Emọ ra a rẹ sai you Ọghẹnẹ otẹrọnọ a ruẹ eware nọ i dhesẹ nọ Ọghẹnẹ ọ rrọ gbe nọ o you rai. Re a sai you Ọghẹnẹ, o gwọlọ nọ a rẹ riẹ oghẹrẹ ohwo nọ Ọghẹnẹ ọ rrọ. (1 Jọn 4:8) Wọhọ oriruo, u fo nọ a rẹ riẹ iyo enọ wọhọ: Fikieme Ọghẹnẹ ọ rrọ ma ohwo-akpọ? Fikieme Ọghẹnẹ ọ rọ kuvẹ kẹ uye-oruẹ? Eme Ọghẹnẹ o ti ru kẹ ahwo-akpọ evaọ obaro?—Se Ahwo Filipai 1:9.

Re whọ sai fiobọhọ kẹ emọ ra you Ọghẹnẹ, o gwọlọ nọ whọ rẹ rọ oriruo ra dhesẹ nọ who you i rie. Nọ a tẹ ruẹ emamọ oriruo ra, a sae rọ aro kele owhẹ.—Se Iziewariẹ 6:5-7; Itẹ 22:6.

Ẹme Ọghẹnẹ o wo ẹgba gaga. (Ahwo Hibru 4:12) Fikiere fiobọhọ kẹ emọ ra re a kake riẹ iwuhrẹ elọlọhọ nọ e riẹe eva. Re Jesu ọ sae nyate udu ahwo nọ o je wuhrẹ, ọ jẹ nọ ae enọ, gaviezọ kẹ ae, yọ ọ jẹ fa otọ Ikereakere na kẹ ae vevẹ. Re whọ sai fiobọhọ kẹ emọ ra re Ẹme Ọghẹnẹ o te ai udu, o gwọlọ nọ whọ rẹ rọ aro kele oghẹrẹ nọ Jesu o je ro wuhrẹ.—Se Luk 24:15-19, 27, 32.

Ofariẹ, ikuigbe Ebaibol kpahe oghẹrẹ nọ Ọghẹnẹ o ro yerikugbe ahwo evaọ oke anwae, e rẹ sai fiobọhọ kẹ emọ riẹ Ọghẹnẹ je you riei. Ebe nọ e rẹ sai fiobọhọ kẹ emọ ru onana e rrọ oria evuẹ Itanẹte www.pr418.com/iso.—Se 2 Timoti 3:16.