A yẹ omẹ evaọ oria nọ a re se Paddington, ofẹ London nọ ahwo a vọ gaga evaọ orẹwho England. Mẹ avọ oni mẹ gbe inievo emetẹ esa mẹ ma gbẹ jọ uwou. Fikinọ ọsẹ mẹ ọ jọ ọgbidi, ọ jẹ rẹrote omai hi, yọ ẹsejọ ọ rẹ dhẹ siọ omai ba.

Nọ mẹ gbẹ jọ ọmaha, oni mẹ o te wuhrẹ omẹ nọ mẹ hae lẹ kaso kaso. Me wo Ebaibol ọsese jọ nọ u wo obe Olezi ọvo, fikiere me te kere ile no obe Olezi nana ze nọ mẹ jẹ hae so. Ẹsikpobi me re roro kpahe ẹme jọ nọ me se ku evaọ obe jọ inọ: “Ohwo kpobi o ti whu ẹdẹjọ.” Eme nana e jẹ hae lẹliẹ omẹ roro kpahe obaro na kaso kaso, yọ e rẹ tubẹ whaha omẹ owezẹ dede. Mẹ jẹ hae ta kẹ oma mẹ nọ, ‘Uzuazọ u wo ẹjiroro ọfa jọ. Fikieme mẹ rọ rrọ uzuazọ?’ Mẹ gwọlọ nọ me re whu hu!

Onana o tẹ whae ze nọ mẹ jẹ rọ gwọlọ riẹ kpahe iruẹru imizi. Fikiere mẹ jẹ gwọlọ lele ahwo nọ a whu no ta ẹme, yọ me je lele egbẹnyusu mẹ kpohọ oria nọ a re ki ahwo fihọ, je rri ifimu nọ e rẹ lẹliẹ ozọ mu ohwo. Dede nọ ozọ u je mu omai, o jẹ were omai ghele.

Nọ mẹ jọ ikpe 10, me te mu uzuazọ ofafariẹ họ eyeri. Me te mu isigareti họ evovo, yọ o raha oke he o tẹ reria omẹ obọ no. Uwhremu na, me te mu ige họ evovo. Nọ me te ikpe 11 no, me te mu idi egaga họ ẹda. Dede nọ udi ogaga o rẹ were omẹ hẹ, oghẹrẹ nọ u re ru ohwo nọ u te mu ohwo no o rẹ were omẹ. Ile gbe ile-igbe e jẹ were omẹ gaga re. Fikiere me re kpohọ epati gaga, makọ epati aso. Mẹ rẹ kuẹlẹ no uwou evaọ aso, jẹ kuẹlẹ zihe ze taure oke u te rie. Fikinọ oma o rẹ rrọ omẹ no, ẹsibuobu me re kpohọ isukulu hu. Ẹdẹ nọ mẹ make nya dede, mẹ rẹ jọ obei da idi bẹ.

Fiki oghẹrẹ uzuazọ nọ me je yeri na, me te feli evaọ ẹdawọ nọ a re ro nwrotọ no isukulu. Onana o lẹliẹ eva dha oni mẹ gaga, keme ọ riẹ nọ mẹ fariẹ te enẹ no ho. Fikiere ma tẹ whọ, mẹ tẹ dhẹ no uwou. Evaọ omoke jọ, mẹ tẹ jẹ rria kugbe ogbẹnyusu ọmọzae mẹ nọ a re se Tony, ọnọ ọ jẹ hae suile avọ eto-edada nọ o wo. Tony ọ jẹ hai thuji ototọ jẹ zẹ imu egaga, yọ a riẹ riẹ fihọ ohwo nọ o re ru ozighi gaga. U kri hi me  te dihọ kẹe evaọ okenọ mẹ jọ ikpe 16, je yẹ ọmọzae mai.

Oke ọsosuọ nọ mẹ rọ ruẹ Isẹri Jihova, mẹ jẹ rria uwou nọ emetẹ nọ i yẹ emọ no rekọ a wo ezae he a rẹ rria. Etẹe egọmeti ọ jọ kẹ omẹ ubruwou jọ nọ mẹ jẹ rria. Eyae Isẹri Jihova ivẹ jọ a jẹ hae nyaze te ta usiuwoma kẹ emetẹ nọ i yẹ emọ no wọhọ omẹ evaọ etẹe. Ẹdẹjọ me te kuomagbai. Ẹjiroro nọ me ro kuomagbe ai họ, re me dhesẹ kẹ Isẹri Jihova na nọ a bi wuhrẹ ahwo thọ. Rekọ a rọ Ebaibol na kiyo enọ mẹ kpobi evaọ edhere owowolẹ. Oware jọ nọ o jọ omarai were omẹ gaga họ, a jọ wowou. Fikiere mẹ tẹ rọwo nọ a wuhrẹ Ebaibol na kugbe omẹ.

O raha oke he, me te wuhrẹ oware jọ no Ebaibol na ze nọ u nwene uzuazọ mẹ. No emaha ze, ozọ uwhu u re mu omẹ gaga. Rekọ mẹ jọ Ebaibol na ruẹ uwuhrẹ Jesu kpahe ẹkparomatha na! (Jọn 5:​28, 29) Me te je wuhrẹ no Ebaibol na ze nọ Ọghẹnẹ ọ be daezọ mẹ. (1 Pita 5:7) Rekọ eme nọ e mai duobọte omẹ udu họ, eme nọ e rrọ obe Jerimaya 29:11 nọ o ta nọ: ‘Keme mẹ riẹ omaa nọ me wo kẹ owhai, ere Jihova ọ ta, omaa ewoma, orọnọ eyoma ha, re mẹ kẹ owhai ẹruore obaro.’ Ẹmẹrera na u te ti mu omẹ ẹro nọ mẹ rẹ sai rria bẹdẹ bẹdẹ evaọ aparadase otọakpọ.​—Olezi 37:29.

Isẹri Jihova a dhesẹ uvi uyoyou kẹ omẹ. Ẹdẹ ọsosuọ nọ me ro kpohọ ewuhrẹ rai, a whẹtiẹ omẹ họ oma, yọ ohwo kpobi o dede omẹ rehọ! (Jọn 13:​34, 35) Onana u wo ohẹriẹ gaga no oghẹrẹ nọ a ru omẹ nọ me ro kpohọ ichọche. Isẹri na a dede omẹ rehọ ghelọ oghẹrẹ uzuazọ nọ me je yeri. A se omẹ gboma, a rẹrote omẹ, je fiobọhọ kẹ omẹ. O tẹ jọ omẹ oma wọhọ ẹsenọ mẹ rrọ udevie uviuwou ulogbo nọ o vọ avọ uyoyou.

Nọ me bi wuhrẹ Ebaibol na, mẹ tẹ ruẹ vuhumu nọ o gwọlọ nọ me re ru inwene evaọ uzuazọ mẹ rọwokugbe izi Ọghẹnẹ. O jọ bẹbẹ kẹ omẹ re mẹ siọ ivovavovo ba. Mẹ tẹ jẹ ruẹ vuhumu nọ, ile nọ mẹ be gaviezọ kẹ e be kpare isiuru ivovavovo, fikiere me te nwene oghẹrẹ ile nọ mẹ jẹ gaviezọ kẹ. Fikinọ mẹ gwọlọ siọ idieda ba, me gbe je kpohọ epati evuọvo ho makọ te erọ aso, keme oma o te wọ omẹ da idi thomawa. Me te mu usu kugbe emamọ egbẹnyusu nọ i re fiobọhọ kẹ omẹ wo ẹnyaharo.​—Itẹ 13:20.

Evaọ oke yena re, yọ Isẹri Jihova a bi wuhrẹ Ebaibol na kugbe Tony. Nọ Isẹri na a rọ Ebaibol na kiyo enọ riẹ kpobi, u te mu ei ẹro nọ uzẹme na o bi wuhrẹ na. O te ru inwene ilogbo evaọ uzuazọ riẹ. Ọ tẹ fa usu no egbẹnyusu ozighi nọ o wo vẹre, siọ uji ototọ ba, jẹ siọ ige ivovo ba re. Re ma sai ru eva were Jihova, ma tẹ ruẹ vuhumu nọ ma rẹ siọ uzuazọ ofariẹ nọ ma bi yeri na ba, re ma sae yọrọ ọmọ mai evaọ emamọ edhere. Ma tẹ rọo evaọ ukpe 1982.

Mẹ kareghẹhọ nọ mẹ jẹ hae jọ Uwou-Eroro gbe Awake! * gwọlọ izoẹme nọ e ta kpahe iku ahwo nọ a je yeri uzuazọ ofafariẹ vẹre nọ a daoma ru inwene nọ mẹ be gwọlọ ru na. Iku rai e tuduhọ omẹ awọ gaga! Onana o tẹ lẹliẹ omẹ gbaemu nọ mẹ rẹ daoma ru inwene. Mẹ jẹ lẹ se Jihova ẹsikpobi re o fiobọhọ kẹ omẹ ru oware uwoma. Mẹ avọ Tony ma tẹ họ-ame evaọ amara Ahrẹ ọrọ ukpe 1982 evaọ ukoko Isẹri Jihova.

Emamọ usu nọ me wo kugbe Jihova oye u siwi uzuazọ mẹ. Mẹ avọ Tony ma ruẹ obufihọ Jihova no evaọ uzuazọ mai nọ ma rẹriẹ ovao dhe ebẹbẹ. Ebẹbẹ na i wuhrẹ omai epanọ a rẹ rẹroso Jihova, yọ u mu omai ẹro nọ ọye o bi fiobọhọ kẹ omai jẹ sẹro uviuwou mai.​—Olezi 55:22.

O be were omẹ re me wuhrẹ ọmọzae gbe ọmọtẹ mai re a riẹ Jihova wọhọ epanọ mẹ riẹ Jihova na. Obọnana eva e be were omẹ gaga inọ iruọmọ mẹ a riẹ Jihova re.

Enẹna me gbe bi kpe aro fihọ evaọ aso ruawa kpahe obaro hayo uwhu hu. Yọ iruo nọ mẹ avọ Tony ma bi ru họ, ma re weze kpohọ ikoko Isẹri Jihova koka koka nyae tuduhọ ae awọ. Ma bi kuomagbe Isẹri na wuhrẹ amọfa inọ a te fi ẹrọwọ họ Jesu, a ti wo uzuazọ ebẹdẹ bẹdẹ re.