UZOẸME UKE NA | KỌ OWARE UWOMA JỌ U RE NO OLẸ ZE?
Kọ Ohwo jọ Ọ Riẹ nọ Ọ be Gaviezọ?
Ahwo jọ a re roro nọ olẹ yọ oke oraha kufiẹ gheghe, inọ ohwo ọvo ọ riẹ nọ ọ be gaviezọ họ. Amọfa jọ nọ a daoma lẹ no, a roro nọ ohwo ọvo ọ kuyo olẹ rai hi. Enẹ ohwo jọ nọ ọ rọwo nọ Ọghẹnẹ ọ rrọ họ ọ lẹ se Ọghẹnẹ, inọ: “Otẹrọnọ whọ ginẹ rrọ, dina ru emedo jọ họ omẹ ozọ.” Ohwo na ọ ta nọ Ọghẹnẹ ọ kpunu hu, rekọ o “fibo rirẹ” ọvo.
Ebaibol na ọ kẹ omai imuẹro inọ Ọghẹnẹ nọ ọ be daezọ mai ọ riẹ, yọ ọ be gaviezọ kẹ elẹ mai. O dhesẹ nọ Ọghẹnẹ họ ohwo nọ ọ mai kpehru kpobi evaọ ehrugbakpọ na. Enẹ Ebaibol na ọ ta kpahe ahwo jọ nọ a rria ikpe buobu nọ i kpemu: “Ughine muẹro no nọ [Ọghẹnẹ] ọ rẹ te re owhai ohrọ okenọ o yo unubo rai; nọ o yo rie o re ti yo kẹ owhai.” (Aizaya 30:19) Oria Ebaibol ofa jọ o ta nọ: “Olẹ uviohwo oye o rẹ weriẹe.”—Itẹ 15:8.
Jesu ọ lẹ se Ọsẹ riẹ, “yọ o yo olẹ riẹ.”—Ahwo Hibru 5:7
Ma rẹ jọ Ebaibol na ruẹ iriruo ahwo buobu nọ Ọghẹnẹ o yo elẹ rai. Ebaibol na ọ ta evaọ oria jọ nọ, Jesu ọ lẹ “elẹ-ayare . . . se Ọnọ ọ rẹ sai siwi ei,” yọ o “yo olẹ riẹ.” (Ahwo Hibru 5:7) Ma rẹ sae ruẹ iriruo efa evaọ obe Daniẹl 9:21 gbe 2 Iruẹru-Ivie 7:1.
Kọ, fikieme ahwo jọ a bi ro roro nọ ohwo ọvo o bi yo elẹ rai hi? Ma tẹ gwọlọ nọ a yo olẹ mai, u wuzou re ma lẹ se Ọghẹnẹ nọ a fodẹ evaọ Ebaibol na ọvo, Jihova, * orọnikọ eghẹnẹ efa hayo esemọ nọ i whu no ho. Ọghẹnẹ ọ tẹ jẹ gwọlọ nọ ma rẹ yare eware nọ e “rọwokugbe oreva riẹ,” eware nọ ọ jẹrehọ. Ma tẹ be lẹ evaọ edhere otiọnana, Ọghẹnẹ ọ kẹ omai imuẹro inọ “ọ rẹ gaviezọ kẹ omai.” (1 Jọn 5:14) Fikiere, ma tẹ gwọlọ nọ Ọghẹnẹ o yo elẹ mai, u wuzou re ma riẹ Ọghẹnẹ nọ a fodẹ evaọ Ebaibol na, je wuhrẹ kpahe oware nọ o rẹ were iẹe.
Ahwo buobu a rri olẹ fihọ oware nọ a rẹ jọ egagọ ru ọvo ho, rekọ a wo imuẹro inọ Ọghẹnẹ ọ rẹ ginẹ gaviezọ kẹ elẹ. Ọzae jọ nọ a re se Isaac evaọ obọ Kenya, ọ ta nọ: “Mẹ lẹ se Ọghẹnẹ re o fiobọhọ kẹ omẹ wo otoriẹ Ebaibol na. U kri hi, ohwo jọ ọ tẹ nyabru omẹ ze, jẹ ta nọ o re fiobọhọ kẹ omẹ.” Aye jọ nọ a re se Hilda nọ ọ be rria obọ Philippines, ọ gwọlọ nọ ọ rẹ siọ isigareti ivovo ba. Ọ daoma bẹ rekọ ọ be sae siọ uruemu na ba ha, fikiere ọzae riẹ ọ tẹ ta kẹe nọ, “Kọ whọ gbẹ lẹ se Ọghẹnẹ re o fiobọhọ kẹ owhẹ?” Nọ o gine fi ohrẹ na họ iruo, ọye ọvo ọ tẹ te ta nọ: “Akpọ o gbe omẹ unu evaọ oghẹrẹ nọ Ọghẹnẹ o ro fiobọhọ kẹ omẹ. Ẹmẹrera na isigareti ivovo i te bi no omẹ oma, bẹsenọ mẹ rọ seba riẹriẹriẹ.”
Kọ who roro nọ Ọghẹnẹ ọ gwọlọ fiobọhọ kẹ owhẹ evaọ ẹbẹbẹ jọ nọ whọ be rẹriẹ ovao dhe?
^ edhe-ẹme 6 Ebaibol na ọ ta nọ odẹ Ọghẹnẹ họ Jihova.
