“Oware kpobi nọ whọ gwọlọ, vuẹ omẹ, mẹ te rọ evawere ru ei kẹ owhẹ.” O nwane lọhọ re whọ ta ẹme otiọye na kẹ ọrara hayo egbẹrioma gheghe he. Rekọ whọ rẹ sae ta ẹme otiọye kẹ ogbẹnyusu oyoyou ra. O rẹ were egbẹnyusu ekpekpe re a ru eware kẹ ohwohwo.

Ebaibol na o dhesẹ nọ Jihova o re ru eware nọ e rẹ wha evawere se idibo riẹ ẹsikpobi. Wọhọ oriruo, Devidi ovie na nọ ọ jọ ohwo nọ o wo emamọ usu kugbe Ọghẹnẹ ọ ta nọ: “Iruo ibuobu ra nọ who ru, O Ọnowo ỌGHẸNẸ mẹ, iruo igbenu who ru kẹ omai. . . . I bu vi ekele.” (Olezi 40:5) U te no ere no, Jihova o re ru emamọ eware kẹ ahwo nọ a bi ru oreva riẹ dede he, ‘be kẹ ae emuore jẹ be rọ oghọghọ vọ udu rai.’—Iruẹru Ikọ 14:17.

Nọ orọnọ Jihova o re ru eware nọ e rẹ wha evawere se ahwo kpobi na, onana u te dhesẹ nọ ahwo nọ a gwọlọ wo emamọ usu kugbei, a re ru eware nọ i re ru “eva were” Ọghẹnẹ. (Itẹ 27:11) Rekọ eme o gwọlọ nọ who re ru re whọ sai ru Ọghẹnẹ eva were? Ebaibol na ọ kuyo onọ yena inọ: “Jọ ewoma oruo gbe oware nọ who wo nọ whọ rẹ ghale kugbe amọfa o thọrọ owhai ẹro ho, keme idheidhe itieye e rẹ were Ọghẹnẹ ziezi.” (Ahwo Hibru 13:16) Kọ onana u dhesẹ nọ ewoma oruo gbe ọghọ nọ a re ru kẹ amọfa ọvo họ oware nọ o gwọlọ re ma sai ru eva were Jihova?

Ebaibol na ọ ta nọ: “Ababọ ẹrọwọ ohwo ọ rẹ sai ru Ọghẹnẹ eva were ziezi hi.” (Ahwo Hibru 11:6) Muẹrohọ nọ okenọ “Abraham o fi ẹrọwọ họ Jihova” no, ẹsiẹe a ro “sei ogbẹnyusu Jihova.” (Jemis 2:23) Jesu Kristi ọ ta nọ otẹrọnọ ma tẹ gwọlọ wo eghale Ọghẹnẹ, ma re “fi ẹrọwọ họ Ọghẹnẹ.” (Jọn 14:1) Kọ ẹvẹ whọ sai ro wo oghẹrẹ ẹrọwọ nọ Ọghẹnẹ ọ gwọlọ mi enọ o re si kẹle omariẹ? Oware ọsosuọ nọ who re ru họ, who re se Ẹme riẹ, koyehọ Ebaibol na kẹse kẹse. Who te bi ru ere, who ve ti wo “eriariẹ egbagba erọ oreva riẹ.” Kẹsena, whọ vẹ te rọ ere wuhrẹ epanọ whọ sai ro “ru ei eva were ziezi.” Nọ who gbe bi wuhrẹ kpahe Jihova jẹ be daoma fi eware nọ who bi wuhrẹ họ iruo na, ẹrọwọ ra ọ vẹ te ga viere, o ve ti si kẹle owhẹ ziezi.—Ahwo Kọlọsi 1:9, 10.