A yẹ omẹ evaọ ẹwho Baku evaọ orẹwho Azerbaijan. Emọ ivẹ ọsẹgboni mẹ a yẹ, yọ mẹ họ ubreyẹ. Ọsẹ mẹ ohwo egagọ Muslim yọ oni mẹ ohwo egagọ Ju. Ọsẹ mẹ avọ oni mẹ a you ohwohwo gaga, yọ a rẹ wọso egagọ ohwohwo ho. Wọhọ oriruo, ahwo Muslim a rẹ siọ emuọriọ ba no ohiohiẹ rite owọwọ evaọ amara avọ izii rai nọ a re se Ramadan, yọ evaọ amara nana, oni mẹ o re fiobọhọ kẹ ọsẹ mẹ, tube lele iei kpobọ egagọ Muslim dede. Yọ ọsẹ mẹ o re fiobọhọ kẹ oni mẹ re, wọhọ oriruo, nọ oni mẹ o te bi ru ehaa Ọnyavrẹ nọ ahwo egagọ Ju a re ru na, ọsẹ mẹ o re kpokpo iei hi. Ma jọ uwou mai wo obe egagọ ahwo Muslim nọ a re se Koran, orọ egagọ ahwo Ju nọ a re se Torah, ma te je wo Ebaibol na.

Egagọ Muslim mẹ mae whomahọ, yọ mẹ rọwo nọ Ọghẹnẹ ọ rrọ. Rekọ me wo enọ buobu nọ i je kpokpo omẹ udu. Wọhọ oriruo: ‘Fikieme Ọghẹnẹ ọ rọ ma ahwo dede? Kọ ọ ma ahwo re a tẹ ruẹ uye bẹ no o ve gbolo ai fihọ erae ehẹle re a jọ etẹe to bẹdẹ bẹdẹ?’ Ahwo a rẹ ta nọ oware kpobi nọ o via yọ oreva Ọghẹnẹ, fikiere u te je gbe omẹ unu sọ, ‘Ọghẹnẹ o re si uye se ahwo, kẹsena oma o vẹ be were iẹe nọ ahwo a tẹ be ruẹ uye.’

Okenọ mẹ jọ ikpe 12, me te muọ olẹ ahwo Muslim nọ a re se namaz na họ ẹlẹ, yọ isiasoi a rẹ lẹ olẹ nana okpẹdẹ. Evaọ oke yena ọsẹ mẹ o te fi omẹ avọ oniọvo mẹ ọkpako họ isukulu ahwo Ju. Usu eware jọ nọ a je wuhrẹ omai họ, iwuhrẹ egagọ ahwo Ju gbe ẹvẹrẹ Hibru. K’ohiohiẹ k’ohiohiẹ evaọ obọ isukulu, ma rẹ lẹ olẹ egagọ ahwo Ju. Rekọ mẹ jẹ hae jọ obọ uwou lẹ olẹ namaz na taure mẹ tẹ te jọ obọ isukulu lẹ orọ egagọ ahwo Ju na.

Oma o jẹ kpakpa omẹ gaga kpahe epanọ mẹ sae rọ ruẹ iyo enọ nọ i je kpokpo omẹ udu na. Kẹse kẹse mẹ jẹ hae nọ iwuhrẹ na nọ: “Fikieme Ọghẹnẹ ọ rọ ma ahwo-akpọ? Ẹvẹ Ọghẹnẹ o bi rri ọsẹ mẹ nọ ọ rrọ egagọ ahwo Muslim na? Ọsẹ mẹ yọ emamọ ohwo, rekọ fikieme a bi ro rri rie inọ ekpehre ohwo evaọ aro Ọghẹnẹ? Fikieme Ọghẹnẹ ọ rọ ma ọsẹ mẹ?” Umutho iyo nọ a jẹ kẹ omẹ i je v’omẹ ẹro ho, yọ e gba ha.

Oware jọ nọ o via evaọ ukpe 2002 u ru nọ Ọghẹnẹ ọgọ o ro no omẹ oma riẹriẹriẹ. Nọ ma nwane kwa kpobọ Germany nọ oka ovo o vrẹ no,  okie o te ki ọsẹ mẹ, ọ gbẹ riẹ oware ovo nọ o be via ha, ọ tẹ wọhọ ohwo nọ o whu no. Ẹsikpobi mẹ jẹ lẹ se Ọghẹnẹ kpahe oma ọsẹ mẹ na gbe epanọ eware i re ro woma kẹ uviuwou mai. Fikinọ u mu omẹ ẹro nọ Ọghẹnẹ o wo ogaga nọ ọ sai ro ru oware kpobi jẹ tubẹ kpare ohwo no uwhu ze, mẹ tẹ jẹ lẹ se Ọghẹnẹ kẹdẹ kẹdẹ re o siwi uzuazọ ọsẹ mẹ. Me je roro nọ ‘Ọghẹnẹ ọ te siọ olẹ mẹ ọmọtẹ ọboba nana ba eyo ho.’ Me fi eva mẹ kpobi họ Ọghẹnẹ inọ o ti ru onana kẹ omẹ. Rekọ ọsẹ mẹ o te whu ghele.

Fikinọ Ọghẹnẹ ọ sai ru oware ovo kpahe oma ọsẹ mẹ na ha, akpọ o te no omẹ oma. Me te je roro nọ, ‘o wọhọ nọ edhere nọ mẹ be rọ lẹ o woma ha, hayo Ọghẹnẹ ọ rrọ họ.’ Fiki oghẹrẹ nọ akpọ o gbe omẹ unu te, mẹ gbẹ jẹ sae lẹ olẹ namaz he. Egagọ efa i gbe si omẹ urru hu, fikiere me te dhugbe ku ei họ nọ Ọghẹnẹ ọ rrọ họ.

Evaọ ẹdẹjọ nọ emerae ezeza e vrẹ no, Isẹri Jihova a tẹ nyaze te ta usiuwoma kẹ omai. Fikinọ ma rri egagọ nọ i se omai rai Ileleikristi inọ a fioka ha, mẹ avọ oniọvo mẹ ma tẹ jẹ gwọlọ rọ areghẹ dhesẹ kẹ ae nọ a riẹ oware ovo ho. Ma tẹ nọ ae nọ: “Fikieme Ileleikristi a rẹ rọ gọ Jesu, uruwhere, Meri, gbe emema efa, kpakiyọ onana o wọso Izi Ikpe na?” Isẹri Jihova na a tẹ jọ Ebaibol na dhesẹ kẹ omai nọ u fo vievie he re Ileleikristi uzẹme a gọ emema, gbe nọ Ọghẹnẹ ọvo u fo nọ a rẹ lẹ se orọnikọ oware ofa jọ họ. U te gbe omẹ unu gaga.

Ma tẹ nọ ae nọ: “Kọ ẹvẹ kpahe uwuhrẹ Esanerọvo? Otẹrọnọ Jesu họ Ọghẹnẹ, ẹvẹ ọ sae rọ ziọ otọakpọ nọ ahwo a ro kpei?” Isẹri Jihova na a tẹ wariẹ rọ Ebaibol na kẹ uyo nana inọ, Jesu yọ Ọghẹnẹ hẹ, gbe nọ avọ Ọghẹnẹ a rrọ ẹrẹrẹe he. Fiki oye a gbẹ rọ rọwo uwuhrẹ Esanerọvo na ha. U te gbe omẹ unu gaga, me te bi roro nọ, ‘Ileleikristi nana i wo ohẹriẹ.’

Ghele na, mẹ gbẹ gwọlọ riẹ oware nọ o soriẹ nọ ahwo a be rọ ruẹ uye je bi whu. Isẹri Jihova na a te dhesẹ obe ọ Eriariẹ Nọ I Re Su Kpohọ Uzuazọ Ebẹdẹ Bẹdẹ, * na kẹ omẹ, onọ izoẹme riẹ jọ e nwane kẹ iyo enọ nọ mẹ jẹ nọ na kpobi. A tẹ nwani mu obe-uwuhrẹ Ebaibol họ kugbe omẹ.

Evaọ uwuhrẹ kpobi, mẹ jẹ hai duku emamọ iyo no Ebaibol na ze rọkẹ enọ mẹ. Mẹ tẹ te riẹ nọ Jihova họ odẹ Ọghẹnẹ. (Olezi 83:18) Uyoyou nọ o kare oriobọ họ uzedhe uruemu riẹ. (1 Jọn 4:8) Ọghẹnẹ ọ ma ahwo-akpọ fikinọ ọ gwọlọ nọ a rria uzuazọ re. Mẹ tẹ te ruẹ vuhumu nọ dede nọ Ọghẹnẹ ọ kuvẹ re eware iyoma e via, o be kẹe uye yọ kẹle na o ti si uye-oruẹ kpobi no bẹdẹ bẹdẹ. Me te je wuhrẹ nọ aghẹmeeyo Adamu avọ Ivi o wha riẹ ze nọ ahwo-akpọ kpobi a be rọ ruẹ uye. (Ahwo Rom 5:12) Yọ usu eware iyoma nọ onana o wha ze họ, uwhu ahwo nọ ma you, wọhọ uwhu ọsẹ mẹ na. Rekọ Ọghẹnẹ o ti si eware iyoma nana kpobi no evaọ akpọ ọkpokpọ nọ ọ be tha na, nọ a te jọ kpare ahwo nọ a whu no zihe ziọ uzuazọ.—Iruẹru Ikọ 24:15.

Uzẹme na nọ me wuhrẹ no Ebaibol na ze o kẹ iyo enọ mẹ kpobi. Mẹ tẹ te wariẹ rọwo nọ Ọghẹnẹ ọ rrọ. Nọ mẹ be riẹ Isẹri Jihova ziezi na, mẹ tẹ te ruẹ vuhumu nọ isẹri na yọ inievo akpọ-soso. Okugbe gbe uyoyou nọ o rrọ udevie rai u si omẹ urru gaga. (Jọn 13:34, 35) Eware nọ me wuhrẹ kpahe Jihova e tẹ wọ omẹ re mẹ gọe, fikiere mẹ tẹ jiroro nọ me re zihe ruọ Osẹri Jihova. Mẹ họ-ame evaọ edẹ 8 amara Ọvo ukpe 2005.

Oghẹrẹ nọ Ebaibol na ọ rọ kẹ iyo enọ mẹ kpobi u nwene oghẹrẹ nọ me je rri uzuazọ vẹre. Otoriẹ uvevẹ nọ me wo no Ẹme Ọghẹnẹ ze, o lẹliẹ udu te omẹ otọ. Me bi wo evawere gbe omosasọ fiki ẹruore ẹkparomatha nọ ọ rrọ Ebaibol na, keme mẹ riẹ nọ evaọ akpọ ọkpokpọ nọ ọ be tha na, mẹ te wariẹ ruẹ ọsẹ mẹ.—Jọn 5:28, 29.

Anwọ ikpe ezeza na nọ mẹ avọ ọzae mẹ Jonathan ma rọ rọo jẹ be rọ evawere gọ Jihova kugbe na. Mai imava ma ruẹ vuhumu nọ re a sae riẹ uzẹme na kpahe Ọghẹnẹ, a rẹ romatotọ wuhrẹ Ebaibol na yọ o rrọ lọlọhọ, onana yọ okẹ nọ a rẹ ruẹ obọ riẹ hẹ. Fiki onana oma o rẹ were omai ẹsikpobi re ma ta kpahe ẹruore nọ ma wo kẹ amọfa. Enẹna, mẹ ruẹ vuhumu no nọ orọnikọ Isẹri Jihova yọ ahwo nọ a rrọ oghẹrẹ sa ha rekọ Ileleikristi uzẹme.