UZOẸME UKE NA | WHỌ SAI WO OTORIẸ EBAIBOL NA
Fikieme Ma jẹ Daoma Wo Otoriẹ Ebaibol Na?
“Ebaibol na yọ obe egagọ nọ ahwo a riẹ evaọ eria kpobi. Rekọ u wo iruo kẹ omai ahwo China ha, ukpoye ahwo erẹwho efa o wo iruo kẹ.”—LIN, evaọ obọ CHINA.
“Mẹ be sai tube wo otoriẹ ebe egagọ Hindu nọ mẹ rọ họ. Kọ ẹvẹ mẹ sai ro wo otoriẹ Ebaibol na?” —AMIT, evaọ obọ INDIA.
“Ebaibol na yọ obe anwae nọ me wo adhẹẹ kẹ, yọ me yo nọ o be nya eki gaga. Rekọ mẹ re rọ ubiẹro mẹ ruẹ Ebaibol na ẹdẹvo ho.”—YUMIKO, evaọ obọ JAPAN.
Ahwo buobu evaọ akpọ na a wo adhẹẹ kẹ Ebaibol na. Rekọ eware nọ a riẹ evaọ Ebaibol na i tulo ho. Ere ọvona o rrọ kẹ ahwo buobu nọ a be rria evaọ Asia, makọ evaọ eria akpọ na nọ ahwo buobu a jọ wo Ebaibol na.
Rekọ whọ sai nọ inọ, ‘Erere vẹ o re te omẹ nọ me te wo otoriẹ Ebaibol na?’ Nọ who te wo otoriẹ eware nọ e rrọ evaọ Ebaibol na, whọ rẹ sai:
-
Wo evawere gbe edẹro
-
Ku ebẹbẹ uviuwou ra họ
-
Thihakọ nọ whọ tẹ be ruawa
-
Wo emamọ usu kugbe amọfa
-
Rọ areghẹ raha ugho
Wọhọ oriruo, roro kpahe aye jọ nọ a re se Yoshiko nọ ọ be rria obọ Japan. Fikinọ ọ riẹ oware ovo kpahe Ebaibol na ha, ọ tẹ tubẹ ta nọ o re sei. Eme o no rie ze? Ọ ta nọ, “Ebaibol na o fiobọhọ kẹ omẹ riẹ ẹjiroro uzuazọ no, je wo ẹruore kpahe obaro na.” O fibae nọ: “Enẹna mẹ be mai ro yeri emamọ uzuazọ.” Ọzae nọ a re se Amit nọ ma ta ẹme te ẹsiẹ na, ọ daoma se Ebaibol na. Ọ ta nọ, “Akpọ o gbe omẹ unu nọ mẹ ruẹ nọ whọ rẹ sae jọ Ebaibol na ruẹ evuẹ nọ i re fiobọhọ kẹ ohwo kpobi yeri uzuazọ.”
Ebaibol na o fiobọhọ kẹ ahwo buobu ru uzuazọ rai woma vi epanọ o jọ vẹre no. Kọ whọ gbẹ kiẹe riwi re whọ ruẹ epanọ o sai ro fiobọhọ kẹ owhẹ re?
