Kọ Ọghẹnẹ ọ te kuvẹ re ahwo-akpọ a he kienyẹ ohwohwo je ru ahwo kie ewawa ri bẹdẹ? Ijo, keme wọhọ epanọ ma ruẹ no na, Ọghẹnẹ o ti ru ojọ, ọ te rọ uye-oruẹ gbe okienyẹ kpobi te oba. Ọghẹnẹ ọ gwọlọ nọ whọ riẹ nọ okenọ ọ te rọ jowọ yena o kẹle no. Ẹvẹ o bi ro dhesẹ onana?

Roro kpahe oriruo nana: Nọ whọ tẹ be rọ oria nọ who ri te ẹdẹvo ho kpohọ erẹ, whọ rẹ kake kiẹ jẹ nọ tao re whọ riẹ epanọ edhere na ọ rrọ. Nọ whọ jẹ be ruẹ eware nọ whọ kiẹ via na evaọ edhere na, udu u re kie owhẹ vi inọ whọ kẹle oria nọ whọ be nya na no. Ere ọvona re, Ọghẹnẹ ọ kẹ omai Ẹme riẹ re o fiobọhọ kẹ omai riẹ eware sasa nọ e te via nọ i ti kpomahọ akpọ na soso. Nọ ma be ruẹ eware nana nọ e be via na, ma vẹ riẹ nọ ma rrọ etoke nọ u bi su kpohọ urere akpọ na.

Ebaibol na ọ ta nọ ma te rọ ẹro ruẹ oke ogaga nọ u ti kpoka họ urere na. Yọ eware sa-sa e te via evaọ akpọ na soso nọ i wo ohẹriẹ no enọ e be hae via anwẹnọ a rọ ma ohwo-akpọ ze. Joma ta kpahe ejọ nọ Ebaibol na ọ fodẹ.

1. EBẸBẸ NỌ I BI VIHỌ FIKI EWARE NỌ I BI DHE ENWENWENE Eruẹaruẹ nọ e rrọ obe Matiu uzou avọ 24 e fodẹ eware sa-sa nọ e te via nọ i ti dhesẹ oka jọ via. Oka yena u ti dhesẹ “oke urere uyero-akpọ” nana gbe okenọ ‘urere na o te rọ ze.’ (Owọ avọ 3, 14) Eware nana jọ họ emo ilogbo nọ a ti fi, ohọo, etọ nọ i ti nuhu evaọ eria sa-sa, emuemu nọ o ti vihọ, uyoyou nọ u ti kiekpo, gbe ẹghẹ nọ isu egagọ a te rọ viẹ ahwo họ. (Owọ avọ 6-26) Uzẹme riẹ họ, eware nana jọ e be hae via anwọ ikpe buobu ze na, rekọ e nwane ga te enẹ hẹ. Rekọ, nọ urere na o be kẹle na, eware nana e te via othotha kpahe ohwohwo evaọ uyere-akpọ umuomu nana. Yọ eware esa nọ ma be te fodẹ na, e rrọ usu eware nọ e te via re.

2. URUEMU AHWO NỌ U TI NWENE Ebaibol na ọ ta nọ evaọ “edẹ urere na,” koyehọ oke nọ u ti su kpohọ urere akpọ na, uruemu ahwo u ti yoma gaga. O ta nọ: “Ahwo a ti you omobọrai, you ugho, seha, wo omorro, ta eme-aghọ, ghẹmeeyo kẹ esẹgbini, kare uyere-ọghọ, a ti ru ẹme rai gba ha, a ti wo uyoyou kẹ ibe ahwo-akpọ rai hi, a te rọwo ru ọtamuo ho, a te ta ahwo raha, a ti wo oma-onyẹ hẹ, avọ ofu-ọkpoo, a ti you oware uwoma ha, a ti vivie ahwo, veghe uzou, fu uke avọ omorro, a ti you omaweromẹ viukpenọ a re you Ọghẹnẹ.” (2 Timoti 3:1-4) Ginọ uzẹme nọ ahwo a be hae rọ adhẹẹ kẹ ibe ahwo-akpọ rai hi, rekọ o te mae ga viere evaọ “edẹ urere na” nọ a sai ro dhesẹ oke nọ ma rrọ na nọ “oke obẹbẹ nọ o te bẹ eyeri.” Kọ who muẹrohọ uruemu nana no evaọ oma ahwo?

3. OTỌAKPỌ NA NỌ A BE RAHA KUOTỌ Ebaibol na ọ ta nọ Ọghẹnẹ ọ te “raha enọ e be raha otọakpọ na.” (Eviavia 11:18) Oghẹrẹ vẹ ahwo a be rọ raha otọakpọ na? Oghẹrẹ ovona nọ a dhesẹ evaọ oke Noa na inọ: “Akpọ o te gbeku evaọ aro Ọghẹnẹ, ozighi ọ tẹ vọ akpọ na soso. Ọghẹnẹ o te ri akpọ na, ọ tẹ ruẹ nọ akpọ na o gbeku.” Ọghẹnẹ ọ tẹ ta kpahe akpọ ogbekuo yena nọ: “Me re ti kpe ai.” (Emuhọ 6:11-13) Kọ whọ be ruẹ imuẹro nọ i dhesẹ nọ ozighi o bi dhe ẹgẹga evaọ akpọ na? Ofariẹ, oria nọ ahwo-akpọ a yeri te obọnana họ: A tẹ kẹ ae uvẹ, a rẹ sae raha oware kpobi nọ o be wẹ no evaọ akpọ na. A wo ekwakwa nọ a sai ro ru ei. Oghẹrẹ ofa jọ o riẹ nọ a be rọ raha otọakpọ na. Ohwo-akpọ ọ be rọ obọ guọghọ eware nọ i ru rie lọhọ nọ ma sae rọ rrọ uzuazọ wọhọ, ofou nọ ma be wẹ rehọ, erao, ire hayo ekakọ, gbe abade.

Nọ omara nọ, ‘Evaọ ikpe jọ nọ i kpemu na, kọ ahwo-akpọ a wo ogaga nọ a sae rọ raha oware kpobi nọ o rrọ akpọ na?’ Rekọ enẹna, ahwo-akpọ  a wo ogaga utioye na no ẹkwoma ekwakwa egaga nọ a bi ku, enọ e rẹ sae raha oware kpobi no. Ẹnyaharo nọ ahwo-akpọ a bi wo evaọ ofẹ ekwakwa ekọmputa gbe ifonu nọ a bi ku, o ga te epanọ a gbẹ be sae rọ kpọ enwoma i re no ai ze he. Rekọ ohwo-akpọ ọvo ọ riẹ hẹ nọ ọ te sae raha otọakpọ na no. Keme, re ohwo jọ ọ tẹ jiroro nọ o re ru ere, Ọghẹnẹ ọ vẹ kake jowọ nọ ọ rẹ rọ raha enọ e be raha otọakpọ na no. Ere Ọghẹnẹ ọ ya!

4. USIUWOMA NỌ A TE JỌ AKPỌ NA SOSO TA Oka ofa jọ nọ a ti ro vuhu edẹ urere na họ usiuwoma Uvie na nọ a te jọ akpọ na soso ta: “A rẹ te ta usi uwoma Uvie na evaọ akpọ na soso re o jọ isẹri kẹ erẹwho na kpobi, kẹsena urere na o vẹ te ze.” (Matiu 24:14) Etata usiuwoma onana u ti wo ohẹriẹ no onọ egagọ efa kpobi a be ta evaọ akpọ na anwọ ikpe buobu ze na. Evaọ edẹ urere nana, u wo ugogo oware nọ a be ta kpahe, oyehọ, “usi uwoma Uvie na.” Kọ whọ riẹ egagọ jọ nọ e be ta usiuwoma Uvie na? O tẹ make rọnọ ejọ e be ta usiuwoma na dede, kọ omoria jọ ọvo a be jọ tae, manikọ a ta usiuwoma Uvie na te “akpọ na soso [no] re o jọ isẹri kẹ erẹwho na kpobi”?

Oria evuẹ Itanẹte nana, www.pr418.com/iso o be ta kpahe “usi uwoma Uvie na.” Ma wo ebe sasa nọ ma bi ro whowho ovuẹ nana evaọ evẹrẹ nọ i bu vi egba ihrẹ (700) evaọ oria Itanẹte nana. Kọ edhere ọfa jọ ọ riẹ nọ ma be rọ ta usiuwoma Uvie na evaọ akpọ na soso? Makọ okenọ Itanẹte e re ze he, a riẹ Isẹri Jihova fihọ ahwo nọ a be rọ ẹgba rai kpobi ta usiuwoma Uvie Ọghẹnẹ. Anwọ ukpe 1939 ze, uzoẹme nọ o rrọ uke emagazini Uwou-Eroro Na họ “Uwou-Eroro Na Nọ U Bi Whowho Uvie Jihova.” Obe jọ nọ a jọ kere kpahe egagọ o ta kpahe iruo usiuwoma ota Isẹri Jihova inọ, “a rẹ sae rọ egagọ efa wawo Isẹri Jihova ha evaọ oghẹrẹ nọ a be rọ ta usiuwoma na gbe epanọ usiuwoma ota rai o kẹre te.” Onana u dhesẹ nọ kẹle na, ‘urere na o te ze’ ẹkwoma Uvie Ọghẹnẹ nọ u muhọ esuo no na.

Kọ who muẹrohọ eware ene nana nọ ma ta kpahe no na inọ i bi rugba wọhọ epanọ Ebaibol ọ ruẹaro rai? Bu vi ikpe udhusoi (100) nọ i kpemu, emagazini nana o bi fiobọhọ kẹ enọ i bi sei riẹ eware nọ e be jọ akpọ na soso via je ru ai riẹ nọ urere na o kẹle no. Egbavro jọ a gbẹ be vro nọ a rẹ sai gbe nwene eware woma ghele. Yọ a be ta nọ dede nọ ekwakwa ẹmeọta nọ a bi ru ze i bi dhe ebuebu, eware e re nwani yoma hrọ họ. Ghele na, imuẹro buobu e riẹ nọ i dhesẹ nọ urere akpọ na ma rrọ na gbe inọ ma rrọ etoke ọgaga evaọ ikuigbe ohwo-akpọ.

 Egba-eriariẹ jọ a be ta nọ inwene ilogbo e te romavia evaọ akpọ na kẹle. Wọhọ oriruo, evaọ ukpe 2014, ukoko jọ nọ a re se Science and Security Board, a jọ emagazini rai nọ a re se The Bulletin of the Atomic Scientists vẹvẹ ogbẹguae America nọ a re se United Nations Security Council unu kpahe oware nọ o be te via kẹ akpọ na kẹle. Egba-eriariẹ yena a ta nọ: “Nọ ma kiẹ eware nọ e be via evaọ akpọ na riwi, ma te ku ei họ nọ, eware ekpokpọ nọ a bi ku kẹdẹ kẹdẹ na e te wha enwoma ilogbo se akpọ na keme i bi fi uzuazọ ahwo buobu họ ọza.” Ahwo buobu a ginẹ rọwo nọ etoke ọgaga ma yeri te na evaọ ikuigbe ohwo-akpọ. Mai Isẹri Jihova nọ a kere emagazini nana gbe amọfa nọ a bi se ebe mai, a rọwo nọ edẹ urere uyerakpọ nana ma rrọ na gbe nọ urere na o kẹle gaga no. Ukpenọ whọ rẹ dhozọ oware nọ o te via evaọ obaro, jọ oware nọ u ti noi ze u ru eva were owhẹ. Fikieme ma rọ ta ere? Keme whọ sae zọ!