Kọ whọ nọ omara enọ itieye na no ẹdẹjọ? O tẹ rrọ ere, riẹ nọ whọ ọvo o rrọ ere kẹ hẹ. Ahwo buobu evaọ akpọ na soso a bi roro kpahe enọ nọ e mai wuzou evaọ uzuazọ. Kọ whọ sae ruẹ iyo rai?

Ahwo buobu a sae ta nọ, “Ee!” Fikieme? Keme a jọ Ebaibol na ruẹ iyo enọ buobu nọ a nọ no. Kọ o te were owhẹ re whọ riẹ oware nọ Ebaibol na ọ ta? Uwuhrẹ Ebaibol ọvọvẹ nọ Isẹri Jihova * a re ru na o sai fiobọhọ kẹ owhẹ.

Uzẹme riẹ họ, o rẹ were ahwo jọ re a wuhrẹ Ebaibol na ha, a rẹ ta nọ: “Me wo uvẹ hẹ.” “Ebaibol na ọ ga hrọ.” “Mẹ riẹ epanọ a re koko oke he.” Rekọ ere o rrọ amọfa oma ha. O rẹ were ae re a wuhrẹ Ebaibol na nọ uvẹ na u te rovie. Joma ta kpahe iriruo ahwo jọ:

• “Me kpohọ ichọche Katọlik, Protẹstant, egagọ ahwo India, egagọ ahwo Buda, me te je wuhrẹ kpahe iwuhrẹ egagọ sa-sa evaọ isukulu ikpehru. Ghele na, mẹ ruẹ iyo enọ nọ mẹ nọ kpahe Ọghẹnẹ hẹ. Ẹdẹjọ, Osẹri Jihova jọ ọ tẹ nyaze uwou mẹ. Fikinọ iyo nọ ọ kẹ omẹ no Ebaibol ze e were omẹ, mẹ tẹ rọwo nọ o wuhrẹ Ebaibol na kugbe omẹ.”—Gill, evaọ obọ England.

• “Me wo enọ buobu kpahe uzuazọ, rekọ iyo nọ epastọ ichọche mẹ ọ kẹ omẹ e vọ omẹ eva ha. Rekọ Osẹri Jihova jọ ọ tẹ rọ Ebaibol na kẹ iyo enọ mẹ kpobi. Nọ ọ nọ omẹ sọ mẹ gbẹ gwọlọ wuhrẹ eware efa evaọ Ebaibol na, mẹ tẹ nwane rọwo.”—Koffi, evaọ obọ Benin.

• “Mẹ jẹ gwọlọ riẹ oware nọ o rẹ via kẹ ahwo nọ a whu no. Me je roro nọ ahwo nọ a whu no a rẹ sae nwa ahwo nọ a rrọ uzuazọ oma, rekọ mẹ jẹ gwọlọ riẹ oware nọ Ebaibol o wuhrẹ kpahe iẹe. Fikiere ogbẹnyusu mẹ jọ nọ ọ rrọ Osẹri Jihova o te mu Ebaibol na họ ewuhrẹ kugbe omẹ.”—José, evaọ obọ Brazil.

• “Mẹ jẹ daoma se Ebaibol na rekọ me je wo otoriẹ riẹ hẹ. Rekọ nọ Isẹri Jihova a nyaze uwou mẹ, a tẹ fotọ eruẹaruẹ Ebaibol sa-sa kẹ omẹ, yọ i vẹ omẹ ẹro ziezi. Mẹ tẹ gwọlọ nọ a wuhrẹ omẹ eware efa.”—Dennize, evaọ obọ Mexico.

• “Me je roro sọ Ọghẹnẹ ọ be ginẹ daezọ mẹ. Fikiere mẹ tẹ jiroro nọ mẹ rẹ lẹ se Ọghẹnẹ, ọnọ o wo Ebaibol na. Okiokiọ riẹ, Isẹri Jihova a te kporo ẹthẹ mẹ, mẹ tẹ rọwo nọ a wuhrẹ Ebaibol na kugbe omẹ.”—Anju, evaọ obọ Nepal.

Eme ahwo nana kpobi e kareghẹhọ omai ẹme Jesu nọ ọ ta nọ: “Eva e were enọ e riẹ nọ u fo re a riẹ Ọghẹnẹ.” (Matiu 5:3) Uzẹme o rrọ inọ o rrọ isiuru ahwo-akpọ kpobi re a wuhrẹ kpahe Ọghẹnẹ. Ọghẹnẹ ọvo ọ rẹ sai ru omai riẹ kpahe ọyomariẹ, yọ o bi ru onana ẹkwoma Ẹme riẹ, Ebaibol na.

Kọ eme họ uwuhrẹ-Ebaibol? Kọ erere vẹ o re noi ze te owhẹ? A te jọ uzoẹme nọ ma ti te na kẹ iyo enọ nana.