Cameron: Eva e were omẹ nọ mẹ rọ wariẹ ruẹ owhẹ, Jon. Uwuhrẹ Ebaibol nọ mẹ avọ owhẹ ma be hai ru na o be were omẹ gaga. * Kọ ẹvẹ eware e rrọ?

Jon: E rrọ ziezi.

Cameron: U woma. Ẹdẹdekọ nọ mẹ nyaze, ma ta kpahe oware nọ o lẹliẹ Isẹri Jihova rọwo nọ ukpe 1914 Uvie Ọghẹnẹ u ro muhọ esuo. * Wọhọ epanọ ma ta evaọ ẹdẹ yena, ma jọ eruẹaruẹ nọ e rrọ obe Daniẹl uzou avọ 4 ruẹ oware nọ o kẹ omai imuẹro yena. Kọ whọ gbẹ kareghẹhọ eruẹaruẹ yena?

Jon: E ta kpahe epanọ Nebukadneza ovie na ọ rọ jọ ewezẹ ruẹ ure ulogbo jọ.

Cameron: Ginọ ere. Nebukadneza ọ jọ ewezẹ ruẹ ure ulogbo jọ nọ u kpehru te obọ odhiwu. O te yo urru ukọ-odhiwu jọ nọ o ta nọ a kie ure na fihọ otọ, rekọ ukọ-odhiwu na ọ tẹ ta nọ a nyasiọ ehri ure na ba. Nọ “asiahrẹ” ọ tẹ vrẹ no, ure na o vẹ te wariẹ ta ze. * Ma tẹ jẹ ta kpahe epanọ eruẹaruẹ na i ro wo orugba ivẹ. Kọ whọ kareghẹhọ epanọ abọ ọsosuọ eruẹaruẹ na i ro rugba?

Jon: Nebukadneza omariẹ oware na o via kẹ, ogbẹrọ ere? Ọ mọ oruẹ ruọ ẹwọ ikpe ihrẹ soso.

Cameron: Nwanọ ere. Esuo Nebukadneza o bru dhe evaọ okenọ ọ rọ mọ oruẹ ruọ ẹwọ na. Rekọ evaọ orugba avivẹ na, a re ti bru esuo Ọghẹnẹ dhe evaọ etoke ihrẹ wọhọ odẹme. Wọhọ epanọ ma ta evaọ ẹdẹ yena, etoke ihrẹ na i muhọ evaọ okenọ a rọ raha Jerusalẹm evaọ ukpe 607 taure Kristi ọ tẹ te ze. No umuo oke yena vrẹ, ovie ọvuọvo ọ gbẹ jariẹ nọ o je su ahwo Ọghẹnẹ evaọ otọakpọ họ. Rekọ nọ etoke ihrẹ na i te kuhọ no, Ọghẹnẹ ọ vẹ te rehọ Osu ọkpokpọ nọ o ti su ahwo riẹ mu evaọ obọ odhiwu. Koyehọ urere etoke ihrẹ na Uvie Ọghẹnẹ u ti ro muhọ esuo evaọ obọ odhiwu. Ma ta kpahe oke nọ etoke ihrẹ na i ro muhọ no vẹre. Fikiere, ma tẹ sae riẹ epanọ etoke ihrẹ na i kri te, ma te riẹ okenọ Uvie Ọghẹnẹ u ro muhọ esuo. Kọ who bi wo otoriẹ ẹme mẹ na?

Jon: Ẹhẹ, ọkiẹkpemu nana ọ lẹliẹ omẹ kareghẹhọ eware nọ ma ta ẹdẹdekọ na.

Cameron: U woma. Joma ta kpahe epanọ etoke ihrẹ na i kri te. Mẹ wariẹ se kpahe uzoẹme nana re mẹ sai ru ei vẹ kẹ owhẹ. Fikiere mẹ te daoma ru ei vẹ kẹ owhẹ.

Jon: OK.

Cameron: Evaọ abọ ọsosuọ eruẹaruẹ nana nọ i rugba kpahe Nebukadneza na, etoke ihrẹ na yọ ikpe ihrẹ gheghe. Rekọ evaọ orugba avivẹ nọ u kie kpahe Uvie Ọghẹnẹ na, etoke ihrẹ na yọ ikpe ihrẹ gheghe he.

Jon: Fikieme whọ rọ ta ere?

Cameron: Kareghẹhọ nọ etoke ihrẹ na i muhọ evaọ okenọ a rọ raha Jerusalẹm evaọ ukpe 607 taure Kristi ọ tẹ te ze. Ma te kele no umuo ukpe yena ze, ikpe ihrẹ gheghe o vẹ rehọ omai ziọ ukpe 600 taure Kristi ọ tẹ te ze. Rekọ ugogo oware ovo kpahe esuo Ọghẹnẹ o via evaọ ukpe yena ha. U te no ere no, ma ta nọ evaọ okenọ Jesu ọ jọ otọakpọ, ọ ta nọ etoke ihrẹ na i ri kuhọ họ.

Jon: Ee, ginọ ere. Mẹ kareghẹhọ.

Cameron: Fikiere, etoke ihrẹ na orọnikọ ikpe ihrẹ gheghe he, rekọ yọ etoke lelehie.

Jon: Ẹvẹ u lehie te?

Cameron: Obe Eviavia nọ o rọwo-kugbe obe Daniẹl u fiobọhọ kẹ omai riẹ oghẹrẹ nọ ma sai ro kele epanọ etoke ihrẹ na i kri te. O fodẹ etoke esa gbe ubro inọ i bu te edẹ odu ọvo, egba ivẹ gbe udhosa (1,260). * Fikiere, akuava etoke esa gbe ubro na họ etoke ihrẹ na, koyehọ edẹ idu ivẹ, egba isoi gbe udhe (2,520). Ẹme na o bi vẹ owhẹ ẹro?

Jon: Ẹhẹ, o bi vẹ omẹ ẹro. Rekọ mẹ ruẹ oghẹrẹ nọ onana u ro dhesẹ nọ ukpe 1914 Uvie Ọghẹnẹ u ro muhọ esuo ho.

Cameron: U woma, joma ta kpahe oghẹrẹ nọ u ro kie kpahe Uvie Ọghẹnẹ. Evaọ ẹsejọ, nọ eruẹaruẹ Ebaibol e tẹ fodẹ ẹdẹ u re dikihẹ kẹ ẹgbukpe. * Ma tẹ rọ ẹdẹ ọvo ẹgbukpe ro kele iei, etoke ihrẹ na o rẹ kẹ omai ikpe idu ivẹ, egba isoi gbe udhe (2,520). Ma te kele no ukpe 607 taure Kristi ọ tẹ te ze rite ukpe 1914, ma re wo ikpe idu ivẹ, egba isoi gbe udhe (2,520). * Ere ma rọ riẹ nọ ukpe 1914 etoke ihrẹ na i ro kuhọ nọ a rọ rehọ Jesu mu Ovie Uvie Ọghẹnẹ. Yọ anwọ ukpe 1914 ze, ikpeware buobu e be via evaọ akpọ na nọ i dhesẹ nọ edẹ urere nọ Ebaibol ọ ruẹaro rai na ma rrọ na.

Jon: Oghẹrẹ ikpeware vẹ?

Cameron: Roro kpahe oware nọ Jesu ọ ta evaọ obe Matiu 24:7. Nọ ọ jẹ ta kpahe eware nọ e te via evaọ okenọ isuẹsu riẹ i ti muhọ evaọ obọ odhiwu, ọ ta nọ: “Orẹwho o rẹ te kpareso orẹwho, uvie o rẹ te kpareso uvie, yọ no oria ruọ oria ohọo u re ti mu, etọ i re ti nuhu.” Muẹrohọ nọ Jesu ọ ta nọ ohọo u re ti mu, yọ etọ i re ti nuhu evaọ etoke nana. Anwọ ukpe 1914 ze, akpọ na soso ọ rọ ẹro ruẹ eware edhadha no, ogbẹrọ ere?

Jon: Ginọ uzẹme.

Cameron: Evaọ oria Ebaibol nana, Jesu ọ tẹ jẹ ta kpahe emo nọ a ti fi nọ Uvie Ọghẹnẹ u te muhọ esuo no. Yọ obe Eviavia o tẹ jẹ ta kpahe emo nọ a ti fi evaọ edẹ urere nana, orọnikọ emo ototọ gheghe he rekọ emo nọ i ti kpomahọ akpọ na soso. * Kọ whọ kareghẹhọ ukpe nọ ẹmo akpọ ọsosuọ o ro duwu lahwe?

Jon: Ukpe 1914, ukpe ovona nọ whọ be ta nọ  Jesu o ro muhọ esuo na! Me ri roro iei kpohọ abọ yena vẹre he.

Cameron: Nọ ma te roro kpahe eruẹaruẹ etoke ihrẹ na gbe eruẹaruẹ Ebaibol efa nọ e ta kpahe edẹ urere na, ma rẹ ruẹ nọ ginọ uzẹme. U mu omai Isẹri Jihova ẹro nọ ukpe 1914 a rọ rehọ Jesu mu Ovie Uvie Ọghẹnẹ, yọ ukpe ovo yena edẹ urere uyerakpọ nana i ro muhọ. *

Jon: O lọhọ tere he re ohwo ọ sae wo otoriẹ ẹme nana.

Cameron: Uzẹme whọ ginẹ ta na. Wọhọ epanọ mẹ ta ẹsiẹ na, makọ omẹ dede mẹ kaki wo otoriẹ riẹ evaọ oke ọsosuọ họ. Rekọ ro no eware nọ ma ta na ze, o make rọnọ a jọ Ebaibol na fodẹ ukpe 1914 gbiae he, whọ ruẹ nọ eware nọ Isẹri Jihova a rọwo kpahe ukpe yena, Ebaibol na a rehọ e rai no ze.

Jon: Ee ginọ ere, uruemu yena nọ wha wo na o rẹ were omẹ gaga, keme wha rẹ rehọ iwuhrẹ rai kpobi no Ebaibol ze. Wha rẹ ta eme obọrai hi. Rekọ u bi gbe omẹ unu epanọ onana o rọ ga te enẹ. Kọ fikieme Ọghẹnẹ ọ gbẹ nwane jọ Ebaibol na vuẹ omai inọ ukpe 1914 Jesu o ti ro muhọ esuo evaọ obọ odhiwu hu?

Cameron: Yọ emamọ onọ whọ nọ na, Jon. Uzẹme riẹ họ eware buobu e riẹ nọ a jọ Ebaibol na fodẹ gbiae he. Kọ fikieme Ọghẹnẹ ọ rọ kuvẹ re a kere Ebaibol na evaọ oghẹrẹ nọ ohwo ọ rẹ rọ daoma re ọ tẹ sai wo otoriẹ riẹ? Kọ o te were owhẹ re ma ta kpahe oyena evaọ ẹdẹfa nọ me te zihe ze?

Jon: O te were omẹ.