Mẹ whẹro evaọ okpẹwho nọ a re se Los Angeles, California evaọ obọ America. Yọ ekpehre emọ nọ i re ru ozighi gbe enọ e rẹ rehọ imu egaga, e vọ okegbe nọ ma jẹ rria na. Emọ ezeza ọsẹgboni mẹ a yẹ, emezae ene gbe emetẹ ivẹ, yọ mẹ họ ọmọ avọ ivẹ.

Okenọ ma jọ emaha, ichọche oni mẹ ọ jẹ wha omai nya. Rekọ nọ mẹ rro te ohwo no, me te je yeri uzuazọ agbava. Mẹ jọ usu emọ ikuaya nọ e rẹ suọ ile evaọ ichọche Ẹdoka kpobi. Rekọ nọ ichọche e tẹ fa no, me ve kpohọ epati, nyae lọ imu egaga, je gbe-ọfariẹ.

Me wo ofu-ọkpoo. Oware kpobi nọ u te omẹ obọ mẹ jẹ hae rọ họre. Eware nọ a je wuhrẹ omẹ evaọ obọ ichọche, i fiobọhọ kẹ omẹ vievie he. Mẹ jẹ hae ta nọ, “Orukele yọ ọ rọ Olori na, yọ mẹ họ ọnọ Olori na o re vi nyae kioja!” Nọ mẹ jọ ekọleji evaọ ubrobọ urere ikpe 1960, me te kuomagbe utu jọ nọ a re se Black Panthers, onọ o rẹ họre re egọmeti ọ kẹ ae eware nọ a gwọlọ. Me te je kuomagbe utu emọ isukulu nọ o rẹ họre kẹ omarai. Ma jẹ hae họre unuẹse buobu nọ o jẹ hae whae ze nọ a rẹ rọ kare isukulu na ẹsejọ.

Rekọ rọkẹ omẹ, me ri ru ozighi doma ghele he. Fikiere me te kuomagbe utu nọ u re kpe ahwo nọ a bi ru eware iyoma. Wọhọ oriruo, ẹdẹjọ nọ mẹ avọ egbẹnyusu mẹ ma nyai rri ifimu, ma te rri ifimu nọ ahwo America a jẹ jọ gboja kẹ ahwo obiebi nọ a dẹ wọhọ erigbo. Oware nọ ma ruẹ na o kẹ omai uye te epanọ ma rọ nwani mu izoge America họ ekpe evaọ etetẹe nọ ma jọ rri ifimu na. Ma tẹ ruọ iyẹrẹ na be gwọlọ izoge efa nọ ma re kpe.

Re me te ti te ikpe udhe, yọ a riẹ omẹ avọ inievo mẹ wọhọ egba-uthu nọ i bi ru eware iyoma evaọ okegbe mai na. Iporisi i mu omai unuẹse buobu. Oniọvo ọmaha mẹ jọ ọ jọ usu emọ jọ nọ i je thu-uthu gaga, yọ mẹ jẹ hai kuomagbe ai ẹsejọ. Fikiere uzuazọ mẹ u je dhe eyeyoma.

Me wo ogbẹnyusu jọ nọ ọsẹgboni riẹ a rrọ Isẹri Jihova. A te zizie omẹ kpohọ ewuhrẹ, mẹ tẹ ginẹ nya. Nọ me te obei, mẹ tẹ ruẹ nọ Isẹri Jihova a wo ohẹriẹ. Ohwo kpobi o wo Ebaibol, yọ aikpobi a bi rovie lele oruẹme na nọ ewuhrẹ na ọ be nyaharo na. Makọ emaha dede a bi ru ẹme evaọ ewuhrẹ na! Yọ eva e were omẹ gaga nọ me wuhrẹ nọ Jihova họ odẹ Ọghẹnẹ. (Olezi 83:18, NW) Ahwo ovioma sa-sa a jọ ukoko yena, yọ oma-ohẹriẹ o jariẹ hẹ.

 Evaọ oke ọsosuọ, o jẹ hae were omẹ hẹ re Isẹri Jihova a wuhrẹ obe kugbe omẹ, iwuhrẹ ukoko enya ọvo e jẹ hae were omẹ. Whaọ evaọ owọwọ ẹdẹjọ, me te kpohọ ewuhrẹ Isẹri Jihova, yọ egbẹnyusu mẹ a kpohọ arozaha ile-igbe. Egbẹnyusu mẹ a te kpe uzoge jọ whu fikinọ ọmọ na ọ rọwo rehọ ewu-ekpahe riẹ ke ae he. Evaọ okiokiọ riẹ, oma u te je mu ai inọ a kpe ohwo, yọ a be rọ onana ya oma. Nọ a jẹ tubẹ rehọ ae gu ẹdhọ evaọ obọ okọto, yọ a be hwẹ wọhọ ẹsenọ oware nọ a ru na u te oware ovo ho. A te mu ejọ fihọ uwou-odi nọ a te rria bọo ẹdẹ nọ a re ro whu. Rekọ eva e were omẹ gaga inọ me lele i rai nya evaọ aso ọyena ha. Mẹ tẹ gbaemu nọ me re nwene uzuazọ mẹ je mu Ebaibol họ ewuhrẹ.

Fikinọ mẹ ruẹ oma-ogbẹrọ buobu no evaọ udevie ahwo erẹwho sa-sa, oware nọ mẹ ruẹ evaọ udevie Isẹri Jihova, u te gbe omẹ unu gaga. Wọhọ oriruo, nọ Oyibo jọ nọ ọ rrọ Osẹri Jihova o je kpohọ erẹ, ọ tẹ nyase emọ riẹ ba kẹ uviuwou Osẹri Jihova ọfa nọ ọ rrọ ohwo obiebi. U te no oyena no, mẹ tẹ jẹ ruẹ uviuwou Isẹri Jihova jọ nọ a rrọ ahwo Oyibo nọ a rehọ uzoge jọ nọ ọ rrọ ohwo obiebi fihọ uwou rai, fikinọ o wo oria nọ ọ be rria ha. Onana u te ru omẹ vuhumu nọ Isẹri Jihova họ enọ i bi ru ẹme Jesu nana gba, nọ ọ ta evaọ obe Jọn 13:35, inọ: “Ẹkwoma onana ahwo kpobi a te rọ riẹ nọ whai yọ ilele mẹ, nọ wha te wo uyoyou evaọ udevie rai.” U te mu omẹ ẹro nọ mẹ duku egagọ uzẹme no.

Nọ me bi wuhrẹ Ebaibol na, mẹ tẹ te ruẹ nọ o gwọlọ nọ me re nwene oghẹrẹ nọ me bi rri eware. Mẹ tẹ jẹ ruẹ nọ orọnọ mẹ rẹ daoma jọ ohwo odhedhẹ ọvo ho, rekọ me re rri rie nọ onana họ uzuazọ nọ o mai woma. (Ahwo Rom 12:2) Ẹmẹrera na, me te bi gine nwene. Evaọ amara Ọvo ukpe 1974, mẹ tẹ họ-ame wọhọ Osẹri Jihova.

Nọ mẹ make họ-ame no, o jẹ hae jọ bẹbẹ kẹ omẹ ẹsejọ re mẹ kpọ ofu mẹ. Wọhọ oriruo, ẹdẹjọ nọ ma jọ usiuwoma n’uwou ruọ uwou, oji jọ o te tho irediyo omoto mẹ evaọ oria nọ mẹ dhẹ riẹ fihọ, nọ mẹ rue e riẹ mẹ tẹ rọ tuae. Nọ ọ riẹ nọ me ti lei mu, o te gbolo irediyo na họ otọ jẹ dhẹ. Nọ me gbiku na kẹ inievo nọ ma gbẹ jọ usiuwoma kpahe oghẹrẹ nọ irediyo omoto na i ro te omẹ obọ, ọkpako ukoko jọ evaọ usu mai ọ tẹ nọ omẹ nọ, “Stephen, o hae jọnọ who gine lei mu, eme whọ hai ti ru ei?” Onọ yena o tẹ lẹliẹ omẹ roro didi, jẹ kareghẹhọ omẹ nọ mẹ rẹ gbẹ daoma kpọ ofu mẹ.

Evaọ amara Akpe ọrọ ukpe 1974, me te mu usiuwoma oke-kpobi họ ẹta, yọ euwa udhusoi (100) mẹ jẹ hae raha ro wuhrẹ ahwo kamara kamara. Uwhremu na, a te ti zizie omẹ kpohọ oria nọ u wuzou iruẹru Isẹri Jihova evaọ obọ Brooklyn, New York. Evaọ ukpe 1978, me te zihe kpohọ Los Angeles nyae rẹrote oni mẹ nọ ọ jẹ mọ. Evaọ ikpe ivẹ nọ i lele i rie, mẹ tẹ rehọ aye mẹ Aarhonda. Aye mẹ o fiobọhọ kẹ omẹ rẹrote oni mẹ gaga taure o te ti whu. Uwhremu na, a te ti zizie omẹ avọ aye mẹ kpohọ Isukulu Giliad, nọ ma nwrotọ no, a te vi omai kpohọ orẹwho Panama, etẹe ma jọ rrọ iruo imishọnare rite enẹna.

Anwẹnọ mẹ rọ họ-ame no na, mẹ rẹriẹ ovao dhe iyero buobu no nọ mẹ hae ro muofu ọkpoo. Whaọ enẹna nọ ahwo a te ru omẹ eva dha, mẹ rẹ nyase ae ba hayo daoma rọ edhere owowolẹ ku ẹme na họ. Aye mẹ gbe amọfa buobu a be hai jiri omẹ gaga evaọ oghẹrẹ nọ me bi ro lele ahwo yeri. Oghẹrẹ nọ me ro nwene, u bi gbe omẹ unu dede! Orọnọ ogaga obọmẹ mẹ sai ro ru inwene nana ha, rekọ ẹgba Ẹme Ọghẹnẹ ọye o nwene omẹ.—Ahwo Hibru 4:12.

Ebaibol na o gine nwene omẹ zihe ruọ emamọ ohwo, je bi fiobọhọ kẹ omẹ rria kugbe ahwo dhedhẹ. Enẹna mẹ gbẹ be họre ahwo ho, ukpoye Ẹme Ọghẹnẹ me bi ro fiobọhọ kẹ ae. Me tube wuhrẹ Ebaibol na kugbe ohwo jọ nọ ọ jọ ọwegrẹ mẹ vẹre evaọ ekọleji. Nọ ọ họ-ame no, mẹ avọ iẹe ma tẹ jẹ rria uwou. Rite inẹnẹ na, mẹ avọ iẹe egbẹnyusu ekpekpe ivẹ. Mẹ avọ aye mẹ ma fiobọhọ kẹ ahwo nọ a bu vi 80 soso zihe ruọ Isẹri Jihova no.

Me yere Jihova gaga nọ o ro fiobọhọ kẹ omẹ bi yeri emamọ uzuazọ nọ o vọ avọ evawere gbe epanọ o ro fiobọhọ kẹ omẹ rrọ usu inievo akpọ-soso mai na.