Enọ nọ Ebaibol Ọ Kẹ Iyo Rai
Kọ uvuhu u ti no otọ ẹdẹjọ?
Kukpe kukpe uvuhu ogaga u bi kpe ima ahwo buobu, fiki ẹyao gbe emamọ emu nọ a be ruẹ re he. Evaọ eria jọ akpọ na, ahwo jọ a fe diezọ, rekọ yọ uvuhu u bi gboja kẹ ibuobu. Ebaibol na o dhesẹ nọ, no anwae ze ẹbẹbẹ uvuhu ọ rọ rrọ otọ.—Se Jọn 12:8.
Re uvuhu o sai no otọ, egọmeti ọvo o re su akpọ na soso, yọ egọmeti ọyena o re wo ogaga nọ ọ sae rọ ghale eware kẹ ahwo kpobi ẹrẹrẹe. Egọmeti otiọye na o re je ku ẹmo họ, keme ẹmo ọ rrọ usu eware nọ e be wha uvuhu ze. Ọghẹnẹ ọ ya eyaa nọ ọ te rehọ egọmeti otiọye na ze.—Se Daniẹl 2:44.
Ono ọ te sai si uvuhu no otọ?
Ọghẹnẹ ọ rehọ Ọmọ riẹ Jesu mu Ovie no re o su akpọ na soso. (Olezi 2:4-8) Jesu o ti siwi imiwhrori jẹ rehọ okienyẹ gbe ozighi te oba.—Se Olezi 72:8, 12-14.
Wọhọ epanọ a ruẹaro riẹ, Jesu nọ ọ rrọ “Ovie Udhedhẹ” na, ọ te rehọ udhedhẹ gbe omofọwẹ ze akpọ na kpobi. Evaọ oke yena ohwo kpobi o ti wo ọvuọ uwou riẹ, je ru emamọ iruo, yọ emu ọ te vọ oria kpobi.—Se Aizaya 9:6, 7; 65:21-23.