Kọ who re roro ẹsejọ sọ uzuazọ na o vrẹ arozaha, iruo, orọo, emọ iyẹ, ukuhọ riẹ kọ owho? (Job 14:1, 2) Ebaibol na o dhesẹ nọ makọ ahwo nọ a wo areghẹ dede a roro kpahe onọ nana no.—Se Ọtausiuwoma Na 2:11.

Kọ uzuazọ u wo ẹjiroro jọ? Joma kake ta kpahe onọ nana, Ẹvẹ uzuazọ u ro muhọ? Nọ ahwo buobu a te roro kpahe epanọ ẹvori gbe omamai u gbunu te, a re ku ei họ nọ ohwo jọ nọ o wo areghẹ gaga ọye ọ ma omai. (Se Olezi 139:14.) O tẹ rrọ ere, kiyọ ọ ma omai fiki ẹjiroro jọ! Nọ ma tẹ riẹ ẹjiroro nọ a rọ ma omai, o rẹ sae lẹliẹ omai yeri emamọ uzuazọ.

Ọghẹnẹ ọ ghale ọzae gbe aye ọsosuọ nọ ọ ma na jẹ kẹ ae emamọ iruo nọ a re ru. Ẹjiroro nọ ọ rọ mae họ, re a yẹ akpọ na vọ, ru ei fihọ aparadase, a vẹ jẹ rria bẹdẹ bẹdẹ.—Se Emuhọ 1:28, 31.

Nọ ahwo-akpọ a ghẹmeeyo kẹ Ọghẹnẹ no, o tẹ dina ru ẹjiroro Ọghẹnẹ lehie. Rekọ Ọghẹnẹ ọ kpairoro vrẹ omai gbe ẹjiroro riẹ kẹ otọakpọ na ha. Ebaibol na ọ ta nọ Ọghẹnẹ o bi ru iruo gaga re ọ sai siwi omai ahwo-akpọ nọ a yoẹme, re ẹjiroro riẹ kẹ otọakpọ na ọ sai rugba! Fikiere Ọghẹnẹ ọ gwọlọ nọ whọ reawere uzuazọ wọhọ epanọ o wo rie họ iroro no emuhọ ze (Se Olezi 37:29.) Jọ Ebaibol na wuhrẹ kpahe epanọ whọ sai ro wo erere no ẹjiroro Ọghẹnẹ yena ze.