Mẹ whẹro evaọ ẹwho nọ a re se Montreal, yọ ofẹ nọ ma jọ na o nwani rovie aro tere he. Nọ mẹ jọ emerae ezeza, ọsẹ mẹ o ro whu, yọ oni mẹ ọvo ọ jẹ wọ owha uwou na kpobi. Mẹ họ ubreyẹ evaọ usu emọ eree nọ ọsẹgboni mẹ a yẹ.

Nọ mẹ be rro ze na, uzuazọ nọ me je yeri o jọ fariẹfariẹ, mẹ jẹ hae rehọ imu egaga, fi-edhọ, ru ozighi, yọ mẹ jẹ nyusu kugbe iji. Nọ me te ikpe 10 no, mẹ tẹ jẹ hae nya uwou kẹ igberẹ gbe ahwo nọ a re momo igho nọ isuo rai i kpehru gaga. Mẹ jẹ hae ta ọrue gaga, yọ o jẹ hae were omẹ re mẹ wha ahwo re. Uruemu yena o tẹ te reria omẹ oma no.

Nọ me te ikpe 14 no, me te wo onaa sa-sa nọ me ro fi ahwo iwhayo. Wọhọ oriruo, mẹ rẹ dẹ ighọjọ, gbe emero buobu nọ a rọ igoru wholo, me ve ru ai fihọ wọhọ ẹsenọ e rrọ obọdẹ igoru, kẹsena mẹ vẹ zẹ ae ghaghae evaọ iyẹrẹ gbe eria nọ a rẹ dhẹ imoto fihọ evaọ iwou-eki ilogbo. Ugho nọ u je te omẹ obọ evaọ edhere otiọye na o jẹ were omẹ gaga. Me tube wo idọla nọ i bu te 10,000 (koyehọ enwenọ enaera 1,675,000) evaọ ẹdẹ ọvo dede!

Nọ a le omẹ no isukulu no evaọ okenọ mẹ jọ ikpe 15, me gbe wo oria ovo nọ mẹ rẹ rria ha. Mẹ jẹ hae wezẹ iyẹrẹ, eria nọ a rẹ dhẹ imoto fihọ, hayo uwou egbẹnyusu mẹ.

Fikinọ mẹ jẹ hae fi ahwo iwhayo, iporisi e jẹ hai mu omẹ kẹse kẹse. Rekọ fikinọ eware nọ mẹ jẹ zẹ na eware uji hi, a fi omẹ họ uwou-odi ẹdẹvo ho. Ghele na, a ho omẹ unuẹse buobu fiki ofruriọ, iwhayo, gbe eware nọ mẹ jẹ zẹ ababọ obe-udu. Ozọ ohwo ọvo o jẹ hai mu omẹ hẹ, fikiere ahwo nọ a re momo igho kẹ ahwo na, a jẹ hai vi omẹ nyai ye esa rai. Ozighi o re no onana ze, yọ mẹ jẹ hae wha ugbeke lele oma ẹsejọ. Mẹ jẹ hai tube kuomagbe igbulegbu ẹsejọ dede.

Nọ mẹ jọ ikpe 17 Isẹri Jihova a rọ kake ta usiuwoma kẹ omẹ. Mẹ avọ ogbẹnyusu ọmọtẹ mẹ ma gbẹ jẹ rria uwou, kẹsena Isẹri Jihova a te mu Ebaibol họ ewuhrẹ kugbei. Fikinọ me roro nọ uzi  Ebaibol na kpahe ọfariẹ-ogbe u keke hrọ, mẹ tẹ dhẹ siẹe ba bru ọmọtẹ ọfa nọ mẹ avọ iẹe ma jẹ nya usu.

Oware nọ u ru omẹ nwene iroro họ, nọ Isẹri Jihova a mu Ebaibol họ ewuhrẹ kugbe ọmọtẹ avọ ivẹ nọ mẹ dhẹ bru na! Uruemu riẹ u gine nwene gaga, ọ gbẹ jẹ hai muofu te epanọ ọ jọ vẹre he. Ẹdẹjọ nọ a ziezi omẹ kpohọ ewuhrẹ evaọ obọ Ọgwa Uvie Isẹri Jihova, mẹ tẹ ginẹ nya. Ahwo na kpobi a dede omẹ rehọ, yọ ahwo na a rrọ wowou jẹ rrọ kpatiẹ. Akpọ ọvo o je gbe omẹ unu, keme mẹ riẹ nọ oghẹrẹ ahwo otiọna a rrọ akpọ na ha! Uviuwou mẹ u si omẹ gboma vievie he anwẹnọ a ro yẹ omẹ na, a ri dhesẹ uyoyou kẹ omẹ ẹdẹvo ho. Uyoyou nọ Isẹri Jihova a dhesẹ kẹ omẹ na họ oware nọ mẹ gwọlọ evaọ uzuazọ. Nọ Isẹri Jihova a ta nọ a gwọlọ wuhrẹ Ebaibol na kugbe omẹ, mẹ tẹ nwane rọwo.

Oware nọ me wuhrẹ evaọ Ebaibol na u siwi uzuazọ mẹ. Whaọ, mẹ avọ emezae ivẹ jọ ma be jiroro epanọ ma re ro kpohọ uji-utho re mẹ sae wha esa nọ edhọ-ifio e lẹliẹ omẹ re nọ u bu vi edọla 50,000 (koyehọ enaera 8,375,000). Rekọ eva e were omẹ gaga nọ me gbe lele ae nya ha! Imava nọ i kiọkọ a te kpohọ uji-utho na ghele. A sa ọvo kpe, a te mu ọnọ o kiọkọ.

Nọ me gbe bi wuhrẹ Ebaibol na, mẹ tẹ ruẹ vuhumu nọ o gwọlọ nọ me re ru inwene buobu. Wọhọ oriruo, me wuhrẹ kpahe oware nọ Ebaibol ọ ta evaọ obe 1 Ahwo Kọrint 6:10 inọ: “Iji, ahwo nọ a wo uvou-uthethei, egba-idi, elahwo-eka, gbe ahwo nọ a re fru amọfa re a te reuku Uvie Ọghẹnẹ hẹ.” Nọ me se oria Ebaibol yena, irui-oviẹ i te su no omẹ aro ze. Mẹ ruẹ vuhumu nọ o gwọlọ nọ me re ru inwene ilogbo evaọ uzuazọ mẹ. (Ahwo Rom 12:2) Me re ru ozighi, me wo ofu ọkpoo, yọ ọrue mẹ rẹ rọ họ.

Rekọ me wuhrẹ evaọ Ebaibol na nọ Jihova ọ vọ avọ ohrọ gbe erọvrẹ. (Aizaya 1:18) Mẹ tẹ lẹ gaga se Jihova nọ o fiobọhọ kẹ omẹ nwene ekpehre uzuazọ mẹ na. Avọ obufihọ riẹ, mẹ tẹ rọ ẹmẹrera nwene uruemu mẹ. Kẹsena mẹ avọ ogbẹnyusu ọmọtẹ mẹ na ma tẹ te ruọ orọo lele uzi egọmeti.

Whaọ me te ikpe 24 no, me wo aye gbe emọ esa, yọ o gwọlọ nọ me re ru iruo nọ mẹ rẹ rọ rẹrote uviuwou mẹ. Rekọ me kpohọ isukulu te ere he, yọ uvumọ ohwo o bi dhesẹ omẹ kẹ ahwo nọ a rẹ rehọ ahwo iruo ho. Mẹ tẹ wariẹ lẹ se Jihova gaga kpahe onana. Kẹsena me te mu iruo họ ẹgwọlọ. Mẹ vuẹ ahwo jọ nọ a rẹ rehọ ahwo iruo nọ, mẹ gwọlọ nwene uzuazọ mẹ, inọ a tẹ rehọ omẹ, mẹ te rọ udu mẹ kpobi ru iruo na. Ẹsejọ mẹ rẹ vuẹ ae inọ a bi wuhrẹ Ebaibol na kugbe omẹ, yọ mẹ gwọlọ zihe ruọ emamọ ohwo. Ibuobu rai a rọwo rehọ omẹ iruo ho. Ukuhọ riẹ, evaọ ẹdẹjọ nọ a jẹ kiẹ omẹ riwi kẹ iruo jọ, nọ mẹ romatotọ gbiku oghẹrẹ uzuazọ nọ me je yeri vẹre kẹ ohwo na no, ọ tẹ ta nọ: “Mẹ riẹ hẹ, rekọ omamẹ o be ta kẹ omẹ nọ mẹ rehọ owhẹ iruo.” Onana o tẹ nwani ru omẹ wo imuẹro nọ olẹ mẹ Jihova o yo no na. Nọ oke o be nyaharo na, mẹ avọ aye mẹ ma tẹ họ-ame je zihe ruọ Isẹri Jihova.

Mẹ rrọ uzuazọ nẹnẹ fiki ithubro Ebaibol nọ me bi fihọ iruo je bi yeri uzuazọ Oleleikristi. Me wo emamọ uviuwou obọmẹ. Me wo emamọ obroziẹ-iroro keme u mu omẹ ẹro nọ Jihova ọ rọvrẹ omẹ no.

Anwọ ikpe 14 ena nọ mẹ rọ rrọ iruo odibọgba oke-kpobi na, bi fiobọhọ kẹ amọfa wuhrẹ kpahe oware nọ Ebaibol na ọ ta, yọ kẹle na, aye mẹ o mu iruo odibọgba na họ no re. Anwọ ikpe 30 nọ e vrẹ na, me fiobọhọ kẹ ibe-iruiruo mẹ nọ i bu te 22 kurẹriẹ ziọ ukoko Jihova no, onọ o be kẹ omẹ evawere gaga. Me gbe bi kpohọ iwou-eki ilogbo, rekọ orọnikọ re mẹ nyai fi ahwo iwhayo ho wọhọ epanọ mẹ jẹ hai ru vẹre. Enẹna nọ me te kpohọ etẹe, usiuwoma mẹ rẹ ta kẹ ahwo, re me fiobọhọ kẹ ai wo ẹruore uzuazọ ebẹdẹ bẹdẹ evaọ akpọ ọkpokpọ nọ uvumọ ohwo iwhayo ọ te jọ họ.—Olezi 37:10, 11.