọ i bu te 60 e rrọ oria na enẹna, a te je wo emamọ Ọgwa Okokohọ nọ a bọ kẹle okpẹwho Itajaí.

Oware jọ nọ u duobọte omai udu gaga evaọ oke nọ ma je ru iruo ọsẹro ọnyawariẹ na họ, nọ ma kuomagbe inievo buobu jẹ ruẹrẹ oma kpahe kẹ okokohọ ologbo jọ nọ ma ru. Evaọ ukpe 1975 rite 1977, mẹ họ ọnọ ọ jọ ohwo-agbara okokohọ ologbo nọ a ru evaọ afe-aroza nọ o jọ Morumbi. Ma te kere ileta se ikoko ekẹle oma nọ i bu te udhusoi re a vi inievo ikpe no ọvuọ ukoko riẹ ze re a ti ru afe-aroza na fo evaọ aso taure ẹdẹ okokohọ na o te ti te.

Nọ ahwo nọ a jẹ fa ebọro a je no afe-aroza na evaọ owọwọ yena, yọ ejọ rai a bi se ẹkoko nọ, “Wha rri ahwo nana avọ iwhere, a roro nọ a te sai ru afe-aroza na fo.” Rekọ, a ru afe-aroza na fo taure udevie-aso u te ti te! U gbe ọzae nọ ọ jẹ rẹrote afe-aroza na unu gaga, fikiere ọ ta nọ, “Iruo nana nọ Isẹri Jihova a rehọ umutho euwa jọ ọvo ru na, o rẹ rehọ ahwo mẹ ẹkpoka soso re a te ru ei re!”

Nọ ọsẹ mẹ o whu no evaọ ukpe 1980, ma te zihe kpobọ America re ma sae rẹrote oni mẹ nọ ọ jọ obọ Fremont, evaọ California. Re ma sai gbe ru iruo ọkobaro na je fiobọhọ kẹ ahwo Portugal nọ a jẹ rria okegbe yena, ma te je ru iruo orufuọ evaọ oke aso. Uwhremu na ma tẹ kwa kpohọ San Joaquin Valley, oria nọ ma jọ ruẹ ahwo Portugal nọ a be rria unuakpọ Sacramento rite Bakersfield. Enẹna, ikoko ẹvẹrẹ Portuguese nọ erọ California i bu te enwene 10 no.

Nọ oni mẹ o whu no evaọ ukpe 1995, ma tẹ jẹ kwa kpohọ Florida nyae rẹrote ọsẹ aye mẹ bẹsenọ o ro whu. Oni riẹ ọ kaki whu evaọ ukpe 1975. Evaọ ukpe 2000, ma tẹ kwa kpohọ ofẹ Colorado jọ nọ o vọ avọ igbehru. Ma jọ etẹe je ru iruo ọkobaro, jẹ ta usiuwoma kẹ ahwo America nọ a be rria ofẹ Navajo gbe ofẹ Ute. Rekọ, evaọ amara Ava ukpe 2014 aye mẹ Billie o te whu.

Eva e be were omẹ gaga inọ mẹ ruẹ Osẹri Jihova nọ ọ rehọ Ebaibol na k’iyo enọ nọ mẹ nọ evaọ ikpe 65 nọ i kpemu! Eva e tẹ jẹ be were omẹ gaga inọ mẹ jọ Ebaibol na kiẹ sọ eware nọ Osẹri Jihova na o wuhrẹ omẹ na ginọ uzẹme. Onana o lẹliẹ omẹ yeri uzuazọ evevọwẹ evaọ egagọ Ọghẹnẹ.