Evaọ oke emọ Izrẹl, Ọghẹnẹ ọ jẹ rehọ iguẹdhọ siwi ahwo riẹ no obọ ahwo nọ a je kienyẹ ae. (Ibruoziẹ 2:18) Ebaibol na o dhesẹ nọ Ẹdẹ Ẹdhoguo nọ ọ be tha evaọ obaro na ọ te jọ ẹdẹ evawere, keme Jihova nọ ọ rrọ Oguẹdhọ akpọ na o ti siwi ahwo-akpọ kpobi no okienyẹ.—Se Olezi 96:12, 13; Aizaya 26:9.

Ọghẹnẹ ọ rọ Jesu mu no re ọ jọ obruoziẹ enọ e rrọ uzuazọ gbe enọ i whu no. (Iruẹru Ikọ 10:42; 17:31) U wo ahwo buobu nọ a riẹ Ọghẹnẹ taure a te whu hu. Evaọ Ẹdẹ Ẹdhoguo na, Jesu ọ te kpare ahwo otiọye na ziọ uzuazọ re a sai wuhrẹ kpahe Ọghẹnẹ uzẹme na je you rie.—Se Iruẹru Ikọ 24:15.

A te kpare enọ i whu no ze evaọ etoke odu ikpe na. (Eviavia 20:4, 12) O te rehọ ae oke re a te wuhrẹ kpahe idhere Ọghẹnẹ je koko izi riẹ. Wo ohẹriẹ no oware nọ a bi wuhrẹ ahwo buobu, Ebaibol na o dhesẹ nọ eware nọ ahwo a ti ru nọ a tẹ kpare ae ze no, eye a ti ro gu ae ẹdhọ.—Se Ahwo Rom 6:7.

Ebaibol na ọ tẹ jẹ ta kpahe ẹdẹ ẹdhoguo nọ ọ te romavia idudhe taure odu ikpe na o te ti muhọ. Ẹdẹ ẹdhoguo ọvona a se ẹdẹ urere na nọ ma ta ẹme kpahe evaọ izoẹme ọsosuọ nọ e rrọ emagazini nana. Evaọ ẹdẹ yena, Ọghẹnẹ ọ te raha irumuomu gbe ahwo nọ a be gọe he kpobi no. (2 Pita 3:7) Fikiere o gwọlọ nọ ma rẹ daoma you Ọghẹnẹ no eva ze.—Se 2 Pita 3:9, 13.